പാര്‍പ്പിടം

ത്രീ ബെഡ്രൂം വില്ല

2012-01-17T08:57:00.002+03:00

മൂന്ന് കിടപ്പുമുറികളോടു കൂടിയ ഒറ്റനിലയുള്ള ഒരു വീടിന്റെ പ്ലാനാണിത്. മുന്‍‌വശത്തെ വരാന്തയില്‍ നിന്നും കടക്കുന്നത് ഒരു ഫോര്‍മല്‍ ലിവിങ്ങിലേക്കാണ്. അവിടെ നിന്നും ആകൃതിയിലുള്ള ഒരു ഹാളിലേക്കാണ് പ്രവേശിക്കുന്നത്. ഇവിടെ ഫാമിലി ലിവിങ്ങാണ്, ഫാമിലി ലിവിങ്ങില്‍ നിന്നും ഓപ്പണ്‍ കോര്‍ട്ട്‌യാഡിലേക്ക് പ്രവേശിക്കാം. ഫാമിലി ലിവിങ്ങിന്റെ ഒരു ഭാഗത്തായി ടി.വിയും വച്ചിരിക്കുന്നു. ഹാളിന്റെ ഒരുവശത്തായി ഡൈനിങ്ങ് അറേഞ്ച് ചെയ്തിരിക്കുന്നു. അതിനോട് ചേര്‍ന്ന് ഒരു വാഷ് ഏരിയയും കൊടുത്തിരിക്കുന്നു. മൂന്ന് കിടപ്പുമുറികളിലേക്കും പ്രവേശനം പ്രധാന ഹാളിന്റെ വിവിധ ഭാഗങ്ങളില്‍ നിന്നുമാണ് നല്‍കിയിരിക്കുന്നത്. സ്വകാര്യത ഉറപ്പു വരുത്തും വിധമാണ് ബെഡ്രൂമുകള്‍ ക്രമീകരിച്ചിരിക്കുന്നത്. മാസ്റ്റര്‍ ബെഡ്രൂമില്‍ നിന്നും കോര്‍ട്ട്‌യാഡിലേക്ക് തുറക്കാവുന്ന രീതിയില്‍ വിന്റോ നല്‍കിയിരിക്കുന്നു. മാസ്റ്റര്‍ ബെഡ്രൂമിനു മാത്രമേ ഡ്രസ്സിങ്ങ് ഏരിയ നല്‍കിയിട്ടുള്ളൂ. എല്ലാ ബെഡ്രൂമും ബാത്ത് അറ്റാച്ച്ഡ് ആണ്. ബാത്രൂമില്‍ ഡ്രൈ ഏരിയായും വെറ്റ് ഏരിയായും പ്രത്യേകം തിരിച്ചിരിക്കുന്നു.അടുക്കളയില്‍ സി ഷേപ്പിലാണ് വര്‍ക്കിങ്ങ് സ്ലാബ് അറേഞ്ച് ചെയ്തിരിക്കുന്നത്. കൂടാതെ ഒരു ബ്രേക്ക് ഫാസ്റ്റ് കൌണ്ടറും നല്‍കിയിരിക്കുന്നു. യൂട്ടിലിറ്റി ഏരിയായില്‍ വാഷിങ്ങ് മെഷീനിടാന്‍ സ്ഥലം നല്‍കിയിരിക്കുന്നു. കൂടാതെ ഒരു കോമണ്‍ ടോയ്‌ലറ്റും ഉണ്ട്.

കോര്‍ട്ട് യാഡ് ഒഴിവാക്കി 1690 ചതുരശ്രയടി വിസ്തീര്‍ണ്ണമുണ്ട്. ഉപയോഗിക്കുന്ന മെറ്റീരിയല്‍ നിര്‍മ്മാണത്തിലെ അനാവശ്യ ചിലവുകളുടെ നിയന്ത്രണം എന്നിവ അനുസരിച്ച് ചതുരശ്രയടിക്ക് 1100 രൂപ മുതല്‍ 1300 വരെ ചിലവ് പ്രതീക്ഷിക്കാം.

പുതുവൽസരാശംസകൾ

2011-12-31T15:34:00.000+03:00

എല്ലാ വായനക്കാർക്കും സ്നേഹവും സന്തോഷവും സമാധാനവും നിറഞ്ഞ പുതുവൽസരാശംസകൾ

നിറഞ്ഞ മനസ്സോടെ
എസ്.കുമാർ

പാര്‍പ്പിടം പ്ലാന്‍ 51

2011-10-05T12:39:00.003+03:00

1772 ചതുരശ്രയടി വിസ്തീര്‍ണ്ണമുള്ള 3 ബെഡ്രൂം വില്ലയുടെ പ്ലാനാണിത്. മുന്വശത്ത് വരാന്തയൂടെ ഒരു വശത്തായി കാര്‍പോര്‍ച്ച് നല്‍കിയിരിക്കുന്നു. വരാന്തയില്‍ നിന്നും പ്രവേശിക്കുന്നത് ലിവിങ്ങിലേക്കാണ്. ലിവിങ്ങില്‍ നിന്നും ഡൈനിങ്ങിലേക് കടക്കുമ്പോള്‍ അതിന്റെ ഒരു വശത്തായി മുകള്‍ നിലയിലേക്കുള്ള സ്റ്റെയര്‍ കേസ് നല്‍കിയിരിക്കുന്നു. സ്റ്റെയര്‍കേസിന്റെ ലാന്റിങ്ങിനു അടിഭാഗത്തായി ഒരു ടോയ്‌ലറ്റും നല്‍കിയിട്ടുണ്ട്. ഡൈനിങ്ങ് റൂമില്‍ നിന്നും ബെഡ്രൂമുകളിലേക്കും കിച്ചണിലേക്കും ഉള്ള വാതിലുകള്‍. ഡ്രസ്സിങ്ങ് റൂമും അറ്റാച്ച്ഡ് ബാത്രൂമും ഉള്ളതാണ് ഒരു ബെഡ്രൂം(ബെഡ്രൂം-1) പുറകിലെ ബെഡ്രൂം-2 ലേക്കുള്ള പാസ്സേജില്‍ വാഡ് റോബ് നല്‍കിയിരിക്കുന്നു. സ്വകാര്യത അല്പം കൂടുതല്‍ ഉള്ള ഈ ബെഡ്രൂം അറ്റാച്ച് ബാത്രൂം സൌകര്യമുള്ളതാണ്. കിച്ചണില്‍ സൌകര്യപ്രദമായ രീതിയില്‍ ഉള്ള വര്‍ക്കിങ്ങ് ട്രയാങ്കിള്‍ (ഫ്രിഡ്ജ്, വാഷ്ബേസിന്‍, സ്റ്റൌ )സജ്ജീകരിച്ചിരിക്കുന്നു. അതിനു പുറകിലായി യൂട്ടിലിറ്റി ഏരിയ നല്‍കിയിരിക്കുന്നു.

മുകള്‍ നിലയില്‍ സ്റ്റെയര്‍ കയറി ചെല്ലുന്നത് നേരെ ഒരു ബെഡ്രൂമിലേക്കാണ്. സ്റ്റെയറിന്റെ ലാന്റിങ്ങില്‍ നിന്നും പുറകിലെ ടെറസിലേക്കും മുന്‍‌വശത്തെ ബാല്‍ക്കണിയിലേക്കും വാതിലുകള്‍ നല്‍കിയിരിക്കുന്നു.

ചതുരശ്രയടിക്ക് 1000-1300 രൂപവരെ നിര്‍മ്മാണ ചിലവ് പ്രതീക്ഷിക്കുന്നു.

(ഉപയോഗിക്കുന്ന മെറ്റീരിയല്‍, ലേബര്‍ ചാര്‍ജ്ജ്, ഉടമയുടെഭാഗത്തുനിന്നും ഉണ്ടാകുന്ന മറ്റു ചിലവുകള്‍ (ദുര്‍ ചിലവുകള്‍) ഒക്കെ അനുസരിച്ച് ഇതില്‍ വ്യത്യാസം വരാം)

പാര്‍പ്പിടം പ്ലാന്‍-50

2011-09-04T13:47:00.002+03:00

ഇടത്തരം ബഡ്ജറ്റില്‍ ചെയ്യാവുന്ന മൂന്ന് ബെഡ്രൂമോടുകൂടിയ ഒരു നില വീടിന്റെ പ്ലാനാണിത്. പോര്‍ച്ചില്‍ നിന്നും സിറ്റൌട്ടിലേക്ക് കയറുന്നു. ടി.വി കാണുന്നതിനുള്ള സൌകര്യത്തിനും ലിവിങ്ങ് ഏരിയായില്‍ സ്ഥലം പരമാവധി പ്രയോജനപ്പെടുത്തുവാനുമായി ഫര്‍ണ്ണീച്ചര്‍ “ സി“ ആകൃതിയിലാണ് ക്രമീകരിച്ചിരിക്കുന്നത്, പ്രധാന വാതിലിനോട് ചേര്‍ന്നു തന്നെ അകത്തേക്കുള്ള പ്രവേശന കവാടം നല്‍കിയിരിക്കുന്നു. ഒരു ചെറിയ പാസ്സേജിലൂടെ വേണം ഡൈനിങ്ങ് ഏരിയായില്‍ എത്തുവാന്‍. പാസ്സേജിനു വലതു വശത്തായി ചെറിയ ഒരു കോര്‍ട്ട് യാഡ് നല്‍കിയിരിക്കുന്നു. ഡൈനിങ്ങ് റൂമിലേക്ക് യഥേഷ്ടം വായുവും വെളിച്ചവും ഈ കോര്‍ട്ട്‌യാഡിലൂടെ കടന്നു വരുന്നു. കോര്‍ട്ട്‌യാഡിന്റെ ഒരു വശത്ത് ഇരിക്കുവാനുള്ള സൌകര്യം നല്‍കിയിട്ടുണ്ട്.

ഡൈനിങ്ങ് റൂമില്‍ നിന്നും നേരിട്ട് പ്രവേശിക്കാവുന്ന വിധത്തിലാണ് ബെഡ്രൂമുകള്‍ ക്രമീകരിച്ചിരിക്കുന്നത്. രണ്ടു ബെഡ്രൂമുകള്‍ക്ക് അറ്റാച്ച്ഡ് ബാത്രൂം നല്‍കിയിരിക്കുന്നു. കൂടാതെ എല്ലാ ബെഡ്രൂമിലും ബില്‍റ്റ് ഇന്‍ വാര്‍ഡ് റോബുകളും നല്‍കിയിട്ടുണ്ട്. ഡൈനിങ്ങിന്റെ വലതു വശത്തായിട്ടാണ് കിച്ചന്‍. കിച്ചണിനോടു ചേര്‍ന്ന് ഒരു യൂട്ടിലിറ്റി ഏരിയായും ഉണ്ട്. ഇവിടെ നിന്നും പ്രവേശിക്കാവുന്ന വിധത്തില്‍ ഒരു സോര്‍ റൂമും റ്റോയ്‌ലറ്റും നല്‍കിയിരിക്കുന്നു.

കാര്‍ പോര്‍ച്ചും കോര്‍ട്ട്‌യാഡുമടക്കം 1431 ചതുരശ്രയടിയാണ് ഈ വീടിന്റെ വിസ്തീര്‍ണ്ണം. കൃത്യമായ ബഡ്ജറ്റ് തയ്യാറാക്കി അതിനനുസരിച്ച് ചെയ്താല്‍ 15/15.50 ലക്ഷം രൂപയ്ക്ക് നിര്‍മ്മാണം പൂര്‍ത്തിയാക്കാം.

(സമാനതയുള്ള മറ്റൊരു പ്ലാന്‍ മുമ്പ് പ്രസിദ്ധീകരിച്ചിരുന്നു എങ്കിലും കോര്‍ട്ട്‌യാഡ് ഉള്‍പ്പെടെ ചില മാറ്റങ്ങള്‍ ഉള്ളതിനാല്‍ ഇതും പ്രസിദ്ധീകരിക്കുന്നു)

കണ്ടമ്പററി സ്റ്റൈല്‍ തിരഞ്ഞെടുക്കുമ്പോള്‍

2011-09-03T15:08:00.002+03:00

ആധുനികതയോട് അഭിനിവേശം കാണിക്കുന്നവരാണ് മലയാളികള്‍. ഒപ്പം പഴമയെ പൂര്‍ണ്ണമായും തള്ളിക്കളയുവാന്‍ വിമുഖതയും ഉണ്ട്. വീടു നിര്‍മ്മിക്കുമ്പോള്‍ ഇത്തരം കാര്യങ്ങള്‍ സാധാരണയായി കടന്നുവരാറുണ്ട്. ആധുനിക സൌകര്യങ്ങളോടുകൂടിയ എന്നാല്‍ ട്രഡീഷ്ണലായ വീട് എന്നാണ് മിക്കവരും ആവശ്യപ്പെടുക. അവിദഗ്ദരായ നാടന്‍ വാസ്തു “വിദഗ്ദര്‍” വരെ നല്‍കുന്ന പ്ലാനിനനുസരിച്ച് കോണ്ട്രാക്ടര്‍ നല്‍കുന്ന സ്കെച്ചുമായിട്ടായിരിക്കും മിക്കവരുടേയും വീടുകള്‍ ഉയര്‍ന്നു വരിക. ഇതിന്റെ കൂടെ ഭാഗമായി ഇരുവശത്തെക്കും ചരിച്ച് വാര്‍ത്ത് ഒരു മുഖപ്പും നല്‍കി മുകളില്‍ ഓടു വിരിച്ച വീടുകള്‍ കേരളത്തില്‍ വ്യാപകമാകുകയും ചെയ്തു. പറയത്തക്ക വ്യത്യാസങ്ങള്‍ ഇല്ലാത്ത ഇത്തരം ആയിരക്കണക്കിനു വീടുകള്‍ കേരളത്തിന്റെ വടക്കേ അറ്റം മുതല്‍ തെക്കേ അറ്റം വരെ സഞ്ചരിച്ചാല്‍ കണ്ടെടുക്കാനാകും. ദൌര്‍ഭാഗ്യവശാല്‍ ശരാശരിക്കാരായ ആര്‍ക്കിടെക്റ്റുകളും ഇത്തരം ശൈലി തന്നെയാണ് പിന്തുടര്‍ന്നിരുന്നത്.

എന്നാല്‍ കേരളത്തിലെ വില്ലകളുടെ ഡിസൈനിങ്ങില്‍ വിപ്ലവകരമായ മാറ്റം വരുത്തിയവരാണ് ആര്‍ക്കിടെക്ട് ദമ്പതിമാരായ ലിജോയും റെനി ലിജോയും(http://lijoreny.wordpress.com/). റൂഫ് ചരിച്ചു വാര്‍ത്ത് ഓടു വെക്കുക ചാരുപടിയും ഉരുണ്ട തൂണുകളും നല്‍കുക എന്നീ പ്രവണതെ(എന്നിട്ടിതിനെ ട്രഡീഷ്ണല്‍ എന്നു പറയുകയും ചെയ്യും) അക്ഷരാര്‍ഥത്തില്‍ ഇവര്‍ ഉടച്ചു വാര്‍ത്തു. മലയാളിയുടെ ഭവന സ്വപനങ്ങള്‍ക്ക് പുതിയ ഒരു തലം നല്‍കിക്കൊണ്ട് കണ്ടമ്പററി ആര്‍ക്കിടെക്ചറിന്റെ സാധ്യതയെ പരിചയപ്പെടുത്തുകയും അത് പ്രാവര്‍ത്തികമാക്കുകയും ചെയ്തു. വ്യത്യസ്ഥവും നൂതനവുമായ ആശയങ്ങള്‍ തങ്ങളുടെ ഓരോ പ്രോജക്ടിലും അവര്‍ വിജയകരമായി കൊണ്ടു വന്നു. രൂപത്തിലും നിറത്തിലുമെല്ലാം തികച്ചു വ്യത്യസ്ഥത പുലര്‍ത്തുന്ന അവരുടെ ഡിസൈനുകള്‍ വളരെ പെട്ടെന്ന് തന്നെ ശ്രദ്ധിക്കപ്പെട്ടു. ഇതിന്റെ ഭാഗമായി നിരവധി അംഗീകാരങ്ങള്‍ അവരെ തേടിയെത്തി.

അടുത്തിടെ ആര്‍ക്കിടെക്റ്റ് ലിജോയുമായി ഒരു സംഭാഷണം നടത്തുവാന്‍ ഇടയായി. കണ്ടമ്പററി ഡിസൈന്‍ ഇന്ന് സാധാരണമായിക്കൊണ്ടിരിക്കുന്നതിന്റെ ആഹ്ലാദം പങ്കുവെച്ചതിനോടൊപ്പം ചില ആശങ്കകളും അദ്ദേഹം പറയാതിരുന്നില്ല. പ്രധാന ആശങ്ക അവിദഗ്ദരായ തൊഴിലാളികള്‍ സൃഷ്ടിക്കുന്ന പ്രശ്നങ്ങള്‍ തന്നെ ആയിരുന്നു. കേവലം എക്സ്റ്റീരിയര്‍ മാത്രമല്ല ഒരു കെട്ടിടത്തിന്റെ എണ്ട്രി പോയന്റ് മുതല്‍ ബാക്ക് യാഡ് വരെ ഡിസൈനിങ്ങിന്റെ പരിധിയില്‍ വരും എന്ന് അദ്ദേഹം എടുത്തു പറഞ്ഞു. കുറേ ബോക്സ് നല്‍കി വിവിധ വര്‍ണ്ണങ്ങളും ക്ലാഡിങ്ങും നല്‍കിയാല്‍ കണ്ടമ്പററി ആയി എന്ന് കരുതുന്നത് തെറ്റാണെന്നാണ് അദ്ദേഹത്തിന്റെ പക്ഷം. ക്ലൈന്റിന്റെ താല്പര്യം, പ്രദേശത്തെ ഭൂപ്രകൃതി, സൂര്യന്റ്യും, കാറ്റിന്റെയും ഗതി തുടങ്ങി വിവിധ ഘടകങ്ങള്‍ കൃത്യമായി വിലയിരുത്തിക്കൊണ്ടാണ് തങ്ങള്‍ ഡിസൈന്‍ തയ്യാറാക്കുന്നതെന്ന് അദ്ദേഹം വ്യക്തമാക്കി. സ്ഥലത്തിന്റെയും മെറ്റീരിയലിന്റെയും ശരിയായ വിനിയോഗവും യൂട്ടിലിറ്റിക്ക് പ്രാധാന്യം നല്‍കിക്കൊണ്ടുള്ള ഡിസൈനിങ്ങ് ശൈലിയാണ് അവര്‍ പിന്തുടരുന്നത്.

പതിവു പോലെ പുതിയ ട്രന്റിനനുസരിച്ച് കണ്ടമ്പററി എന്ന രീതിയില്‍ നിരവധി അനുകരണങ്ങളും വരുവാന്‍ തുടങ്ങി.നേര്‍ രേഖയില്‍, ലെവല്‍ ഡിഫറന്‍സ് നല്‍കി, ജനലിനും മറ്റും കുറേ ബോക്സുകള്‍ നല്‍കി കെട്ടിടം നിര്‍മ്മിച്ച് വെള്ള,ഗ്രേ, കടും നിറങ്ങള്‍ എന്നിവ ഉപയോഗിച്ചാല്‍ കണ്ടമ്പററി ആയി എന്ന ഒരു ധാരണ മലയാളികള്‍ക്കിടയില്‍ രൂപപ്പെടുവാനും ആരംഭിച്ചു. ഇന്നിപ്പോള്‍ കൊച്ചു ഗ്രാമങ്ങളില്‍ പോലും “കണ്ടമ്പററി വീടുകളുടെ” നിര്‍മ്മാണങ്ങള്‍ നടന്നു കൊണ്ടിരിക്കുന്നു. കേരളത്തിലെ പോലെ ധാരാളം മഴ ലഭിക്കുന്ന ഒരു പ്രദേശത്ത് വളരെ ശ്രദ്ധാപൂര്‍വ്വം ചെയ്തില്ലെങ്കില്‍ ചോര്‍ച്ചയും മറ്റു പലവിധ പ്രശ്നങ്ങളും ഉണ്ടാകുവാന്‍ സാധ്യതയുണ്ടെന്നത് എടുത്തു പറയാതിരിക്കാനാവില്ല. ചുമരില്‍ നിന്നും മെയിന്‍ റൂഫ് പത്തുമുതല്‍ പതിനഞ്ച് സെന്റിമീറ്റര്‍ വരെ പുറത്തേക് തള്ളുന്ന രീതി നമ്മുടെ മിക്ക നിര്‍മ്മാണ പ്രവര്‍ത്തനങ്ങളിലും അവലംബിക്കാറുണ്ട്. എന്നാല്‍ അത് ഒഴിവാക്കി റൂഫും ചുമരും ഒരേ ലെവലില്‍ തന്നെ നിര്‍മ്മിക്കുന്നതാണ് പുതിയ പ്രവണത. ശ്രദ്ധാപൂര്‍വം പ്രത്യേക ട്രീറ്റ്മെന്റ് നല്‍കി ചെയ്തില്ലെങ്കില്‍ ഈ ജോയിന്റില്‍ ക്രാക്ക് വീഴുകയും മഴ വെള്ളം അകത്തേക്ക് കിനിഞ്ഞിറങ്ങുകയും ചെയ്യും.അവിദഗ്ദരായ തൊഴിലാളികളും അശ്രദ്ധയും ചേര്‍ന്ന് ആധിപത്യം സ്ഥാപിച്ചിരിക്കുന്ന നമ്മുടെ നാട്ടിലെ ഇന്നത്തെ ഭൂരി പക്ഷം നിര്‍മ്മാണ പ്രവര്‍ത്തനങ്ങളും കൂടെ ചേരുമ്പോള്‍ ഇത് ഭാവിയില്‍ വലിയ തലവേദനയാകും എന്നതില്‍ സംശയമില്ല. ചെറുതും വലുതുമായ ഇത്തരം നിരവധി സംഗതികള്‍ ശ്രദ്ധിക്കേണ്ടതാണ്

ഇന്റീരിയറിന്റെ കാര്യത്തില്‍ ഇന്നിപ്പോള്‍ കണ്ടു വരുന്ന ഒരു പ്രവണത കമ്പൂട്ടര്‍ എയ്ഡഡ് ഡിസൈന്‍ സോഫ്റ്റ് വെയറുകളായ ത്രിഡി മാക്സിന്റേയും, ഓട്ടോ കാഡിന്റേയും മറ്റും സഹായത്തോടെ ചില ഇമേജുകള്‍ ചെയ്തെടുക്കുകയും അത് സൈറ്റില്‍ നിര്‍മ്മിച്ചെടുക്കുകയുമാണ്. മരം/പ്ലൈവുഡ്ഡില്‍ കുറേ ബോക്സുകളും സീലിങ്ങും മറ്റും നല്‍കി ഇടയില്‍ എല്‍.ഈ.ഡി. ബള്‍ബ് നല്‍കിയാണ് പലരും “കണ്ടമ്പററി ഡിസൈന്‍“ ആക്കുന്നത്. വേണ്ടത്ര അനുഭവ പരിചയമോ ഉള്‍ക്കാഴ്ചയോ ഇല്ലാതെ കേവലം കമ്പ്യൂട്ടര്‍ ഇമെജ് സൃഷ്ടിക്കുന്നവര്‍ നല്‍കുന്ന ഡിസൈനുകള്‍ പലപ്പോഴും ചിലവേറിയതും യദാര്‍ഥ കാഴ്ചയില്‍ വലിയ ഭംഗി പകരുന്നതും ആകാറില്ല. പ്രായോഗികമായി വര്‍ക്ക് ചെയ്ത് അനുഭവ പരിചയമുള്ള ഇന്റീരിയര്‍ ഡിസൈനറെ തിരഞ്ഞെടുക്കുയും ബഡ്ജറ്റിനനുസരിച്ച് മീകച്ച ഡിസൈനുകള്‍ ചെയ്യീക്കുകയുമാണ് വേണ്ടത്.

ട്രന്റിനനുസരിച്ച് വീടു പണിക്ക് മുതിരാതെ കണ്ടമ്പററി ഡിസൈന്‍ തങ്ങളുടെ അഭിരുചിക്കും ജീവിത ശൈലിക്കും ഇണങ്ങുന്നതാണോ എന്ന് ആദ്യമേ തീരുമാനിക്കുക.വിദഗ്ദനായ ഒരു ഡിസൈനറെ കണ്ടെത്തുകയും ആഗ്രഹങ്ങള്‍, ആവശ്യങ്ങള്‍, ബഡ്ജറ്റ്, പ്രായോഗികത എന്നിവക്കനുസരിച്ച് ഡിസൈന്‍ ചെയ്യീക്കുക. തുടര്‍ന്ന് അത് പ്രാവര്‍ത്തികമാക്കാന്‍ തക്ക അറിവും അനുഭവവുമുള്ള ഒരു എഞ്ചിനീയറുടെയും സഹായവും ഉണ്ടെങ്കില്‍ മാത്രമേ നല്ലൊരു വീട് നിര്‍മ്മിക്കുവാന്‍ ആകൂ. വേണ്ടത്ര ഉള്‍ക്കാഴ്ചയില്ലാതെ ഇത്തരം നിര്‍മ്മാണങ്ങള്‍ക്ക് പുറപ്പെട്ടാല്‍ അമിതമായ ചിലവും അതോടൊപ്പം നിരവധി പ്രശ്നങ്ങളും അഭിമുഖീകരിക്കേണ്ടിവരും.

വില്ല പ്ലാന്‍ - 49

2011-07-05T16:08:00.004+03:00

വീടുകളെ കുറിച്ചുള്ള സങ്കല്പങ്ങള്‍ അനുദിനം മാറിക്കൊണ്ടിരിക്കുന്ന ഒരു കാലഘട്ടമാണിന്ന്. അത്തരം ചില മാറ്റങ്ങള്‍ വീടുകളുടെ പ്ലാനിങ്ങിലും അകത്തള സജ്ജീകരണങ്ങളിലും വളരെയധികം പ്രതിഫലിക്കുന്നുണ്ട്. കാലവസ്ഥാ വ്യതിയാനം, കണ്ടമ്പററി ശൈലിയോടുള്ള താല്പര്യം എന്നിവ കോര്‍ട്ട്‌യാടിനെ വീടുകളില്‍ ഒരു ഭാഗമാക്കി മാറ്റിയിരിക്കുന്നു. ഈ വീടിലും കോര്‍ട്ട്‌യാഡ് ഒരു പ്രധാന ഘടകമാണ്.

ഗേറ്റ് കടന്നാല്‍ നേരെ കാണുന്നത് കാര്‍പോര്‍ച്ചും അതിന്റെ വശത്തായി സിറ്റൌട്ടുമാണ്. സിറ്റൌട്ടില്‍ നിന്നും കടന്ന് വരുന്നത് ലിവിങ്ങ് ഏരിയായിലേക്കാണ്. ഇതിന്റെ ഇടതു വശത്തായി ഒരു കോര്‍ട്ട്‌യാഡ് നല്‍കിയിരിക്കുന്നു. ലിവിങ്ങില്‍ നിന്നും ഡൈനിങ്ങിലേക്ക് പോകുമ്പോള്‍ ഒരു ചെറിയ ഫോയര്‍ ഉണ്ട്. ഇവിടെ പൂജയ്ക്കുള്ള ഒരു സ്പേസ് ഉണ്ട്. ഇതിനായി ഒരു കബോഡ് ഉണ്ടാക്കിയാല്‍ നന്ന്. ഡൈനിങ് ഏരിയായില്‍ നിന്നുമാണ് ബെഡ്രൂമുകള്‍, കിച്ചന്‍ എന്നിവയിലേക്കുള്ള ഡോറുകള്‍ നല്‍കിയിരിക്കുന്നത്. ഒപ്പം സെറ്റെയര്‍ കേസും നല്‍കിയിട്ടുണ്ട്. രണ്ടു ബെഡ്രൂമുകളില്‍ മുന്‍ വശത്തേതില്‍ നിന്നും ആവശ്യമെങ്കില്‍ കോര്‍ട്ട്‌യാഡിലേക്ക് ജനല്‍ നല്‍കാവുന്നതാണ്. ഒരു വാര്‍ഡ്‌റോബും അറ്റാച്ച്ഡ് ബാത്രൂമും ഈ മുറിയില്‍ നല്‍കിയിട്ടുണ്ട്.

വീടിന്റെ പുറകിലായാണ് രണ്ടാമത്തെ ബെഡ്രൂം വരുന്നത്. ഡോര്‍ ഓപ്പണ്‍ ചെയ്യുന്നതിന്റെ വശത്തായി വാര്‍ഡ്‌റോബ് നല്‍‌കിയിരിക്കുന്നു. നേരെ തന്നെ ബാത്രൂമും. സ്വകാര്യത ഉറപ്പാക്കും വിധമാണ് ബെഡ് ക്രമീകരിച്ചിരിക്കുന്നത്, ഒരു സോഫായും ഇടാം. എതിര്‍ വശത്തായി ടി.വിയും മറ്റു മ്യൂസിക് സംവിധാനങ്ങളും സെറ്റ് ചെയ്തിരിക്കുന്നു. കിച്ചണ്‍ ഉപയോഗിക്കുന്നവര്‍ക്ക് ആയാസ രഹിതമായി ജോലി ചെയ്യാവുന്ന വിധത്തിലാണ് “വര്‍ക്കിങ്ങ് ട്രയാങ്കിള്‍” (ഫ്രിഡ്ജ്, സിങ്ക്, സറ്റൌ0 സജ്ജീകരിച്ചിരിക്കുന്നത്. എന്റെ മറ്റു പല പ്ലാനുകളിലുമെന്ന പോലെ കിച്ചണില്‍ ഫാമിലി ഡൈനിങ്ങ്/ബ്രേക്ക് ഫാസ്റ്റ് ഏരിയായും ഒരുക്കിയിട്ടുണ്ട്. ഇതിനോട് ചേറ്ന്ന്‍ യൂട്ടിലിറ്റി ഏരിയ നല്‍കിയിരിക്കുന്നു.

ഡൈനിങ്ങ് റൂമിന്റെ ഒരു വശത്തായി പേഷോ നല്‍കിയിട്ടുണ്ട്. ഇവിടേക്ക് പ്രവേശിക്കുവാന്‍ ഒരു ഡോറും. പേഷ്യോയുടെ തുടര്‍ച്ചയായി ഒരു ഗാര്‍ഡനും അവിടെ ഒരു ഓപ്പണ്‍ ഡൈനിങ്ങും ഒരുക്കിയിരിക്കുന്നു. കുട്ടികള്‍ക്ക് കളിക്കുവാനും ഒപ്പം വീടിനകത്ത് ഇരുന്ന് ഭക്ഷണം കഴിക്കുന്നതില്‍ നിന്നും വ്യത്യസ്ഥമാ‍യ അനുഭവം ആയിരിക്കും തുറന്ന അന്തരീക്ഷത്തിലേത്.

മുകള്‍ നിലയില്‍ രണ്ട് കിടപ്പു മുറികള്‍ ആണ് ഉള്ളത്. സ്റ്റെയര്‍ കയറി ചെല്ലുന്നത് ഒരു ഫാമിലി ലിവിങ്ങ് ഏരിയായിലേക്കാണ്. ഇവിടെ നിന്നും ബാല്‍ക്കണിയിലേക്ക് പ്രവേശിക്കാം. ലിവിങ്ങിന്റെ ഒരു വശത്തായി കൊടുത്തിരിക്കുന്ന “കട്ടൌട്ടിലൂടെ” താഴത്തെ ഫോയര്‍ കാണാം. താഴത്തെ ബെഡ്രൂമുകളുടെ ആവര്‍ത്തനമാണ് മുകള്‍ നിലയില്‍. 211.6 ചതുരശ്ര മീറ്റര്‍ (2278 ചതുരശ്രയടി) വിസ്ത്രീര്‍ണ്ണം വരുന്ന ഈ വീടിന് 22 ലക്ഷം മുതല്‍ മുകളിലേക്കാണ് ചിലവ് പ്രതീക്ഷിക്കുന്നത്.

സ്ക്വയര്‍ഫീറ്റിന് വെറും 750 രൂപ?

2011-04-10T15:40:00.003+03:00

കേരളത്തില്‍ ശരാശരി നിലവാരമുള്ള ഒരു വീടു നിര്‍മ്മിക്കുവാന്‍ ഒരു ചതുരശ്രയടിക്ക് 1000-1200 വരെയാണ് കോണ്ട്രാക്ടര്‍മാര്‍ ഈടാക്കുന്നത്. തൊഴിലാളികളുടെ വേദനത്തിലും നിര്‍മ്മാണ സാമഗ്രികളുടെ വിലയിലും അനുദിനം വര്‍ദ്ധനവുണ്ടാകുന്ന സാഹചര്യത്തില്‍ ഇത് ഇനിയും മുകളിലേക്ക് പോകും എന്നതില്‍ തര്‍ക്കമില്ല. എന്നാല്‍ ഈയ്യിടെ സ്ക്വയര്‍ഫീറ്റിന് 750-800 രൂപയ്ക്ക് വീടു നിര്‍മ്മിച്ചു നല്‍കും എന്ന വാഗ്ദാനവുമായി പലരും രംഗത്തുവരുന്നതായി അറിയുന്നു. ഒറ്റനോട്ടത്തില്‍ ആകര്‍ഷകമെന്ന് തോന്നുന്ന ഇതിന്റെ പുറകില്‍ മറഞ്ഞിരിക്കുന്ന പല “സൂത്രങ്ങളും” സാധാരണക്കാരുടെ ശ്രദ്ധയില്‍ പെടുന്നില്ല. സാധാരണയായി ഒരാള്‍ “ടേണ്‍ കീ” രീതില്‍ എല്ലാ വിധ വര്‍ക്കുകളും കോണ്ട്രാക്ടര്‍ ആണ് ചെയ്യുക എന്നാല്‍ 750-ന്റെ കരാറുകാര്‍ പല സംഗതികളും കരാറില്‍ നിന്നും ഒഴിവാക്കുന്നു.

താഴെ പറയുന്ന ചില സംഗതികള്‍ ഇവയില്‍ ചിലതുമാത്രം.
ഉദാ: 1. തറക്ക് വാനം കോരുന്നതും തറയില്‍ മണല്‍ നിറക്കുന്നതും ക്ലൈന്റിന്റെ ഉത്തരവാദിത്വമായിരിക്കും.
2. നിര്‍മ്മാണത്തിനാവശ്യമായ മണല്‍ ക്ലൈന്റ് നല്‍കണം. മണല്‍ അരിക്കല്‍/വൃത്തിയാക്കല് എന്നിവയും ചെയ്തു കൊടുക്കണം‍.
3. സെപ്റ്റിക് ടാങ്ക് നിര്‍മ്മിക്കുവാന്‍ പ്രത്യേകം പണം നല്‍കണം.
4. കെട്ടിടം നനക്കല്‍ ക്ലൈന്റിന്റെ ഉത്തരവാദിത്വം ആയിരിക്കും.
5. ഇലക്ട്രിക് വയറുകള്‍ മറ്റു ഫിറ്റിങ്സുകള്‍ എന്നിവ നിശ്ചിത ക്വാളിറ്റിക്ക് മുകളില്‍ ഉള്ളവ ആവശ്യമാണെങ്കില്‍ ക്ലൈന്റ് വാങ്ങണം.
6. റൂഫില്‍ ടൈല്‍ പതിക്കാന്‍ പ്രത്യേക ചാര്‍ജ്ജ് നല്‍കണം.
7. ചുമരില്‍ ഒരു കോട്ട് വൈറ്റ് സിമെന്റ്,കട്ടില/ജനലുകളില്‍ പ്രൈമര്‍ എന്നിവ മാത്രമേ ചെയ്യൂ. ഭാക്കി ക്ലൈന്റ് ചെയ്യണം.
8.തൊഴിലാളികള്‍ക്ക് ഭക്ഷണം ക്ലൈന്റ് നല്‍കണം.
9.കിച്ചണില്‍ ഗ്രാനൈന്റ് കൌണ്ടര്‍ ടോപ് ക്ലൈന്റ് വാങ്ങി നല്‍കണം.
10.ചതുരശ്രയടിക്ക് 15-20 രൂപ വരുന്ന ടൈത്സ് ആയിരിക്കും പതിക്കുക. അല്ലാത്ത പക്ഷം ക്ലൈന്റ് ടൈല്‍ വാങ്ങി നല്‍കണം.
ഇത്തരത്തില്‍ നിരവധി സംഗതികള്‍ ഇത്തരക്കാര്‍ ക്ലൈന്റിന്റെ തലയിലിടും. മാത്രമല്ല നിര്‍മ്മാണ സാമഗ്രികളുടെ ക്വാളിറ്റിയിലും അളവിലും വലിയ വ്യത്യാസം ഉണ്ടായിരിക്കും.

വലിയ വിലയാണ് മണലിനു വരുന്നത്. സര്‍ക്കാര്‍ ക്വാട്ടയില്‍ നിന്നും ലഭിക്കുന്ന മണല്‍ നിര്‍മ്മാണത്തിനു തികയില്ല. എം.സാന്റ് തന്നെ പലതരം നിലവാരത്തില്‍ ഉള്ളതുണ്ട്. ഇത് ക്ലൈന്റ് വാങ്ങേണ്ടിവരുമ്പോള്‍ നിര്‍മ്മാണ ചിലവ് വര്‍ദ്ധിക്കുന്നു. അതു പോലെ തറക്ക് വാനം കോരുന്നതും തറ ഫില്‍ ചെയ്യുന്നതും, സെപ്റ്റിക് ടാങ്ക് നിര്‍മ്മിക്കല്‍, പെയ്ന്റിങ്ങ് തുടങ്ങി പല സംഗതികളും ചേര്‍ന്നു വരുമ്പോള്‍ യദാര്‍ഥത്തില്‍ 1000 രൂപയുടെ അടുത്ത്/അതിനു മുകളില്‍ തന്നെ ചിലവ് വരും. അതിനാല്‍ ഇത്തരക്കാരുടെ ചതിവില്‍ പെടാതിരിക്കുവാന്‍ വീടുനിര്‍മ്മിക്കുവാന്‍ ഒരുങ്ങുന്നവര്‍ പ്രത്യേകം ശ്രദ്ധിക്കുക.

ഓര്‍ക്കുക എപ്പോളും വിശദമായ കാര്യങ്ങള്‍ ഉള്‍പ്പെടുത്തിയ കരാര്‍ തന്നെ തയ്യാറാക്കുക. (ഏതെല്ലാം ഘട്ടങ്ങളില്‍ എത്ര പണം നല്‍കണം, ഏതെല്ലാം ക്വാളിറ്റിയില്‍ ഉള്ള മെറ്റീരിയല്‍ ഉപയോഗിക്കണം എന്നും എന്തെല്ലാം കാര്യങ്ങള്‍ കോണ്ട്രാക്ടര്‍ ചെയ്തിരിക്കണം എന്നുമെല്ലാം ഇതില്‍ രേഖപ്പെടുത്തിയിരിക്കണം) അതു പോലെ ഡീറ്റെയിലായ ഡ്രോയിങ്ങിന്റെ കോപ്പിയിലും ഇരു കക്ഷികളും സൈന്‍ ചെയ്ത് സൂക്ഷിക്കുക.

ചതുരശ്രയടിക്ക് “വെറും“ 750 ന്റെ പുറകിലെ കണ്ടീഷന്‍സ് ഒരിക്കല്‍ കൂടെ ചോദിച്ചറിയുക.

ഫോര്‍ ബെഡ്രൂം പ്ലാന്‍

2011-03-24T14:16:00.003+03:00

ഡിസൈനിനു കടപ്പാട് മിസിസ്സ്. വിനിത എസ്.കുമാര്‍

ഗേറ്റ് കടന്നു വരുന്നത് നേരെ പോര്‍ച്ചിന്റെ വശത്തേക്കാണ്. തുടര്‍ന്ന് സിറ്റൌട്ടിനും കാര്‍പോര്‍ച്ചിനും ഇടയില്‍ ചെടികള്‍ വെക്കുവാനായി ഒരു പ്ലാന്റര്‍ ബോക്സ് നല്‍കിയിരിക്കുന്നു. സിറ്റൌട്ടില്‍ നിന്നും കയറുന്നത് ലിവിങ്ങ് റൂമിലേക്കാണ്. ലിവിങ്ങ് റൂമിന്റെ ഒരു വശത്തായി നീളത്തില്‍ ഒരു കോര്‍ട്ട്‌യാഡ് നല്‍കിയിരിക്കുന്നു. അലങ്കാരമെന്നതിനുപരിയായി പ്രധാനമായും വീടിനകത്തെ ചൂടു കുറക്കുക എന്ന ഉദ്ദേശ്യത്തിലാണ് കോര്‍ട്ട്‌യാഡ് നല്‍കുന്നത്. ലിവിങിനേയും ഡൈനിങ്ങിനേയും വേര്‍തിരിക്കുന്നത് അലങ്കാരങ്ങള്‍ ചെയ്ത ഒരു ലോ വോള്‍ കൊണ്ടാണ്. മെയിന്‍ ഡോര്‍ തുറന്നാല്‍ നേരെ കിച്ചണിലേക്ക് നോട്ടം വരാതിരിക്കുവാന്‍ ലിവിങ്ങില്‍ നിന്നും സ്റ്റെയര്‍ കേസിന്റെ വശത്തുക്കൂടെ ആണ് അകത്തേക്ക് കടക്കുവാനുള്ള ആര്‍ച്ച് ഓപ്പണിങ്ങ് നല്‍കിയിരിക്കുന്നത്. ഡൈനിങ്ങ് ഹാളില്‍ ഒരു വശത്തായി ടി.വി സജ്ജീകരിച്ചിരിക്കുന്നു. (ഇതിനെ വേണമെങ്കില്‍ ലിവിങ്ങിലേക്ക് മാറ്റാവുന്നതാണ്.) ഇതിന്റെ എതിര്‍വശത്തായി വ്ഷ്ബേസിനു പ്രത്യേകം ഒരു സ്ഥലം ഒരുക്കിയിരിക്കുന്നു. കോര്‍ട്ട്‌യാഡ് ഡൈനിങ്ങിന്റെ വശത്തും വരുന്നുണ്ട്. ഇത് വായുസഞ്ചാരത്തോടൊപ്പം വെളിച്ചവും ഉറപ്പുവരുത്തുന്നു. കൂടാതെ ഡൈനിങ്ങിനെ ഒരു ഭാഗം ഡബിള്‍ ഹൈറ്റ് നല്‍കിയതിനാല്‍ മുകളില്‍ നിന്നും വെളിച്ചം കടന്നുവരുന്നതിനുള്ള സാധ്യത ഒരുക്കിയിട്ടുണ്ട്.

ഡൈനിങ്ങില്‍ നിന്നും തന്നെയാണ് രണ്ടു ബെഡ്രൂമുകളിലേക്കും കിച്ചണിലേക്കും ഉള്ള ഡോറുകള്‍ നല്‍കിയിരിക്കുന്നത്. കിച്ചണില്‍ വര്‍ക്കിങ്ങ് കൌണ്ടര്‍ കൂടാതെ ഒരു ബ്രേക്ക്ഫാസ്റ്റ് കൌണ്ടറും ഉണ്ട്. യൂട്ടിലിറ്റി ഏരിയായില്‍ പുകയില്ലാത്ത അടുപ്പ് നല്‍കാം, ഇവിടെ ഒരു മൂലയില്‍ വാഷിങ്ങ് മെഷീന്‍ ഇടാവുന്നതാണ്. ഇതിനോട് ചേര്‍ന്ന് ചെറിയ ഒരു സ്റ്റോറും ഉണ്ട്.

മാസ്റ്റര്‍ ബെഡ്രൂമില്‍ ഡ്രസ്സിങ്ങ് ഏരിയ പ്രത്യേകം നല്‍കിയിട്ടുണ്ട്. ഇവിടെ ഒരു വശത്ത് വാര്‍ഡ് റോബും മറുവശത്ത് മിറര്‍ അടക്കം മേക്കപ്പ് സൌകര്യങ്ങളോടു കൂടിയ ചെറിയ ടേബിള്‍ ഇടാവുന്നതാണ്. ബാത്രൂമില്‍ വെറ്റ് ഏരിയായും ഡ്രൈ ഏരിയായും പ്രത്യേകം ഒരുക്കിയിരിക്കുന്നു. രണ്ടാമത്തെ ബെഡ്രൂമില്‍ വാര്‍ഡ് റോബും ബാത്രൂമും കൂടാതെ ഒരു വശത്ത് ജനലിനോട് ചേര്‍ന്ന് ബില്‍റ്റിന്‍ സീറ്റിങ്ങ് സൌകര്യം ഏര്‍പ്പെടുത്തിയിരിക്കുന്നു. ഇതിന്റെ താഴെ സ്റ്റോറേജ് സ്പേസായും ഉപയോഗിക്കാം.

മൂകള്‍ നിലയില്‍ നിലയിലേക്കുള്ള സ്റ്റെയറിന്റെ അടിയിലായി ഒരു പൌഡര്‍ റൂം ഒരുക്കിയിരിക്കുന്നു. സ്റ്റെയര്‍ കയറി മുകള്‍ നിലയില്‍ എത്തുന്നത് ഒരു ഫാമിലി ലിവിങ്ങ് ഏരിയായിലേക്കാണ്. ഇവിടെ നിന്നും താഴെ ഡൈനിങ്ങ് ഏരിയായുടെ ഒരു ഭാഗം കാണാവുന്നതാണ്. താഴത്തെ പോലെതന്നെ രണ്ടു ബെഡ്രൂമുകള്‍ മുകളിലും ഒരുക്കിയിരിക്കുന്നു. ഒരു ബാല്‍കണിയും ഉണ്ട്.

കാര്‍പോര്‍ച്ച്,കോര്‍ട്ട്‌യാഡ്, ഡബില്‍ ഹൈറ്റ് ഏരിയ, എന്നിവ ഉള്‍പ്പെടെ 2725 ചതുരശ്രയടി വിസ്തീര്‍ണ്ണമാണ് ഈ വീടിന്റെ ഏരിയ. നിര്‍മ്മാണ്‍ ചിലവ് ചിലവ് 25-31 ലക്ഷം രൂപ വരെ വരാം.

പുത്തന്റെ ഓര്‍മ്മക്ക് ഒരു വര്‍ഷം

2011-02-10T09:05:00.003+03:00

ഗിരീഷ് പുത്തഞ്ചേരി നമ്മെ വിട്ടു പോയിട്ട് ഒരു വര്‍ഷം തികയുന്നു. ഇന്നും മലയാളിയുടെ ചുണ്ടില്‍
പ്രണയത്തിന്റെ മാസ്മരികഭാവങ്ങളും വിരഹത്തിന്റെ കൊടും നീറ്റലുകളും യുവത്വത്തിന്റെ ആവേശങ്ങള്‍ അലതല്ലുന്ന വരികളും അനായാസം നമുക്കായി എഴുതിവച്ച് ആ മഹാനായ കലാകാരന്‍ അവിചാരിതമായ ഒരു നിമിഷത്തില്‍ നമ്മെ വിട്ടകന്നു. പ്രിയപ്പെട്ട ഗിരീഷേട്ടന്റെ ആത്മാവിനു നിത്യശാ‍ന്തി നേരുന്നു.

അമ്മമഴക്കാറിനു കണ്‍‌നിറഞ്ഞു ആ കണ്ണീരില്‍ ഞാന്‍ അലിഞ്ഞു എന്നെഴുതുവാന്‍....പിന്നെയും പിന്നെയും ആരോ കിനാവിന്റെ പടികടന്നെത്തുന്ന പദനിസ്വനം..... ആരൊരാള്‍ പുലര്‍മഴയില്‍...സൂര്യകിരീടം വീണുടഞ്ഞു.....ഇന്നലെ എന്റെ പൊന്‍‌വിള്‍ക്കൂതിയില്ലേ..കാറ്റെന്‍ പൊന്‍‌വിള്‍ക്കൂതിയില്ലേ.... ഹരിമുരളീരവം....അപ്പുക്കുട്ടാ തൊപ്പിക്കാരാ എപ്പകല്യാണം? എന്നൊക്കെ എഴുതുവാന്‍ സര്‍വ്വേശരന്‍ ഇനിയുമൊരു ജന്മം പുത്തനു നല്‍കുമോ?

ത്രീ ബെഡ്രൂം പ്ലാന്‍-3

2011-02-09T13:44:00.002+03:00

ഭൂമിയുടെ ലഭ്യത കുറവും വിലയില്‍ ഉണ്ടയ കുതിച്ചു ചാട്ടവും ചെറിയ പ്ലോട്ടുകളില്‍ വീടുവെക്കുവാന്‍ നിര്‍ബന്ധിതരാകുന്നവരുടെ എണ്ണം വര്‍ദ്ധിച്ചു കൊണ്ടിരിക്കുന്നു. എങ്കിലും സ്റ്റെയര്‍ റൂം ഉള്ളില്‍ നിന്നു നല്‍കുകയും എന്നാല്‍ താഴെ മൂന്ന് ബെഡ്രൂം ഉള്ള വീട് എന്ന സങ്കല്പത്തില്‍ നിന്നും മോചിതരാകുവാന്‍ കൂട്ടാക്കാത്ത പലരും ഉണ്ട്. അത്തരത്തില്‍ ഒരു വീടിന്റെ പ്ലാന്‍ ആണിത്. എന്റെ മറ്റു പല പ്ലാനുകളോടും സാദൃശ്യം ഇതിനും ഉണ്ട്. ഒരു പക്ഷെ ഡിസൈനിന്റെ ശൈലിയും ഉപയോഗിക്കുന്ന ഫര്‍ണ്ണീച്ചറുകളുടെ സാമ്യതയും എല്ലാം കാഴ്ചയില്‍ പ്ലാനുകളുടെ സാദൃശ്യത്തിന്റെ സാധ്യത വര്‍ദ്ധിപ്പിക്കുകയും ചെയ്യുന്നു.

1335 ചതുരശ്രയടി വിസ്തീര്‍ണ്ണമുള്ള ഈ പ്ലാനില്‍ ലിവിങ്ങ് ഡൈനിങ്ങ് രണ്ട് അറ്റാച്ച്ഡ് ബാത്രൂമുകള്‍ ഉള്ള കിടപ്പുമുറികളും കൂടാതെ ഒരു ചെറിയ കിടപ്പുമുറിയും നല്‍കിയിരിക്കുന്നു. സ്റ്റെയര്‍ കേസിനടിയിലാണ് കോമണ്‍ ബാത്രൂമും വാഷും സെറ്റ് ചെയ്തിരിക്കുന്നത്. ഡൈനിങ്ങ് ഏരിയായില്‍ ചെറിയ തോതില്‍ വെന്റിലേഷന്റെ പ്രശ്നം ഉണ്ടായേക്കാം എന്നാല്‍ സ്റ്റെയര്‍ കേസിന്റെ ലാന്റിങ്ങില്‍ വലിയ വിന്റോ കൊടുത്താല്‍ ഡൈനിങ്ങിലേക്ക് കൂടുതല്‍ പ്രകാശം ലഭിക്കും. കിച്ചണില്‍ നിന്നും നോക്കിയാല്‍ ഗേറ്റ് തുറന്ന് കടന്നുവരുന്നവരെ കാണുവാന്‍ പാകത്തില്‍ ഒരു വിന്റോ നല്‍കിയിരിക്കുന്നു.

ഫോര്‍ ബെഡ്രൂം വില്ല

2011-02-01T13:36:00.001+03:00

വീടു നിര്‍മ്മിക്കുവാന്‍ ഒരുങ്ങുമ്പോള്‍ നിലകളെ പറ്റി വ്യത്യസ്ഥമായ കാഴ്ചപ്പാടുകളായിരിക്കും പലര്‍ക്കും ഉണ്ടാകുക. ചിലര്‍ക്ക് താഴെ ഒന്നോരണ്ടോ ബെഡ്രൂം മതി ബാക്കി മുകള്‍ നിലയില്‍ മതി എന്നു പറയുമ്പോള്‍ മുകള്‍ നിലതന്നെ വേണ്ട എന്ന് ചിന്തിക്കുന്നവരും ഉണ്ട്. ഇത്തരത്തില്‍ ഉള്ള കാഴ്ചപ്പാടുകള്‍ സര്‍വ്വസാധാരണമാണ്. നാലു കിടപ്പുമുറികള്‍ ഉള്ള ഒരു ഡിസൈന്‍ ആണിത്. മുകള്‍ നില പിന്നീട് ചെയ്യുകയാണെങ്കില്‍ പ്രയോജനപ്പെടുവാനായി ഉള്ളില്‍ നിന്നും സ്റ്റെയര്‍ കേസ് നല്‍കിയിരിക്കുന്നു.

വരാന്തയില്‍ നിന്നും പ്രധാന വാതില്‍ തുറന്നാല്‍ ഒരു ഫോയറിലേക്കാണ് പ്രവേശിക്കുക. അതിന്റെ ഇടതുവശത്തായി ലിവിങ്ങ് റൂം നല്‍കിയിരിക്കുന്നു. മുന്നിലേക്ക് നടന്നാല്‍ ഡൈനിങ്ങ് കം ഫാമിലി ലിവിങ്ങ് ഏരിയ ആണ്. അത്യാവശ്യം വലിപ്പം ഉള്ള ഈ ഹാളിന്റെ ഒരുവശത്ത് ഡൈനിങ്ങ് ടേബിളിനും മറുവശത്ത് ഇരിക്കുവാനും ഉള്ള സൌകര്യം ഒരുക്കിയിരിക്കുന്നു. ഇവിടെ ഒരു കോര്‍ട്‌യാഡും നല്‍കിയിട്ടുണ്ട്. ഡൈനിങ്ങിനെ വലതു വശത്താണ് അടുക്കളയും യൂടിലിറ്റി ഏരിയായും നല്‍കിയിരിക്കുന്നത്.

ബെഡ്രൂമുകള്‍ രണ്ടു സോണുകളായിട്ടാണ് തിരിച്ചിരിക്കുന്നത്. ഡൈനിങ്ങിന്റെ ഇടതുവശത്ത് രണ്ടു ബെഡ്രൂമുകള്‍ നല്‍കിയിരിക്കുന്നു. മാസ്റ്റര്‍ ബെഡ്രൂമില്‍ ഡ്രസ്സിങ്ങ് ഏരിയ പ്രത്യേകം നല്‍കിയിരിക്കുന്നു. മാസ്റ്റര്‍ ബെഡ്രൂമില്‍ നിന്നും കോര്‍ട്‌യാഡിലേക്ക് വിന്റോകള്‍ നല്‍കിയിരിക്കുന്നു. ഇത് താഴെയും മുകളിലും പ്രത്യേകം പ്രത്യേകം തുറക്കാവുന്ന വിധത്തില്‍ ആക്കിയാല്‍ സ്വകാര്യത നിലനിര്‍ത്തിക്കൊണ്ട് യഥേഷ്ടം തുറന്നിടുവാന്‍ കഴിയും. കോര്‍ട്‌യാഡിന്റെ സൈഡിലൂടെ ഉള്ള പാസ്സേജിലൂടെ മറ്റു രണ്ടു ബെഡ്രൂമുകളിലേക്കും പ്രവേശിക്കാം. ധാരാളം സ്വകാര്യത ഈ രണ്ടു കിടപ്പുമുറികള്‍ക്കും ഉണ്ട്. ഒരു കിടപ്പുമുറിക്ക് അറ്റാച്ച്ഡ് ബാത്രൂം നല്‍കിയിട്ടില്ല. സ്റ്റെയര്‍കേസിന്റെ അടിയിലെ ബാത്രൂം ഇവര്‍ക്ക് ഉപയോഗിക്കാം.

ഗ്രൌണ്ട് ഫ്ലോറില്‍ രണ്ടയിരത്തി നാല്പത്തി നാല് ചതുരശ്രയടിയാണ് ഈ പ്ലാനിന്റെ വിസ്തീര്‍ണ്ണം. ഉപയോഗിക്കുന്ന മെറ്റീരിയത്സ്, ലേബര്‍ ചാര്‍ജ്ജ് എന്നിവ വ്യത്യസ്ഥമായതിനാല്‍ ചിലവിനെ പറ്റി കൃത്യമായി പറയുക ബുദ്ധിമുട്ടാണ്. എങ്കിലും സാധാരണ രീതിയില്‍ ശരാശരി 1100-1250 രൂപ ചതുരശ്രയടിക്ക് കണക്കാക്കാം.

ഗ്രൌണ്ട് ഫ്ലോറില്‍ നാലുകിടപ്പുമുറികള്‍ ഉള്ള പ്ലാനാണിത്.

കെട്ടിടനിര്‍മ്മാണ ചട്ടം പിന്‍‌വലിക്കരുത്

2011-01-25T12:01:00.001+03:00

അതിവേഗം വളര്‍ന്നുകൊണ്ടിരിക്കുന്നതാണ് കേരളത്തിലെ കെട്ടിടനിര്‍മ്മാണ മേഘല. ഉയര്‍ന്ന ജനസാന്ദ്രതയും അതിനെ തുലനം ചെയ്യുമ്പോള്‍ പരിമിതമായ സ്ഥല ലഭ്യതയും ഉള്ള കേരളത്തില്‍ നിര്‍മ്മാണ രംഗത്ത് ചില നിയമങ്ങളും നിയന്ത്രണങ്ങളും അനിവാര്യമാണ്. ഇത്തരം നിയമത്തിന്റെ അനിവാര്യതയെ കുറിച്ച് ഈ രംഗത്തുള്ളവര്‍ ദീര്‍ഘകാലമായി ആവശ്യപ്പെടുന്നതാണെങ്കിലും മുന്‍ കാലങ്ങളില്‍ പല സര്‍ക്കാരുകളും അതിന്റെ ഗൌരവം ഉള്‍ക്കൊള്ളുവാനോ സമഗ്രമായ നിയമങ്ങള്‍ ആവിഷ്കരിച്ച് നടപ്പിലാക്കുവാനോ തയ്യാറായില്ല. ഇതിന്റെ ഫലമായി കേരളത്തില്‍ അശാസ്ത്രീയമായ രീതിയില്‍ ഒട്ടനവധി കെട്ടിടങ്ങള്‍ നിര്‍മ്മിക്കപ്പെട്ടു. റോഡുകള്‍ ഉള്‍പ്പെടെ പൊതു സ്ഥലങ്ങള്‍ കയ്യേറിയും, പാടങ്ങള്‍ നികത്തിയും, കാടും മലയും കൈവശപ്പെടുത്തിയുമെല്ലാം കയ്യൂക്കുള്ളവര്‍ യഥേഷ്ടം നിര്‍മ്മാണങ്ങള്‍ നടത്തി. ഇതിനൊരു തടയെന്നോണം കോര്‍പ്പറേഷനുകള്‍, മുന്‍സിപാലിറ്റികള്‍, ഏതാനും പഞ്ചായത്തുകള്‍ എന്നിവടങ്ങളില്‍ ഒതുങ്ങി നിന്നിരുന്ന കെട്ടിടനിര്‍മ്മാണ ചട്ടം കേരളത്തിലെ മുഴുവന്‍ പഞ്ചായത്തുകളിലേക്കും കൊണ്ടുവന്നത് ഇടതുപക്ഷ സര്‍ക്കാരാണ്. . ചില അപാകതകള്‍ ഉണ്ടെങ്കിലും ഇത്തരം ഒരു നിയമം നടപ്പിലാക്കിയതില്‍ തീര്‍ച്ചയായും സഖാവ്: വി.എസ്. അച്യുതാനന്ദന്‍ നേതൃത്വം നല്‍കുന്ന സര്‍ക്കാര്‍ അഭിനന്ദനം അര്‍ഹിക്കുന്നു.

കെട്ടിടനിര്‍മ്മാണ ചട്ടങ്ങള്‍ നടപ്പില്‍ വന്ന കാലം മുതല്‍ ചില സ്ഥാപിത താല്പര്യക്കാര്‍ ഇതിനെതിരെ മുറവിളികൂട്ടുവാന്‍ തുടങ്ങിയിരുന്നു. ഇതു സംബന്ധിച്ച് ധാരാളം തെറ്റിദ്ധാരണകള്‍ പരത്തുവാനും രാഷ്ടീയമായ മുതലെടുപ്പിനും ശ്രമങ്ങള്‍ ഉണ്ടായി. നിലവിലെ നിയമത്തിലെ അപാകതകള്‍ പരിഹരിക്കുന്നതിനോ കാലോചിതമായും പഞ്ചായത്തുകള്‍ക്കായി പ്രത്യേകം നിമയം കൊണ്ടുവരുവാനും സര്‍ക്കാര്‍ കാണിച്ച അലസത ഇത്തരം പ്രചാരണങ്ങള്‍ക്ക് ആക്കം കൂട്ടി. കൂടാതെ വര്‍ഷങ്ങള്‍ ആയി വീടുവച്ച് താമസിച്ചു വരുന്നതോ നികന്നതും വലിയ മരങ്ങളോടു കൂടിയതോ ആയതും എന്നാല്‍ ആധാരമടക്കം ഉള്ള രേഖകളില്‍ നിലം/വയല്‍ എന്ന് രേഖപ്പെടുത്തിയതുമായ് സ്ഥലങ്ങളില്‍ നിര്‍മ്മാണം നടത്തുവാന്‍ വിഷമങള്‍ നേരിട്ടു. ഇത് വേണ്ടവിധം പരിശോധിച്ച് പരിഹാരം കണ്ടെത്തുവാന്‍ സര്‍ക്കാരിന്റെ ഭാഗത്തുനിന്നും വീഴ്ചയുണ്ടയികേരളം നേരിടുന്ന ഏറ്റവും വലിയ പ്രതിസന്ധികളില്‍ ഒന്ന് ഗതാഗത സൌകര്യങ്ങളുടെ അപര്യാപ്തതയാണ്. ഗ്രാമങ്ങള്‍ അനുദിനം നഗരങ്ങളായി മാറിക്കൊണ്ടിരിക്കുന്നു. ഗതാഗത കുരുക്ക് ഇന്ന് ഗ്രാമങ്ങളിലേക്കും എത്തിക്കൊണ്ടിരിക്കുന്നു. അശാസ്തീയമായ റോഡുനിര്‍മ്മാണവും കെട്ടിടനിര്‍മ്മാണവും ഇതിന്റെ ആക്കം വര്‍ദ്ധിപ്പിക്കും. റോഡിനോട് ചേര്‍ന്നു നടത്തുന്ന നിര്‍മ്മാണ പ്രവര്‍ത്തനങ്ങള്‍ ഭാവിയില്‍ റോഡുവികസനത്തിനു തടസ്സം സൃഷ്ടിക്കും എന്നതില്‍ സംശയമില്ല. ഇതിനായി പിന്നീട് ധാരാളം കെട്ടിടങ്ങള്‍ പൊളിച്ചു നീക്കേണ്ടിവരും. സാമ്പത്തിക നഷ്ടവും, പ്രകൃതിക്കുണ്ടാക്കുന്ന ആഘാതവും മാത്രമല്ല ഇതിന്റെ പേരില്‍ കുടിയിറക്കപ്പെടുന്നവര്‍ അനുഭവിക്കുന്ന മാനസീകവും ശാരീരികവുമായ വിഷമങ്ങളും നാം പരിഗണിക്കെണ്ടിയിരിക്കുന്നു.

ഗ്രാമപഞ്ചായത്തുകളില്‍ നിന്നും അനുമതി ലഭിക്കുവാന്‍ വൈകുന്നു അവിടെ ഉദ്യോഗസ്ഥര്‍ കൈക്കൂലി വാങ്ങുന്നു, ചെറിയ വീടു വെക്കുവാന്‍ പോലും സാധാരണക്കാര്‍ക്ക് ബുദ്ധിമുട്ട് അനുഭവപ്പെടുന്നു എന്നതാണ് കെട്ടിടനിര്‍മ്മാണചട്ടത്തെ എതിര്‍ക്കുന്നവര്‍ ഉന്നയിക്കുന്ന പ്രധാന പ്രശ്നം. അഴിമതി ഒഴിവാക്കുവാന്‍ നിയമം പിന്‍ വലിക്കണം എന്ന് ആവശ്യപ്പെടുന്നത് എത്രമത്രം ബാലിശമാണ്? അതു തടയുവാന്‍ ഇവിടെ സംവിധാനം ഇല്ലെന്ന് പറയുന്നത് തന്നെ ലജ്ജാകരമാണ്. അഴിമതിയുടെ/കൈക്കൂലിയുടെ പേരില്‍ സര്‍ക്കാര്‍ ആശുപത്രികള്‍ അടച്ചിടുമോ? പി.ഡ.ബ്ലിയുഡി റോഡുപണി നിര്‍ത്തുമോ? പോലീസുകാരന്‍ കൈക്കൂലിവാങ്ങുന്നതുകൊണ്ട് പോലീസ് സ്റ്റേഷന്‍ അടച്ചു പൂട്ടുമോ? ആര്‍.ടി.ഓ ഫീസുകളില്‍ കൈക്കൂലി വാങ്ങുന്നു എന്ന് പറഞ്ഞ് അത് അടച്ചിടുമോ? അഴിമതിയുടെ പേരില്‍ ചെക്ക് പോസ്റ്റുകള്‍ ഒഴിവാക്കുമോ? കൃത്യമായി നിയമങ്ങള്‍ പാലിച്ചു കൊണ്ട് തയ്യാറാക്കി നല്‍കുന്ന പ്ലാനുകള്‍ കാരണമില്ലാതെ തിരസ്കരിക്കുവാന്‍ ഒരു ഉദ്യോഗസ്ഥനും കഴിയില്ല. നിയമത്തിലെ അവ്യക്തതകളും വൈരുധ്യങ്ങളുമാണ് അഴിമതിക്ക് സാധ്യതകള്‍ തുറക്കുന്നത്. റോഡില്‍ നിന്നും അതിരില്‍ നിന്നും സമീപ കെട്ടിടങ്ങളില്‍ നിന്നും നിശ്ചിത ദൂരം പാലിക്കുക, മുറികള്‍ക്ക് ആവശ്യാനുസരണം വെന്റിലേഷന്‍ നല്‍കുക, കിണര്‍, കക്കൂസ് ടാങ്കുകള്‍ എന്നിവയ്ക്ക് നിശ്ചിത അകലം തുടങ്ങിയവ പാലിക്കുവാന്‍ പൊതു ജനം ബാധ്യസ്ഥരാണ്.

സാമ്പത്തീക ബാധ്യതയെ പറ്റിയാണ് മറ്റൊരു കാര്യമായി ഉയര്‍ത്തിക്കൊണ്ടുവരുന്നത്. പ്ലാന്‍ പരിശോധിച്ച് അനുമതി നല്‍കുവാന്‍ പഞ്ചായത്തില്‍ നിശ്ചയിച്ചിട്ടുള്ള ഫീസ് വളരെ തുച്ഛമാണ്. കൂടാതെ ഒരു ചതുരശ്രയടിക്ക് കേവലം അമ്പതു പൈസമുതല്‍ ഒന്നര രൂപവരെയാണ് ഇന്ന് ഗ്രാമപ്രദേശങ്ങളില്‍ ലൈസന്‍സ്ഡ് എഞ്ചിനീയേഴ്സ്/സൂപ്പര്‍ വൈസേഴ്സ് ചാര്‍ജ്ജു ചെയ്യുന്നത്. ഒരു ആശാരി വന്നു പ്ലാന്‍ വരച്ച് കുറ്റിയടിക്കുവാന്‍ ആയിരം മുതല്‍ അയ്യായിരം രൂപ ഈടാക്കുമ്പോള്‍ ഈ രംഗത്ത് അടിസ്ഥാന വിദ്യാഭ്യാസം മുതല്‍ എഞ്ചിനീയറിങ്ങ് ബിരുധം ഉള്ളവര്‍ക്ക് ലഭിക്കുന്നത് ആയിരം ചതുരശ്രയടിയുള്ള ഒരു വീടിനു 500-1500 രൂപ വരെ ആണെന്ന് ഓര്‍ക്കുക. തീര്‍ച്ചയായും നിയമം നടപ്പില്‍ വന്നതൊടെ ഈ രംഗത്ത് ആയിരക്കണക്കിനു തൊഴില്‍ രഹിതരാ‍യ ചെറുപ്പക്കാര്‍ക്ക് തൊഴില്‍ ലഭിച്ചു. എന്നാല്‍ അതിനെ എതിര്‍ക്കുന്നവരുടെ കൂട്ടത്തില്‍ വില്ല പ്രോജക്ടിനു പോലും പതിനായിരങ്ങളും ലക്ഷങ്ങളും വങ്ങുന്ന ആര്‍ക്കിടെക്ചര്‍ രംഗത്തുനിന്നും ഉള്ളവരും ഉണ്ടെന്നത് ദൌര്‍ഭ്യാഗ്യകരമായി പോയി. ആര്‍ക്കിടെക്ചര്‍ കംബന്ധിയായ ഒരു മാഗസിനും ഈ നിയമത്തെ എതിര്‍ത്ത് എഡിറ്റോറിയല്‍ എഴുതുകയും പിന്നീട് നിയമം പിന്‍ വലിക്കുവാന്‍ ഉള്ള ആലോചനകളെ പറ്റിയുള്ള പത്രവാര്‍ത്തയടക്കം നല്‍കി അത് തങ്ങളുടെ മുഖലേഖനത്തിന്റെ “ആഘാതം” ആണെന്ന് അഭിമാന പൂര്‍വ്വം പറയുകയും ഉണ്ടായി. അത് വായിച്ചപ്പോള്‍ അക്ഷരാര്‍ഥത്തില്‍ ഞെട്ടല്‍ ആണ് ഉണ്ടായത്.

പരിഷ്കൃത സമൂഹത്തില്‍ കൃത്യമായ ടൌണ്‍ പ്ലാനിങ്ങിനും ശാസ്ത്രീയമായ കെട്ടിടനിര്‍മ്മാണത്തിനും എത്രമാത്രം പ്രാധാന്യം ഉണ്ടെന്ന് മനസ്സിലാക്കാത്തവര്‍ ആകില്ല ആര്‍ക്കിടെക്റ്റുമാര്‍. എന്തോ പ്രത്യേക താല്പര്യമായിരിക്കാം ഇവരെ ഇത്തരം ഒരു നിലപാടിലേക്ക് നയിച്ചത്. മാര്‍ക്കിസ്റ്റു പാര്‍ടി തിരഞ്ഞെടുപ്പില്‍ തോല്‍ക്കുവാന്‍ കാരണം കെട്ടിട നിര്‍മ്മാണചട്ടം ആണെന്ന പ്രചാരണം എത്രമാത്രം ബാലിശമാണ്. തിരഞ്ഞെടുപ്പിന്റെ പരാജയകാരണങ്ങളില്‍ പ്രധാനം പൊട്ടിപ്പൊളിഞ്ഞ റോഡുകളും മറ്റു ഭരണ വൈകല്യങ്ങളുമാണ്. കൂടാതെ ആഗോള സാമ്പത്തിക മാന്ദ്യം, കേന്ദ്ര സര്‍ക്കാരിന്റെ വൃത്തികെട്ട നയങ്ങളുടെ ഭാഗമായുണ്ടായ പെട്രോളിയം ഉല്പന്നങ്ങളുടെ തോന്നിയപോളുള്ള വില വര്‍ദ്ധിപ്പിച്ചത് നിത്യോപയോഗ സാധങ്ങളുടെ കുത്തനെയുള്ള വിലക്കയറ്റം തുടങ്ങിയവയും ഇടതുപക്ഷത്തിനേറ്റ തിരിച്ചടിക്ക് ഒരു പ്രധാനഘടകമായി. ഇനി ഈ നിയമം പിന്‍‌വലിച്ചാല്‍ വരുന്ന തിരഞ്ഞെടുപ്പില്‍ ഇടതുപക്ഷത്തിനു വലിയ ഒരു വിജയം ഉണ്ടാകും എന്ന് പറയുന്നവര്‍ ബുദ്ധിയില്ലായ്മയുടെ രജ്യത്തെ ചക്രവര്‍ത്തിമാരായി സ്വയം വാഴുന്നവര്‍ ആണെന്ന് പറയാതെ വയ്യ. ജനങ്ങളുടെ വികാരം എന്തെന്ന് കഴിഞ്ഞ പാര്‍ളിമെന്റ് തിരഞ്ഞെടുപ്പിലു, പഞ്ചായത്ത് തിരഞ്ഞെടുപ്പിലും വ്യക്തമായി കഴിഞ്ഞു.

കേരളത്തിലെ നിര്‍മ്മാണ മേഘലയില്‍ കോടികളാണ് ഓരോ വര്‍ഷവും നിക്ഷേപിക്കപ്പെടുന്നത്. എന്നാല്‍ ദൌര്‍ഭാഗ്യവശാല്‍ അശാസ്ത്രീയമായതും അന്ധവിശ്വാസങ്ങള്‍ നിറഞ്ഞതുമായ നിരവധി സംഗതികള്‍ അനുദിനം വര്‍ദ്ധിച്ചു കൊണ്ടിരിക്കുകയാണ്. വാളെടുത്തവന്‍ മുഴുവന്‍ വെളിച്ചപ്പാടെന്ന് പറയുന്നതു പോലെ നാലു പെരപണിയുവാന്‍ സിമെന്റ് കൂട്ടിക്കൊടുക്കുന്നവന്‍ പിന്നെ മേസ്തിരിയും കോണ്ട്രാക്ടറുമായി വിലസുന്നു. അവരും “തച്ചുശാസ്ത്രഞ്ജരും” മന്ത്രവാദികളും ചേര്‍ന്ന് നിര്‍മ്മാണരംഗത്തെ നിയന്ത്രിക്കുന്ന ദുരവസ്ഥ ഒരു പക്ഷെ നമ്മുടെ നാട്ടില്‍ മാത്രമേ കാണുവാന്‍ ആകൂ. ഈ നിയമം വന്നതുമൂലം വീടു നിര്‍മ്മിക്കും മുമ്പെ പ്ലാന്‍ എഞ്ചിനീയറിങ്ങ് രംഗത്തുള്ളവരുടെ കൈകളില്‍ എത്തുകയും അതുകൊണ്ട് ധാരാളം പേരുടെ പ്ലാനുകള്‍ മാറ്റിവരക്കപ്പെട്ടിട്ടുമുണ്ട്. ഇനിയും അവനവന്റെ ആവശ്യങ്ങള്‍ ഉള്‍ക്കൊണ്ടുകൊണ്ട് ഡിസൈന്‍ ചെയ്യേണ്ടതിന്റെ ആവശ്യകത മലയാളിക്ക് ബോധ്യം വന്നിട്ടില്ല. പ്രവാസലോകത്ത് കുബ്ബൂസും സബ്ജിയും തിന്ന് കഷ്ടപ്പെട്ടുണ്ടാക്കുന്ന പണം സ്വന്തമായി ഒരു വീടു നിര്‍മ്മിക്കുവാനായി ചിലവിടുന്നവര്‍ക്ക് ലഭിക്കുന്നത് തങ്ങളുടെ ആവശ്യങ്ങള്‍ അല്പം പോലും നിറവേറാത്ത കോണ്‍ക്രീറ്റ് കെട്ടിടമാണ്. ഇതിനൊരു മാറ്റം വരുവാന്‍ ഈ നിയമം അല്പമെങ്കിലും വഴിയൊരുക്കി എന്നുകൂടെ പറയട്ടെ. മാത്രമല്ല പ്ലോട്ട് അളന്ന് അതിര്‍ത്തിയില്‍ നിന്നും നിശ്ചിത ദൂ‍രം വിട്ടു നിര്‍മ്മിക്കുന്നതു കൊണ്ട് പിന്നീട് പല പ്രശ്നങ്ങളും ഒഴിവാക്കുവാനും സാധിക്കും.

ഗ്രാമപഞ്ചായത്തുകള്‍ക്കും ജനപ്രതിനിധികള്‍ക്കും വിപുലമായ അധികാരം ആണ് ഇന്നുള്ളത്. പ്ലാനുകള്‍ പരിശോധിച്ച് നിശ്ചിത ദിവസത്തിനകം തിരിച്ചു നല്‍കുവാനും കൈക്കൂലിയാവശ്യപ്പെടുന്നവര്‍ക്കെതിരെ നടപടിയെടുക്കുവാനും ഇവര്‍ക്ക് ആകും. എന്നാല്‍ ഉദ്യോഗസ്ഥര്‍ അഴിമതി നടത്തുന്നു അത് തടയുവാന്‍ അല്ലെങ്കില്‍ രാഷ്ടീയമായ തിരിച്ചടികാരണം പണ്ടേ കോണ്ടുവരേണ്ടിയിരുന്ന ഒരു നിയമം പിന്‍‌വലിക്കുന്നു എന്നത് ജനങ്ങളോടും ജനാധിപത്യത്തോടും ചെയ്യുന്ന അനീതിയും വെല്ലുവിളിയുമാണെന്ന് വിയപൂര്‍വം പറഞ്ഞുകൊള്ളുന്നു. ഇന്നിപ്പോള്‍ റോഡ് വികസനത്തിനായുള്ള കുടിയൊഴിപ്പിക്കലുകളും അതിനെതിരെ നടക്കുന്ന സമരങ്ങളും പണ്ടുള്ളവരുടെ ദീര്‍ഘവീക്ഷണമില്ലായ്മയുടെ വ്യക്തമായ അടയാളമാണ്. ഇത് മനസ്സിലാക്കുവാന്‍ മടികാണിച്ചും താല്‍ക്കാലികമായ രാഷ്ടീയ ലാഭത്തിനായി ഇന്ന് ഒഴിവാക്കുന്നത് മൂലം നാളെ കേരളത്തിന്റെ വികസനത്ത് വലിയ വെല്ലുവിളികള്‍ക്കും തിരിച്ചടികള്‍ക്കും ഇടവരുത്തും.

അനുദിനം നഗരങ്ങളായി മാറിക്കോണ്ടിരിക്കുന്ന പഞ്ചായത്തുകളില്‍ ജനങ്ങളുടെ ബുദ്ധിമുട്ട് മൂലം കെട്ടിട നിര്‍മ്മാണചട്ടം വേണ്ടെങ്കില്‍ പിന്നെ മുന്‍സിപ്പാലിറ്റികളിലും കോര്‍പ്പറേഷനുകളിലും എന്തിനീ നിയമങ്ങള്‍? ഗ്രാമപ്രദേശങ്ങളിലെ പ്രത്യേകതകള്‍ മനസ്സിലാക്കി അതിനനുസരിച്ച് സമഗ്രമായ കെട്ടിടനിര്‍മ്മാണ ചട്ടം കൊണ്ടുവരികയും അത് കൃത്യമായും അഴിമതിരഹിതമായും നടപ്പിലാക്കുകയും ചെയ്യുക എന്നത് ഭരണകര്‍ത്താക്കളുടെ ചുമതലയാണ്.

ഒരു അപേക്ഷ

2011-01-25T09:29:00.001+03:00

പ്ലാന്‍ വരച്ചു നല്‍കുവാന്‍ ആവശ്യപ്പെട്ടും മറ്റാരെങ്കിലും ഡിസൈന്‍ ചെയ്ത പ്ലാനുകള്‍ പരിശോധിച്ച് തെറ്റുകള്‍ പറഞ്ഞു തരുവാനും ആവശ്യപ്പെട്ടു നിരവധി മെയിലുകള്‍ വരാറുണ്ട്. മറ്റൊരാളുടെ ഡിസൈന്‍ വിലയിരുത്തി അതില്‍ കുറ്റം കണ്ടുപിടിക്കുവാന്‍ തക്ക അര്‍ഹതയോ അറിവോ എനിക്കില്ലെന്ന് വിനീതമായി പറഞ്ഞു കൊള്ളട്ടെ. എങ്കിലും എന്റെ കാഴ്ചപ്പാടില്‍ കാണുന്ന ചിലതൊക്കെ സൂചിപ്പിക്കാറുണ്ടെന്ന് മാത്രം. അത് മറ്റു ഡിസൈനര്‍മാരെ ഇകഴ്ത്തുവാനായി ബോധപൂര്‍വ്വം ചെയ്യുന്നതല്ല. ഞാന്‍ ചെയ്യുന്ന ഡിസൈനിലെ അപാകതകള്‍ മറ്റുള്ളവരുടെ നോട്ടത്തില്‍ പെട്ടെന്നു കണ്ടെത്തുവാന്‍ ആയേക്കും. അതൊരു സാധരണ സംഭവമാണ്.

അത്യാവശ്യം ജോലിത്തിരക്കും കുറച്ച് എഴുത്തും വായനയും പിന്നെ കുടുമ്പകാര്യങ്ങളുമായി കഴിയുന്ന എന്നെ സംബന്ധിച്ച് ഇതിനിടയില്‍ സമയം കണ്ടെത്തിയാണ് ഈ വഹക സഹായങ്ങള്‍ക്ക് നീക്കിവെക്കുന്നത്. പ്ലാനുകള്‍ ആവശ്യപ്പെട്ടോ അല്ലെങ്കില്‍ എന്തെങ്കിലും സഹായങ്ങള്‍ ആവശ്യപ്പെട്ടോ മെയില്‍ വഴി വരുന്ന അന്വേഷണങ്ങളില്‍ മിക്കതിനു മറുപടി നല്‍കുവാന്‍ പരമാവധി ശ്രമിക്കാറുണ്ട്. എന്നാല്‍ ഇത്തരം ആവശ്യവുമായി ബന്ധപ്പെടുന്ന പലരും പിന്നീട് ആ വീടിന്റെ നിര്‍മ്മാണം നടത്തിയോ പൂര്‍ത്തിയാക്കിയോ എന്നു പോലും അറിയിക്കുവാനുള്ള സാമാന്യമര്യാദ കാണിക്കാറില്ല. ഇതൊരു തുടര്‍ച്ചയാകുമ്പോള്‍ തീര്‍ച്ചയായും മാനസീകമായി അല്പം പ്രയാസം ഉള്ള കാര്യമായി മാറുന്നു. എങ്കിലും ചിലരെല്ലാം മറുപടി അയക്കാറില്ലെന്ന് പറയുന്നില്ല. കണ്ണൂരില്‍ ഒരു വീടിന്റെ പണി പൂര്‍ത്തിയാക്കിയ വിവരം സന്തോഷപൂര്‍വ്വം അറിയിച്ചിരുന്നു. അതുപോലെ ആലപ്പുഴയില്‍, തൃശ്ശൂരിലെ ചാവക്കാട് പ്രദേശത്ത് തുടങ്ങിയ ചിലയിടങ്ങളില്‍ നിന്നൊക്കെ ഇത്തരത്തില്‍ മറുപടി ലഭിച്ചിട്ടുണ്ട്. എന്നാല്‍ ഇവര്‍ ആരും വീടുകളുടെ പൂര്‍ത്തിയായ ഫോട്ടോ തരുവാനോ അത് ബ്ലോഗ്ഗില്‍ നല്‍കുവാനോ ഉള്ള സൌമനസ്യം കാണിച്ചില്ല.

വീടിന്റെ ഫൌണ്ടേഷന്റെ ജോലികള്‍ ആരംഭിക്കുന്നതിനു മുമ്പ്തന്നെ ഡിസൈനിനെ പറ്റി വിശദമായ ചര്‍ച്ചകള്‍ നടത്തി അപാകതകള്‍ പരിഹരിക്കുവാന്‍ നോക്കുക. എലിവേഷനും പ്ലാനും രണ്ടല്ലെന്നും അത് ഒരു കെട്ടിടത്തിന്റെ ഡിസൈനിങ്ങില്‍ തുല്യപ്രാധാന്യം ഉള്ള താണെന്നും മനസ്സിലാക്കുക. തറകെട്ടിയതിനു ശേഷം എലിവേഷന്‍ ചെയ്യുന്ന പ്രവണത ഒഴിവാക്കുക.എന്തായാലും എന്റെ ഈ കുഞ്ഞു ബ്ലോഗ്ഗില്‍ നിന്നും വീടു നിര്‍മ്മിക്കുവാനായി പ്ലാനുകള്‍ എടുക്കുന്നു എന്നതിലും എന്റെ അഭിപ്രായങ്ങള്‍ ആരായുന്നു എന്നതും അത്യന്തം സന്തോഷമുള്ള കാര്യമാണ്.

സസ്നേഹം
എസ്.കുമാര്‍

ഈദ് ആശംസകള്‍

2010-11-17T11:41:00.000+03:00

ത്യാഗത്തിന്റെ പ്രതീകമായ ഈ സുദിനത്തില്‍ എല്ലാ വായനക്കാര്‍ക്കും സ്നേഹവും സന്തോഷവും നിറഞ്ഞ ഈദ് ആശംസകള്‍.

മണലില്‍ നിന്നും എം-സാന്റിലേക്ക്

2010-10-03T09:28:00.002+03:00

ഈ ലക്കം ലൈവ് സ്റ്റൈല്‍ ഓണ്‍‌ലൈന്‍ മാഗസിനില്‍ എം.സാന്റിനെ പറ്റി ഞാന്‍ എഴുതിയ ലേഖനത്തിന്റെ ഭാഗങ്ങള്‍ ഇവിടെ നല്‍കുന്നു.
http://malayalamemagazine.com/

മലയാളം ഈ മാഗസിന്‍

2010-10-01T13:38:00.001+03:00

പ്രിപ്പെട്ടവരെ,
http://www.malayalamemagazine.com/ ലൈവ് സ്റ്റൈല്‍ എന്ന പേരില്‍ മലയാളത്തില്‍ ഒരു ഓണ്‍ലൈന്‍ മാഗസിന്‍ ഉള്ള വിവരം അറിയിച്ചു കൊള്ളുന്നു. പ്രമുഖ മാഗസിനുകളോട് കിടപിടിക്കുന്ന രീതിയില്‍ ഉള്ളടക്കം ഒരുക്കുവാന്‍ ശ്രമിച്ചിട്ടുള്ള ഈ മാഗസിന്‍ മറ്റു ഓണ്‍ലൈന്‍ മാഗസിനുകളില്‍ നിന്നും വ്യത്യസ്ഥമായ ഒരു വായനാനുഭവം ആയിരിക്കും ഇതെന്ന് ഞാന്‍ ഉറച്ചുവിശ്വസിക്കുന്നു. http://www.malayalamemagazine.com/LIVEStyle/October%202010/ ഈ ലിങ്ക് വഴി പോയാല്‍ നിങ്ങള്‍ക്ക് അത് വായിക്കുവാന്‍ കഴിയും. സഹകരണം പ്രതീക്ഷിച്ചുകൊണ്ട്
സ്നേഹത്തോടെ
)എസ്.കുമാര്‍

മൂന്നുസെന്റില്‍ ത്രീബെഡ്രൂം വീട്

2010-09-30T16:23:00.002+03:00

ഭൂമിയുടെ ലഭ്യതക്കുറവും, ഉയര്‍ന്ന വിലയും മലയാളിയുടെ സ്വപ്നഗൃഹസങ്കല്‍പ്പങ്ങളെ അനുദിനം ചെറിയ പ്ലോട്ടുകളിലേക്ക് ചുരുക്കിക്കൊണ്ടിരിക്കുന്നു. മൂന്നു സെന്റില്‍ നിര്‍മ്മിക്കപ്പെടുന്ന വീടുകളുടെ എണ്ണം ഇന്ന് വര്‍ദ്ധിച്ചുകൊണ്ടിരിക്കുന്നു. പലപ്പോഴും വീതി കുറഞ്ഞ് നീളം ഉള്ള പ്ലോട്ടുകളാണ് ഇന്ന് ലഭിക്കുന്നത് അധികവും. അത്തരം പ്ലോട്ടുകള്‍ക്ക് അനുയോജ്യമായ ഒരു ഡിസൈന്‍ ആണ് ഇവിടെ കൊടുത്തിരിക്കുന്നത്.

മൂന്നു സെന്റ് വരെ ഉള്ള പ്ലോട്ടുകളില്‍ നിര്‍മ്മിക്കുന്ന കെട്ടിടങ്ങള്‍ക്ക് അതിര്‍ത്തിയില്‍ നിന്നും നല്‍കുന്ന ദൂരത്തെ (ഓഫ്സെറ്റ്) സംബന്ധിച്ച് സംസ്ഥാനത്തെ കെട്ടിടനിര്‍മ്മാണ ചട്ടം അനുശാസിക്കുന്ന അളവുകളില്‍ ഇളവുകള്‍ ഉണ്ട്. മുന്‍ വശത്ത് 200-180 മീറ്ററും, പുറകില്‍ 1 മീറ്ററും വശങ്ങളില്‍ 2.20M. വരെ ഉയരത്തില്‍ വിന്റോ/വെന്റിലേറ്റര്‍ തുടങ്ങിയ ഓപ്പണിങ്ങ് ഇല്ലെങ്കില്‍ അറുപത് സെന്റീമീറ്ററും ആണ് ഓഫ്‌സെറ്റ് നല്‍കേണ്ടത്. അടുത്ത പ്ലോട്ടിന്റെ ഉടമയുടെ അനുമതിയുണ്ടെങ്കില്‍ അതിര്‍ത്തിയോട് ചേര്‍ന്ന് ആ വശത്ത് ഓപ്പണിങ്ങ് ഇല്ലാതെ കെട്ടിടം പണിയാവുന്നതാണ്.

താഴെ സിറ്റൌട്ടില്‍ നിന്നും കയറുന്നത് ലിവിങ്ങ് ആന്റ് ഡൈനിങ്ങ് ഹാളിലേക്കാണ്. വലിപ്പം കുറഞ്ഞ ഫര്‍ണ്ണീച്ചറുകള്‍ ഉപയോഗിച്ചാല്‍ സൌകര്യം തോന്നിക്കും. ഡൈനിങ്ങിന്റെ ഇടതുവശത്തായി സ്റ്റെയര്‍ കേസ് നല്‍കിയിരിക്കുന്നു. സ്റ്റെയര്‍ കേസ് തുടങ്ങുന്നതിന്‍ഉ തൊട്ടുമുമ്പ് ബെഡ്രൂമിലേക്കുള്ള വാതില്‍ നല്‍കിയിരിക്കുന്നു. അറ്റാച്ച്ട് ബാത്രൂമും ഈ കിടപ്പു മുറിക്ക് നല്‍കിയിട്ടുണ്ട്.

സാധാരണ ചെറിയ വീടുകളില്‍ നിന്നും വിഭിന്നമായി കിച്ചണ്‍ അല്പം വലിപ്പം ഉള്ളതാണ് നല്‍കിയിരിക്കുന്നത്. കിച്ചണോട് ചേര്‍ന്ന് ചെറിയ ഒരു യൂടിലിറ്റി ഏരിയായും നല്‍കിയിട്ടുണ്ട്. സ്റ്റെയര്‍ കേസിന്റെ അടിയില്‍ ഒരു കോമണ്‍ ബാത്രൂമും നല്‍കിയിട്ടുണ്ട്.

സ്റ്റെയര്‍ കയറി മുകള്‍ നിലയില്‍ ചെല്ലുന്നത് ഒരു ഹാളിലേക്കാണ്. താഴത്തെ ബെഡ്രൂമിനു മുകളില്‍ അതുപോലെ തന്നെ മുകള്‍ നിലയിലും ബാത് അറ്റാച്ച്ഡ് ആയ ബെഡ്രൂം നല്‍കിയിരിക്കുന്നു. കൂടാതെ കിച്ചണിനു മുകളിലും ഒരു ബെഡ്രൂം നല്‍കിയിട്ടുണ്ട്. യൂടിലിറ്റി ഏരിയ ബാത്രൂമാക്കി മാറ്റിയിരിക്കുന്നു. ഹാളില്‍ നിന്നും ഇറങ്ങാവുന്ന വിധത്തില്‍ ഒരു ബാല്‍കണിയുണ്ട്.

ഇരുനിലകളിലായി മൂന്ന് കിടപ്പുമുറികള്‍ ഉള്ള ഈ വീടിന്റെ മൊത്തം വിസ്തീര്‍ണ്ണം 127.80 ചതുരശ്രമീറ്റര്‍ (1375 ചതുരശ്രയടി) ആണ്. ഗൌണ്ട് ഫ്ലോര്‍ ഏരിയ 67.8 ചതുരശ്രമീറ്റര്‍ (730 ചതുരശ്രയടി)യും മുകള്‍ നില 60.00 ചതുരശ്രമീറ്റര്‍ (645.00 ചതുരശ്രയടി) ആണ്.

ഓണാ‍ശംസകള്‍

2010-08-22T19:49:00.001+03:00

ഓനമെന്നാല്‍ മഹാബലിയെ ചവിട്ടിത്താഴ്ത്തിയ വാമനന്റെ/സവര്‍ണ്ണന്റെ ആധിപത്യത്തിന്റെ ആവര്‍ത്തിച്ചുള്ള അടയാളപ്പെടുത്തലാണെന്ന വീക്ഷണത്തെ തള്ളിക്കളയാം. സവര്‍ണ്ണ അവര്‍ണ്ണ അന്യമത വ്യത്യാസം ഇല്ലാതെ ഒരുമിച്ച് ആഘോഷിക്കേണ്ടതാണ് ഓണം.
സന്തോഷത്തിന്റേയും സമാധാനത്തിന്റേയും ആഘോഷത്തെ നമുക്ക് സന്തോഷത്തോടെ വരവേല്‍ക്കാം.ലോകമെമ്പാടും ഉള്ള മലയാളികള്‍ സന്തോഷത്തോടെ കൊണ്ടോടുന്ന ഈ വേളയില്‍ മുഴുവന്‍ മലയാളികള്‍ക്കും തെച്ചിക്കോട്ടുകാവില്‍ തുടങ്ങുന്ന കേരളത്തിന്റെ ഗജകേസരികള്‍ക്കും എന്റെ ഹൃദയം നിറഞ്ഞ ഓണാശംസകള്‍.

സ്വാതന്ത്ര ദിനാശംസകൾ

2010-08-15T09:31:00.001+03:00

പിറന്ന മണ്ണിന്റെ സ്വാതന്ത്ര്യത്തിനായി ജീവിതം ബലികൊടുത്ത അനേക ലക്ഷം അത്മാക്കൾക്കും, അതിലേറെ പീഠനവും ദുരിതവും സഹിച്ച് ജീവിച്ചു തീർത്ത അവരുടെ ആശ്രതിർക്കും ആദരാഞ്ജലികൾ. ഇന്ത്യൻ മണ്ണിൽ വിനാശത്തിന്റെ വിത്തുവിതയ്ക്കുവാനായി അതിർത്തിയിൽ നുഴഞ്ഞു കയറുന്ന, പലയിടങ്ങളിൽ നിന്നും അവിടേക്കു റിക്രൂട്ട് ചെയ്യപ്പെടുന്ന ഭീകരന്മാർക്കെതിരെ പൊരുതുന്ന വീരജവാന്മാർക്ക് അഭിവാദ്യങ്ങൾ. ഒറ്റുകാരും കൂട്ടിക്കൊടുപ്പുകാരും സാംസ്കാരിക പ്രവർത്തകരുടേയും മനുഷ്യാവകാശ പ്രവർത്തകരുടേയും വേഷമണിഞ്ഞ് ഇന്ത്യയിൽ ഉടനീളം ഇത്തരം ചിദ്രശക്തികളെ ന്യായീകരിക്കുവാൻ അഹോരാത്രം പണിപ്പെടുന്നത് വേദനയോടെ ഞങ്ങൾ തിരിച്ചറിയുന്നു. രാജ്യത്തെ വിറ്റുതുലക്കുന്ന പരമാധികാരം സാമ്രാജ്യത്വത്തിനു ഒപ്പിട്ടുകൊടുക്കുവാൻ സദാ അവസരം പാർത്തിരിക്കുന്ന അതിർത്തിയിൽ കൊടും മഞ്ഞിൽ ശത്രുക്കളോടു പൊരുതുന്ന രാജ്യത്തെ അഹോരാത്രം കാത്തുര‌ക്ഷിക്കുന്ന ധീരജവാന്മാരുടെ ഭക്ഷണത്തിൽ നിന്നു പോലും അഴിമതിയിലൂടെ കോടികൾ സമ്പാദിക്കുവാൻ ഉളുപ്പില്ലാത്ത രാഷ്ടീയക്കാരുടെ ഹിഡൻ അജണ്ടകൾക്കു മുമ്പിൽ ഇന്നല്ലെങ്കിൽ നാളെ നട്ടെല്ലു നിവർത്തിനിന്നു പൂർവ്വസൂരികൾ പോരാട്ടങ്ങളിലൂടെ നേടിത്തന്നതൊക്കെയും കാത്തു സൂക്ഷിക്കുന്ന ഒരു ജനത ഉണർന്നുവരും എന്ന് പ്രത്യാശിക്കാം.

ജാതിയും മതവും നോക്കിയല്ല ഉഗ്രശേഷിയോടെ ബോംബുകൾ മനുഷ്യ ശരീരത്തെ ചിതറിപ്പിക്കുന്നത്. ചോരയും മാം‌സവും കണ്ണീരും രോദനവും കത്തിയമരുന്ന സ്വപ്നങ്ങളും നിറഞ്ഞ ഒരു ഇന്ത്യയെ അല്ല നമുക്ക് വേണ്ടത്, സമത്വത്തോടെ സാഹോദര്യത്തോടെ സർവ്വരും പുലരുന്ന ഒരു ഇന്ത്യയെ ആണ്. മതത്തിന്റെ പേരിൽ പ്രാകൃതമായ ശിക്ഷാവിധികൾ നടപ്പിലാക്കുവാൻ ഉള്ള ഇടമല്ല ഇന്ത്യൻ മണ്ണ്‌. ഇന്ത്യയുടെ നിയമവ്യവസ്ഥയും പരമാധികാരവും അട്ടിമറിക്കുവാൻ ഉള്ള ഏതു ശക്തികളുടെ ശ്രമങ്ങളേയും ജാതിമത ബേധമന്യേ നാം ചെറുത്തു തോല്പിക്കേണ്ടിയിരിക്കുന്നു. പിറന്ന നാടിനേക്കാൾ വലുതല്ല, അവനവൻ ജീവിക്കുന്ന സമൂഹത്തേക്കാൾ വലുതല്ല വരാൻ ഇരിക്കുന്ന സ്വർഗ്ഗങ്ങൾ എന്ന് നമ്മേ ഓർമ്മിപ്പിച്ച മണ്മറഞ്ഞു പോയ ധീര ദേശാഭിമാനികളുടെ ഇന്നും ജ്വലിക്കുന്ന ചിന്തയിൽ നിന്നും വേണം നമുക്ക് ആവേശം കൊള്ളുവാൻ. അല്ലാതെ ഇന്ത്യയ്ക്കെതിരെ പോരാടുവാൻ പറഞ്ഞവരിൽ നിന്നും അല്ല നമുക്ക് മാതൃകകളെ കണ്ടെത്തേണ്ടത്. അത്തരക്കാർക്ക് ഉള്ള ഇടമാകരുത് ഇന്ത്യൻ മണ്ണ്‌.

ജനതയെ ഭിന്നിപ്പിക്കുവാൻ ജാതിയുടേയും മതത്തിന്റേയും പേരിൽ പരസ്പരം സംശയത്തോടെ കാണുവാൻ രോഷത്തിന്റെ/ വിദ്വേഷത്തിന്റെ വിത്തുപാകുന്ന ഇരവാദികളും, സ്വത്വവാദികളും, ഭൂരിപക്ഷ ന്യൂനപക്ഷ വർഗ്ഗീയ വാദികളും അരങ്ങു വാഴുന്ന, അനുദിനം ജീർണ്ണതയിലേക്ക് നീങ്ങുന്ന സാംസ്കാരിക കേരളത്തിന്റെ ദുരവസ്ഥയിൽ വേദനിച്ചുകൊണ്ട്, നല്ല ഒരു തിരിച്ചു വരവ് പ്രതീക്ഷിച്ചു കൊണ്ട് എല്ലാ ഭാരതീയർക്കും സ്വാതന്ത്ര ദിനാശംസകൾ.

വന്ദേ മാതരം.

സമകാലികതയുടെ രൂപങ്ങൾ

2010-07-24T11:35:00.003+03:00

മലയാളിയുടെ ഗൃഹസങ്കൽ‌പ്പങ്ങളിലേക്ക് മോഡേൺ/ സമകാലിക (Contemporary) ഡിസൈനുകൾ കടന്നുവന്നുകൊണ്ടിരിക്കുന്നു. ചരിച്ചു വാർത്ത് ഓടുപതിച്ച് ചാരുപടി പിടിപ്പിച്ചുള്ള “ട്രഡീഷ്ണൽ ടച്ചിന്റെ“ സ്ഥാനത്ത് രൂപത്തിലും നിറത്തിലും എല്ലാം നവീനത പുലർത്തുന്ന വീടുകൾ കേരളത്തിന്റെ വിവിധ ഭാഗങ്ങളിൽ ഇടം പിടിച്ചുകൊണ്ടിരിക്കുന്നു. പുറമേക്കുള്ള കാഴ്ചയ്ക്കപ്പുറം മറ്റു ചില ഗുണങ്ങളും ഇത്തരം ഡിസൈനുണ്ട്. ഡബിൾ ഹൈറ്റും ധാരാളം വെന്റിലേഷൻ സൌകര്യങ്ങളും ഇത്തരം ഡിസൈനുകളിൽ കാണാനാകും. റൂഫിലുള്ള മാറ്റം- ചരിച്ചു വാർത്ത് ഓടുപതിക്കുന്നതിന്റെ- വലിയ ഒരു ചിലവിനെ ഒഴിവാക്കുവാൻ സഹായിക്കുന്നു. (വ്യക്തിപരമായി ഞാൻ ചരിച്ചു വാർത്ത് ഓടു പതിക്കുന്നതിനോട് വിയോജിപ്പുള്ള ആളാണ്. എങ്കിലും ക്ലൈന്റിന്റെ നിർബന്ധത്തിനും താല്പര്യത്തിനു വഴങ്ങി അത്തരം ഡിസൈനുകൾ പലപ്പോഴും ചെയ്യാറുണ്ട്) മരത്തിനു പകരം സ്റ്റീലിന്റെ സാധ്യതകൾ പലതരത്തിലും ഇത്തരം ഡിസൈനുകളിൽ പ്രയോജനപ്പെടുത്താം.

ലിവിങ്ങ് റൂമിനും ഡൈനിങ്ങിനും ഇടയിലെ വലിയ കോർട് യാഡ് തന്നെ ആണ് ഈ വീടിന്റെ ഒരു പ്രത്യേകത. മറ്റൊന്ന് ലിവിങ്ങിന്റെ ഡബിൾ ഹൈറ്റാണ്. വീടിനകത്തെ ഊഷ്മാവ് ക്രമീകരിക്കുന്നതിൽ ഇതിനു വലിയ ഒരു പങ്ക് തന്നെ ഉണ്ട്. കോർട് യാഡിന്റെ വശത്ത് ഇരിക്കുവാനായി ചെറിയ “തിണ്ണ” നൽകിയിരിക്കുന്നു. ബെഡ്രൂമിൽ നിന്നും കോർട് യാഡിലേക്ക് വിന്റോ നൽകിയിരിക്കുന്നു. രാത്രികാലങ്ങളിൽ ഭയമില്ലാതെ അത് തുറന്നിടുവാനും ആകും.
ലിവിങ്ങിലും ഡൈനിങ്ങിലും ടി.വി വെക്കുവാൻ ഉള്ള സൌകര്യം ഉണ്ട്.

മുകൾ നിലയിലെ രണ്ടു ബെഡ്രൂമുകളും എതിർവശങ്ങളിൽ ആയാണ് ക്രമീകരിച്ചിരിക്കുന്നു, അവയ്ക്ക് ബാൽക്കണി നൽകിയിരിക്കുന്നു.ഗ്രൌണ്ട് ഫ്ലോർ കോർട് യാഡ് ഒഴിവാക്കി 1517 ചതുരശ്രയടി വിസ്ത്രെർണ്ണം. ഫസ്റ്റ് ഫ്ലോർ ലിവിങ്ങിന്റ് ഡബിൾ ഹൈറ്റ് ആയതിനാൽ അതിന്റെ പകുതി ഏരിയ അടക്കം 1032 ചതുരശ്രയടിയാണ് ഏരിയ വരുന്നത്.

കേരളത്തിനു പൊള്ളുന്നു.

2010-03-22T21:15:00.003+03:00

സൂര്യതാപത്തിന്റെ തീക്ഷ്ണതയെ പറ്റിയുള്ള സൂചനകള്‍ കേരളത്തിലും എത്തിയിരിക്കുന്നു. പാലക്കാട്ടും,കണ്ണൂരും,തൃശ്ശൂരും എല്ലാം ചിലര്‍ക്കു സൂര്യതാപമേറ്റു പൊള്ളിയതായുള്ള റിപ്പോര്‍ട്ടുകള്‍ വന്നുകഴിഞ്ഞു. സസ്യശ്യാമളമായ നല്ല കാലാവസ്ഥയുള്ള ഒരു ഭൂപ്രകൃതിയെ ചുരുങ്ങിയ കാലം കൊണ്ട്‌ ഉഷ്ണപ്രദേശത്തിനു തുലമായ രീതിയില്‍ നാം "മാറ്റിയെടുത്തു". കാടുകള്‍ക്ക്‌ പകരം കോൺക്രീറ്റ്‌ കാടുകള്‍ കൊണ്ട്‌ ആധുനീകവല്‍ക്കരിച്ചു. ബേക്കറെപോലുള്ള ഋഷിതുല്യനായ ശില്‍പിയുടെ സാന്നിധ്യം ഉണ്ടായിരുന്നിട്ടുപോലും അകവും പുറവും തേചുമിനുക്കിയ വായുവും വെളിച്ചവും പരമാവധി കുറച്ചുകടക്കുന്ന "മോടികൂടിയ" വീടുകള്‍ക്ക്‌ പുറാകെ ആണ്‌ നമ്മുടെ ആളൂകള്‍ പോയത്‌/പോയിക്കൊണ്ടിരിക്കുന്നത്‌. ഓരോ വീടുകളും ഇന്ന് "ഏത്തക്കായ പഴുക്കുവാന്‍ വെക്കുന്ന" കൂടിനു സമാനമാണ്‌. ചുട്ടുപഴുത്ത കോൺക്രീറ്റില്‍ നിന്നും വരുന്ന ചൂടിനെ പ്രതിരോധിക്കുവാന്‍ ആകാതെ വിയര്‍ക്കുകയാണ്‌ മലയാളി. വീടിനകത്തെ ചൂടുകുറക്കുന്നതില്‍ പാരമ്പര്യ വാസ്തുവിന്റെ നല്ല ഒരു മാതൃകയായ നടുമുറ്റം ഒരു വിഭാഗത്തിനു "സവര്‍ണ്ണ ബിംബമായി" എതിര്‍ക്കപ്പെടേണ്ടലിസ്റ്റില്‍ കയറുമ്പോള്‍ മറ്റൊരു വിഭാഗം പാരമ്പര്യ വസ്തുവിന്റെ നല്ല വശങ്ങളെ ഒഴിവാക്കി കാലഘട്ടത്തിനു യോജിക്കാത്ത അളവുകള്‍/കാണക്കുകളൂം അന്ധവിശ്വാസവുമായി കൂട്ടിക്കുഴച്ച്‌ വിപണനസാധ്യത തേടുന്നു . കെട്ടിടത്തിന്റെ ഭംഗിക്കോ,സൗകര്യത്തിനോ പ്രാധാന്യം നല്‍കാതെ ഇക്കൂട്ടര്‍ അനുദിനം നൂറുകണക്കിനു അപനിര്‍മ്മിതികള്‍ക്കാണ്‌ തുടക്കം കുറിക്കുന്നത്‌.

ഉള്ള പ്രകൃതിയെ എപ്രകാരം സംരക്ഷിക്കാം എന്ന് ചിന്തിക്കുന്നതിനുപകരം പ്രകൃതിയുടെ സന്തുലിതാവസ്ഥയെ തകിടം മറിച്ച്‌ പുതിയ ജലവൈദ്യുത പദ്ധതിയ്ക്കായി മുറവിളികൂട്ടുന്നു ചിലര്‍. ഇതിന്റെ ഏറ്റവും ഒടുവിലത്തെ ഉദാഹരണമാണ്‌ അതിരപ്പള്ളി പദ്ധതി.പദ്ധതിവരുന്നതോടെ കേരളത്തിലെ നയാഗ്രയെന്നു വിശേഷിപ്പിക്കാവുന്ന അതിരപ്പിള്ളിവെള്ളച്ചാട്ടവും അതിന്റെ ചുറ്റും ഉള്ള പ്രകൃതിയും കാര്യമായ മാറ്റങ്ങള്‍ക്ക്‌ വിധേയമാകും. അപൂര്‍വ്വമായ ജൈവ വൈവിധ്യങ്ങളും ജന്തുക്കള്‍,പക്ഷികള്‍,ശലഭങ്ങള്‍,ജലജീവികള്‍ എന്നിവയ്ക്കും വംശനാശം സംഭവിക്കും.വനം എന്ന് പറയുമ്പോള്‍ വലിയ മരങ്ങള്‍ മാത്രമല്ല അടിക്കാടെന്ന് അറിയപ്പെടുന്ന ചെറിയ ചെടികളും കൂടെ ഉള്‍പ്പെട്ടതാണ്‌. അവയെ വെട്ടിനശിപ്പിക്കുന്നതും ഒരുതരത്തില്‍ പറഞ്ഞാല്‍ ഭൂമിയുടേ പച്ചപ്പുതപ്പിനെ ഉരിഞ്ഞുമാറ്റലാണ്‌.

ഗ്രീന്‍ മൂന്നാറിനെ ബ്രൗൺമൂന്നാറക്കിയതിനെ പറ്റി ഹൈക്കോടതിയുടെ നിരീക്ഷണം വന്നുകഴിഞ്ഞു. ചരിത്രത്തിലെ ഏറ്റവും ഉയര്‍ന്ന ഊഷ്മാവ്‌ ഈ വര്‍ഷം മൂന്നറില്‍ രേഖപ്പെടുത്തി. മൂന്നാറിന്റെ ഹരിതാഭയില്‍ കളങ്കമായി നിരവധി കോൺക്രീറ്റ്‌ കെട്ടിടങ്ങള്‍ അനധികൃതമായി ഇടം പിടിച്ചുകൊണ്ടിരിക്കുന്നു. സ്വന്തം അധീനതയില്‍ ഉള്ള ഭൂമിയില്‍ സമ്പത്തീക/രാഷ്ടീയ സ്വാധീനം ഇല്ലാത്തവര്‍ ഒരു വീടുവെക്കുവാന്‍ അപേക്ഷണല്‍കിയാല്‍ നിയമവും നിയമപാലകരും പുലര്‍ത്തുന്ന "ജാഗ്രതയുടെ" ആയിരത്തില്‍ ഒരംശം ഉണ്ടായിരുന്നെങ്കില്‍ ഇതു സംഭവിക്കില്ലായിരുന്നു. എന്നാല്‍ നിയമം നടപ്പിലാക്കേണ്ടവരും രാഷ്ടീയക്കാരും ഇക്കൂട്ടര്‍ക്ക്‌ മുമ്പില്‍ ഓച്ചാനിച്ചുനിന്നു, പോരാത്തതിനു ചില വിപ്ലവപാര്‍ട്ടിക്കാര്‍ പാര്‍ട്ടിയോഫീസ്‌ സുഖവസകേന്ദ്രങ്ങളായി മാറ്റിയെടുത്തു മുറികള്‍ വടകക്ക്‌ നല്‍കുന്നു എന്ന് വരെ വാര്‍ത്തകള്‍ വന്നു.ഭരണപ്രതിപക്ഷ ബേധം കയ്യേറ്റങ്ങളില്‍ ഇല്ലെന്ന് വ്യക്തമായി, എന്നാല്‍ അവര്‍ നിര്‍ലജ്ജം ആരോപണ പ്രത്യാരോപണങ്ങള്‍ നടത്തി ജനത്തെ വിഡ്ഡികളാക്കുന്ന പതിവുനാടകങ്ങള്‍ തുടരുന്നു.

വികസനം എന്ന പെരില്‍ കുന്നുകളിടിച്ചുനിരത്തിയും, നെല്‍പാടങ്ങളും,കുളങ്ങളും,തോടുകളും നികത്തിയും അനിയന്ത്രിതമായി മണലൂറ്റിയും പാറപൊട്ടിച്ചും പ്രകൃതിയെ ക്രൂരമായി വേട്ടയാടുന്നു. ഇതിന്റെ ഫലമായി ജലസ്രോതസ്സുകള്‍ വറ്റിവരളുന്നു, കൃഷിയിടങ്ങള്‍ ഇല്ലാതാകുന്നു.ജലസ്രോതസ്സുകളെ അടച്ചുകളഞ്ഞും മലീമസമാക്കിയും ടാങ്കര്‍ ലോറിയിലും, ബോട്ടിലിലും എത്തുന്ന വെള്ളത്തിനായി പണം ചിലവാക്കുവന്‍ മടിയില്ലത്ത സമൂഹമായി മലയാളി മാറി.ശീതീകരണ യന്ത്രങ്ങളുടെ ഏറ്റവും വലിയ വിപണിയാകുവാന്‍ തയ്യാറായിക്കൊണ്ടിരിക്കുന്നു കേരളം.

ഇത്രമാത്രം നിര്‍മ്മാണപ്രവര്‍ത്തനം നടക്കുന്ന ഒരു സംസ്ഥാനം ഇന്ത്യയില്‍ ഉണ്ടാകുമോ എന്ന് സംശയമാണ്‌. ഉയര്‍ന്നുവരുന്ന ഓരോ ബഹുനില കോൺക്രീറ്റ്‌ കെട്ടിടസമുച്ചയങ്ങളും അന്തരീക്ഷതാപനിലയില്‍ വ്യതിയാനം ഉണ്ടാക്കുവാന്‍ പോന്ന ഫാക്ടറികള്‍ ആണ്‌. നിര്‍മ്മാണം പൂര്‍ത്തിയാക്കിയ ആയിരക്കണക്കിനു ഫ്ലാറ്റുകള്‍ ആണ്‌ ഇനിയും ആള്‍താമസം ഇല്ലാതെ കിടക്കുന്നത്‌. ആയിരങ്ങള്‍ അന്തിയുറങ്ങുവാന്‍ പാര്‍പ്പിടാമില്ലാതെ ഇനിയഥവാ ഒരു വീടുനിര്‍മ്മിക്കുവാന്‍ ശ്രമിച്ചാല്‍ ന്യായമായ വിലക്ക്‌ നിര്‍മ്മാണസാമഗ്രികളും തൊഴിലാളികളേയും ലഭിക്കാതെ കഷ്ടപ്പെടുന്ന നാട്‌ടിലാണിതെന്ന് ഓര്‍ക്കണം.

ജലദിനവും,വനദിനവും ആഘോഷിക്കേണ്ടത്‌ പത്രപ്രസ്ഥാവനകളിലൂടെയും,പ്രതിഞ്ജകളിലൂടെയും അല്ല.ഏതെങ്കിലും ഒരു ദിവസം മാത്രം പ്രകൃതിയെ ഓര്‍ക്കുന്നതില്‍ അര്‍ത്ഥമില്ല.പ്രകൃതിസംരക്ഷണം എന്നത്‌ നമ്മുടെ ദൈന്യം ദിന ജീവിതത്തിന്റെ ഭാഗമായി കൊണ്ടുനടക്കേണ്ടതാണ്‌. അനാവശ്യമായി നിര്‍മ്മാണപ്രവര്‍ത്തനങ്ങള്‍ ഒഴിവക്കിയും,ഉള്ള മരങ്ങളെ സംരക്ഷികുന്നതോടൊപ്പം പുതിയവയെ നട്ടുപിടിപ്പിച്ചും, പ്ലസ്റ്റിക്കിന്റെ ഉപയോഗം കുറച്ചും, ഉപയോഗിച്ച ജലത്തെ കൃഷിക്കായും മറ്റും പ്രയോജനപ്പെടുത്തിയും മഴവെള്ളം സംഭരിച്ചുമെല്ലാം നമുക്ക്‌ ഇത്‌ ചെയ്യാവുന്നതാണ്‌.

പ്രകൃതിനല്‍കുന്ന സൂചനയില്‍ നിന്നും ഇനിയും പാഠമുള്‍ക്കൊള്ളാതെ തല്‍ക്കാലം പൊള്ളലേല്‍ക്കാതെ ശീതീകരിച്ച മുറികളില്‍ ഇരുന്ന് സ്ക്രീനിലെ റാണ്മഴയും അല്‍പവസ്ത്രധാരിണികളായി സ്റ്റേഡിയത്തില്‍ താളംചവിട്ടുന്ന ചീയര്‍ഗേള്‍സിന്റെയും പ്രകടനവും കണ്ട്‌ ആത്മനിര്‍വൃതികൊള്ളുമ്പോള്‍ സ്വന്തമായി ഒരു ഐ.പി.എല്‍ ടീമിനായി സാഹസികമായി ചരടുവലി നടത്തിയ മന്ത്രിയെ അഭിനന്ദനങ്ങള്‍കൊണ്ട്‌ മൂടുമ്പൊള്‍ തങ്ങള്‍ക്കു ചുറ്റും ഉള്ള അന്തരീക്ഷത്തില്‍ ഭയാനകമാം വിധം ഉയര്‍ന്നുവരുന്ന താപനിലയെ പറ്റി ഒരുനിമിഷമെങ്കിലും ഓര്‍ക്കുക.

വെളിച്ചം നിറച്ച വീട്‌.

2010-01-30T19:47:00.003+03:00

പ്ലാനിനു കടപ്പാട്‌ മിസ്സിസ്‌.വിനി.എസ്‌ കുമാർ

കാലാവസ്ഥയിൽ വലിയ വ്യതിയാനം സംഭവിക്കുന്ന ഒരു കാലഘട്ടത്തിൽ വീടുപണിയുമ്പോൾ അത്‌ ചെറുതായാലും വലുതായാലും വാസ്തുവിന്റെ ചിട്ടകൾക്കും അളവുകൾക്കും അപ്പുറം കാറ്റും വെളിച്ചവും യഥേഷ്ടം കടന്നുവരിക,ഉള്ള സ്ഥലം പരമാവധിപ്രയോജനപ്പെടുത്തുക എന്നതായിരിക്കണം പ്രാധാന്യം നൽകേണ്ടത്‌.ഈ വീട്ടിൽ ധാരാളം കാറ്റും വെളിച്ചവും കടന്നുവരുവാൻ നിറയെ ജാലകങ്ങൾ നൽകിയിരിക്കുന്നു. (സ്കൈലൈറ്റിന്റെ ഉയർന്ന നിർമ്മാണ ചിലവു മൂലം അത്‌ ഒഴിവാക്കിയിരിക്കുന്നു)

വരാന്തയിലേക്ക്‌ പടികൾ കയറുന്നിടത്തുതന്നെ ലിവിങ്ങിലേക്കുള്ള വാതിൽ കൊടുത്തിരിക്കുന്നതിനാൽ ഭാക്കി ഭാഗത്ത്‌ ഇരിക്കുവാൻ സൗകര്യം ലഭിക്കുന്നു. ലിവിങ്ങിൽ "C" ആകൃതിയിൽ ഇരിപ്പിട സംവിധാനം ഒരുക്കിയിരിക്കുന്നു. ഡാ‍ീനിങ്ങിലേക്ക്‌ കടക്കുമ്പോൾ ഇടതുഭാഗത്തായി ചെറിയ ഒരു സ്റ്റഡി ഏരിയ. തൊട്ടടുത്തായി മുളികേക്കുള്ള സ്റ്റെയർകേസ്‌ നൽകിയിരിക്കുന്നു.മാസ്റ്റർ ബെഡ്‌റൂമിൽ ഒരു ചെറിയ ഷെൽഫ്‌ നൽകിക്കൊണ്ട്‌ സ്റ്റെയർകേസിന്റെ അടിഭാഗം വളരെ ക്രിയാത്മകമായി പ്രയോജനപ്പെടുത്തിയിരിക്കുനു. സ്റ്റെയറിന്റെ വശത്തായി ഡൈനിങ്ങ്‌ റൂമിൽ നിന്നും കാണാവുന്ന വിധത്തിൽ ടി.വി സജ്ജീകരിച്ചിരിക്കുന്നു. ഡൈനിങ്ങ്‌ റൂമിൽ ഡൈനിംഗ്‌ ടേബിളിനെ കൂടാതെ ഇരിക്കുവാനായി ജനലിനോടു ചേർന്ന് സീറ്റിങ്ങും കൊടുത്തിരിക്കുന്നു. ഇതിനോട്‌ ചേർന്ന് വാഷ്‌ ഏരിയായും ചെറിയ ഒരു ടോയ്‌ലറ്റും നൽകിയിരിക്കുന്നു.

അടുക്കളയിൽ C ആകൃതിയിൽ കൗണ്ടർ നൽകിയിരിക്കുന്ന അടുക്കളയിൽ ഒരു ചെറിയ ബ്രേക്ക്ഫാസ്റ്റ്‌ കൗണ്ടറും ചെയറും നൽകിയിരികുന്നു. ഇവിടെ ഫ്രിഡ്ജും,സ്റ്റൗ/ഓവൻ,സിങ്ക്‌ തുടങ്ങി എല്ലാ സൗകര്യങ്ങളും ഒരുക്കിയിരിക്കുന്നു. ചുറ്റും ഓവർഹെഡ്‌ ക്യാമ്പിനറ്റുകൾ നകുന്നതിനുപകരം ഫ്രിഡ്ജ്‌ ഇരിക്കുന്ന വശത്തെ ചുമരിൽ മാത്രം നൽകിയിരിക്കുന്നു.പലപ്പോഴും കിച്ചണിൽ മൂന്നു ചുവരിലും ക്യാബിനറ്റുകൾ നൽകാറുണ്ട്‌,ഇത്‌ ഒരു പരിധിവരെ അനാവശ്യമാണെന്ന് മാത്രമല്ല കിച്ചണ്ടെ വലിപ്പത്തെ കുറച്ചുകാണിക്കും.കിച്ചണ്‌പ്പുറത്തായി യൂടിലിറ്റി ഏരിയായും നൽകിയിട്ടുണ്ട്‌.വാഷിങ്ങ്‌ മേഷീൻ ഇവിടെ ആണ്‌ വച്ചിരിക്കുന്നത്‌. പുകയില്ലാത്ത ഒരു അടുപ്പ്‌ ഈ ഏരിയായിൽ ക്രമീകരിച്ചിരിക്കുന്നു.

താഴത്തെ നിലയിൽ രണ്ട്‌ കിടപ്പുമുറികൾ ആണ്‌ ഉള്ളത്‌. രണ്ടുബെഡ്‌റൂമുകളിലും ബാത്‌റൂമുകളിലേക്ക്‌ കടക്കുന്നത്‌ ഡ്രസ്സിങ്ങ്‌ ഏരിയായിലൂടെ ആണ്‌.

സ്റ്റെയർക്കേസ്‌ കയറി മുകൾ നിലയിലേക്ക്‌ ചെല്ലുന്നത്‌ ഒരു ഫാമിലി ലിവിംഗ്‌ ഏരിയായിലേക്കാണ്‌.ഇതിന്റെ ഒരു ഭാഗത്ത്‌ ടി.വി വെച്ചിരിക്കുന്നു, എതിർവ്വശത്തായി ഒരു ചെറിയ ലൈബ്രറിയും ഒരുക്കിയിരിക്കുന്നു.ഇവിടെ താഴത്തെ നിലയിലെ സ്റ്റഡി ഏരിയായുടെ മുകളിലും ഡൈനിംഗ്‌ ഏരിയായുടെ കോർണറിലുമായി രണ്ട്‌ കട്ടൗട്ടുകൾ ഉണ്ട്‌.ഈ കട്ടൗട്ടുകൾ ഇരുനിലകളേയും തമ്മിൽ വേർത്തിരിക്കുന്നതിനെ ഒഴിവാക്കുന്നതോടൊപ്പം യഥേഷ്ടം വായുസഞ്ചാരത്തിനും ഉപകരിക്കുന്നു.

മുകൾ നിലയിൽ രണ്ടു ബെഡ്‌റൂമുകൾ ആണ്‌ ഉള്ളത്‌. ഇവിടെയും അറ്റാച്ച്ഡ്‌ ബാത്‌റൂമും ഡ്രസ്സിംഗ്‌ ഏരിയായും നൽകിയിരിക്കുന്നു. ഇതുകൂടാതെ ഒരു ബാൽകണിയും ഉണ്ട്‌. (കിച്ചണു മുകളിലെ ബെഡ്‌റൂമിൽ നിന്നും യൂടിലിറ്റിയുടെ മുകൾ ഭാഗത്തുവരുന്ന ഏരിയായിൽ വേണമെങ്കിൽ ഒരു ബാൽക്കണികൂടെ നൽകാവുന്നതാണ്‌) ഫാമിലി ലിവിങ്ങിൽ നിന്നും പുറകുവശത്തെ ഓപ്പൺ ടെറസ്സിലേക്ക്‌ കടക്കുന്നിടത്തെ വാതിൽ പുറത്തേക്കാണ്‌ തുറക്കുന്നത്‌.ഇത്‌ പ്രത്യേകരീതിയിൽ സുരക്ഷാക്രമീകരണങ്ങളോടെ ചെയ്യണം,മാത്രമല്ല താഴ ഫ്ലോറിൽ നിന്നും പത്ത്‌ സെന്റീമീരറ്റർ ഉയർത്തി അവിടെ കോൺക്രീറ്റ്കൊണ്ട്‌ ഒരു പടി വക്കുന്നത്‌ മഴവെള്ളം അകത്തെക്ക്‌ അടിച്ചുകയറാതിരിക്കുവാൻ ഉപകരിക്കും.

ഇരുനിലകളിലുമായി കാർപ്പോർച്ചടക്കം ഏകദേശം 2374 ചതുരശ്രയടിയാണ്‌ ഏരിയ.

പ്ലാൻ -39

2009-12-19T13:33:00.004+03:00

മുൻപ്‌ പ്രസിദ്ധീകരിച്ച പ്ലാനുകളിൽ ചിലതിനോട്‌ വളരെ സാമ്യം ഉള്ള ഒന്നാണിത്‌.എങ്കിലും ചെറിയ വീടിന്റെ പ്ലാൻ എന്ന നിലയിൽ ഇതുകൂടെ ഉൾപ്പെടുത്തുന്നു.

താഴെ ഒരു സിറ്റൗട്ടും,ലിവിങ്ങും,ഡൈനിങ്ങും,കോമൺ ബാത്‌റൂമും,കിടപ്പുമുറിയും ആണ്‌ ഉള്ളത്‌. കിച്ചൺ ഓപ്പൺ ആണ്‌.കിച്ചണിനും ഡൈനിങ്ങിനും ഇടയിൽ ഉള്ള കൗണ്ടർ അൽപം ഉയരം കൂടുതൽ നൽകിയിരിക്കുന്നു.ലിവിംഗ്‌ ഡബിൾ ഹൈറ്റ്‌ ആണ്‌ നൽകിയിരിക്കുന്നത്‌. കോണികയറി മുകൾ നിലയിൽ എത്തിയാൽ ഒരു ലിവിംഗ്‌ ഏരിയായും, ഒരു വശത്തായി സ്റ്റഡി ഏരിയ നൽകിയിരിക്കുന്നു.സ്റ്റഡി ഏരിയായ്ക്ക്‌ മുമ്പിലായി താഴത്തെ ലിവിങ്ങിനെ മുകൾഭാഗത്ത്‌ സ്ലാബ്‌ ഒഴിവാക്കിയിരിക്കുന്നു (ഡബിൾ ഹൈറ്റ്‌). മുകൾ നിലയിൽ ബാത്ത്‌ അറ്റാച്ച്ഡ്‌ സൗകര്യങ്ങളോടുകൂടിയ രണ്ട്‌ കിടപ്പുമുറികൾ ആണ്‌ ഉള്ളത്‌.

തഴത്തെനില 826 ഉം മുകളിലേ നില 752 (ഡബിൾ ഹൈറ്റിനായി സ്ലാബ്‌ ഒഴിവാക്കിയ ഏരിയ കുറച്ചിരിക്കുന്നു) ചതുരശ്രയടിയുമാണ്‌ വിസ്തീർണ്ണം. കെട്ടിടനിർമ്മാണ ചട്ടം നിരബന്ധമായും നിശ്ചിത ദൂരം വശങ്ങളിൽ ഒഴിവാക്കിയിടുവാൻ നിരബന്ധിക്കുന്നു. അതിനാൽ ടെമ്പററി റൂഫിംഗ്‌ സിസ്റ്റം ഉപയോഗിച്ച്‌ കാർപ്പോർച്ച്‌ നിർമ്മിക്കാവുന്നതാണ്‌ (കണിശമായി നോക്കിയാൽ ഇതും ഒരു പക്ഷെ ചട്ടവിരുദ്ധമായേക്കാം).

പ്ലാൻ 36

2009-10-04T18:41:00.003+03:00

പ്ലാനിനു കടപ്പാട്‌ Mrs.വിനി.എസ്‌.കുമാർ

കാറ്റും വെളിച്ചവും വീടിനകത്ത്‌ യഥേഷ്ടം കടന്നുപോകുവാൻ ഉള്ള സൗകര്യം ഉണ്ടോ എന്നതിനപ്പുറം വാസ്തുവിന്റെ പേരിൽ പ്രചരിക്കുന്ന അളവുകളുടേയും മൂലാദോഷങ്ങളുടേയും അർത്ഥമില്ലായ്മകളിൽ പിടിച്ചുതൂങ്ങാതിരിക്കുക എന്നതാണ്‌ ഈ ഡിസൈനിൽ അനുവർത്തിച്ചിരിക്കുന്ന മാനദണ്ടം.അന്തരീക്ഷതാപനില അനുദിനം വർദ്ധിച്ചുവരുന്ന ഒരു കാലഘട്ടത്തിലൂടെ കടന്നുപോകുമ്പോൾ വീടിനു ചുറ്റും പറ്റുമെങ്കിൽ അകത്തും ചെടികൾ ധാരാളം വച്ചുപിടിപ്പിക്കുകയും വീടിനകത്തുള്ള ചൂടുവായു പുറത്തുപോകുവാനും പുറത്തുനിന്നും തണുത്തവായു അകത്തുകടക്കുവാനും ഉള്ള സാധ്യതകൾ വർദ്ധിപ്പിക്കുകയും ആയിരിക്കണം പ്രധാനമായും ശ്രദ്ധിക്കേണ്ട കാര്യങ്ങൾ.

ഗേറ്റുകടന്നുവരുമ്പോൾ ഇടതുവശത്തായി കാർപ്പോർച്ച്‌ നൽകിയിരിക്കുന്നു. മുൻവശത്തെ സിറ്റൗട്ടിൽ കയറുന്നത്‌ ഡബിൾ ഹൈറ്റിൽ ഉള്ള ലിവിങ്ങിലേക്കാണ്‌. ലിവിങ്ങിനും ഡൈനിങ്ങിനും ഇടയിൽ ഉള്ള വാളിൽ (50x150) വലിപ്പത്തിൽ ഓപ്പണിങ്ങ്‌ കൊടുത്തിരിക്കുന്നു.ഈ ഓപ്പണിങ്ങിൽ ഹോറിസോണ്ടലായി ഗ്ലാസ്‌ പിടിപ്പിച്ച്‌ തട്ടുകളായി തിരിച്ചാൽ അതിനകത്ത്‌ "ക്യൂരിയോസ്‌" വെക്കാം.മുകളിൽ നിന്നും സ്പോട്‌ ലൈറ്റ്‌ നൽകുകയും ആകാം.

ലിവിങ്ങിൽ നിന്നും കടക്കുന്നത്‌ ഒരു ചെറിയ സ്റ്റഡി ഏരിയായിലേക്കാണ്‌.ഇവിടെ നിന്നും ഡൈനിങ്ങിലേക്കും രണ്ടുബെഡ്‌റൂമുകളിലേക്കും പ്രവേശിക്കാം,ര ണ്ടുബെഡ്‌റൂമുകളും അറ്റാച്ച്ഡ്‌ ബാത്‌റൂമും വാർഡ്രോബും നൽകിയിരിക്കുന്നു.കുട്ടികൾ സ്റ്റഡി ഏരിയായിൽ പഠിക്കാൻ ഇരിക്കുമ്പോൾ വീട്ടുകാർക്ക്‌ അവരുടെ പഠനകാര്യങ്ങളിൽ കൂടുതൽ ശ്രദ്ധിക്കുവാൻ അവസരം ലഭിക്കും. സ്റ്റഡി ഏരിയായുടെ മുമ്പിലായി നടുമുറ്റത്തിനു പകരമായി ഒരു ചെറിയ "ഗാർഡൻ" നൽകിയിരിക്കുന്നു. ലിവിങ്ങിൽനിന്നും സ്റ്റഡി ഏരിയായിൽ നിന്നും അതുപോലെ ഒരു ബെഡ്‌റൂമിൽ നിന്നും ഉള്ള ജനലുകൾ ഈ ഗാർഡനിലേക്ക്‌ തുറക്കാവുന്ന വിധത്തിൽ ആണ്‌ നൽകിയിരിക്കുന്നത്‌.വായുസഞ്ചാരത്തിനു ഇത്‌ കൂടുതൽ പ്രയോജനപ്പെടും.

ഡൈനിങ്ങിൽ നിന്നും മുകളിലേക്ക്‌ സ്റ്റെയർക്കേസും അതിനു കീഴെ ഒരു കോമൺ ടോയ്‌ലറ്റും നൽകിയിരിക്കുന്നു.വാഷ്ബേസിൽ ഈ ടോയ്‌ലറ്റിൽ ആണ്‌ നൽകിയിരിക്കുന്നത്‌. ഡൈനിങ്ങിൽ നിന്നും നേരെ കിച്ചണിലേക്ക്‌ പ്രവേശിക്കാം. ധാരാളം കാറ്റും വെളിച്ചവും കടന്നുവരാവുന്ന രീതിയിൽ ആണ്‌ കിച്ചൺ ക്രമീകരിച്ചിരിക്കുന്നത്‌, കിച്ചണിൽ നിന്നു നോക്കിയാൽ ഗേറ്റ്‌ കടന്നുവരുന്നവരെ കാണാം എന്നൊരു സൗകര്യം കൂടെ ഉണ്ട്‌. മീഡിയം സൈസ്‌ ഉള്ള കിച്ചണിൽ ഒരു ചെറിയ ബ്രേക്ക്‌ ഫാസ്റ്റ്‌ കൗണ്ടറും ഒരുക്കിയിരിക്കുന്നു. കിച്ചണിൽ മുഴുവൻ ചുവരിലും ക്യാബിനറ്റ്‌ നൽകുന്നതിനുപകരം രണ്ടുചുവരുകളിൽ മാത്രം നൽകിയിരിക്കുന്നു. കിച്ചണിലെ ചുവരുകളിൽ മുഴുവൻ ക്യാബിനറ്റ്‌ നൽകുന്നത്‌ കിച്ചന്റെ വലിപ്പം കുറവുതോന്നിക്കുവാൻ ഇടയാക്കുന്നു. അനാവശ്യമായി സ്റ്റോറേജ്‌ നൽകുന്നത്‌ ചിലവു വർദ്ധിക്കുന്നതിനും ഇടയാകുന്നു എന്നത്‌ പലപ്പോഴും വീടുനിർമ്മിക്കുന്നവർ ശ്രദ്ധിക്കാതെ പോകുന്നു. ഇക്കാര്യത്തിൽ സ്ത്രീകൾ ആണ്‌ പലപ്പോഴും ധാരാളം സ്റ്റോറേജ്‌ സ്പേസ്‌ വേണം എന്ന് പറഞ്ഞ്‌ "കുഴപ്പം" ഉണ്ടാക്കുന്നത്‌.

ഡൈനിങ്ങ്‌ റൂമിൽ നിന്നും ഉള്ള സെറ്റയർ വഴി മുകളിൽ എത്തിയാൽ അവിടെ ഒരു ഫാമിലി ലിവിങ്ങ്‌ ഏരിയായാണ്‌. ഇവിടെ നിന്നും താഴേക്ക്‌ നോക്കിയാൽ ലിവിങ്ങ്‌ ഏരിയ കാണാം.ഇവിടെ ടി.വി വെക്കുവാൻ ഒരു ചെറിയ പ്രോജക്ഷൻ നൽകിയിരിക്കുന്നു. മുകളിൽ ലൈബ്രറി ആവശ്യമില്ലാത്തവർക്ക്‌ അവിടെ ഒരു ബാൽക്കണി നൽകാവുന്നതാണ്‌. (ഈ ഡിസൈനിൽ ബാൽക്കണിയില്ല). മുകൾനിലയിലും രണ്ടുബെഡ്‌റൂമുകൾ നൽകിയിരിക്കുന്നു.രണ്ടുബെഡ്‌റൂമുകളും എതിർദിശകളിൽ ആയതിനാൽ വേണ്ടത്ര സ്വകാര്യതയും ലഭിക്കും.

Ground floor 1567 ചതുരശ്രയടിയും First floor 902 ചതുരശ്രയടിയും ചേർന്ന് മൊത്തം 2469 ചതുരശ്രയടിയാൺ ഈ വീടിന്റെ വിസ്തീർണ്ണം.

എല്ലാ വായനക്കാർക്കും പെരുന്നാൾ ആശംസകൾ.....

2009-09-20T11:03:00.001+03:00

മനസ്സിൽ നന്മയും പ്രാർത്ഥനയും നിറഞ്ഞ വ്രതവിശുദ്ധിയുടെ മുപ്പതു നാളുകൾ കഴിഞ്ഞിതാ ചെറിയ പെരുന്നാൾ ആഗതമായിരിക്കുന്നു.എല്ലാ വായനക്കാർക്കും സ്നേഹവും സന്തോഷവും സമാധാനവും നിറഞ്ഞ പെരുന്നാൾ ആശംസകൾ.....

ഒരുനേരം പോലും വയറുനിറയെ ഭക്ഷണം കഴിക്കാതെ ജീവിക്കുന്ന അനേകകോടി ദരിദ്രരുടെ നാട്ടിൽനിന്നും വരുന്ന, സുഭിക്ഷമായി മൂന്നുനേരം ആഹാരം കഴിക്കുന്ന എന്നെപ്പോലെയുള്ളവർ ആഹാരം ഉപേക്ഷിച്ച്‌ ജീവിക്കുമ്പോൾ ഒരു വേള അവരെ ഓർത്തുപോകുന്നു....കന്നുകാലിക്ലാസിനെ പറ്റിയറിയാതെ അന്നന്നത്തെ വിശപ്പടക്കുവാൻ കുഞ്ഞുങ്ങളെ പോലും വിൽക്കുവാൻ വിധിക്കപ്പെട്ട ആ ജനകോടികൾ അനുഭവിക്കുന്ന പീഠനങ്ങൾക്ക്‌ എന്നെങ്കിലും അറുതിയുണ്ടാകണേ എന്ന പാർത്ഥനയോടെ..............ഒരിക്കൽ കൂടെ എല്ലാവർക്കും പെരുന്നാൾ ആശംശകൾ..

മൂന്നുസെന്റിൽ ഒരു കുഞ്ഞു വീട്‌

2009-09-01T22:34:00.002+03:00

നഗരങ്ങൾ ഗ്രാമങ്ങളിലേക്ക്‌ വളർന്നതോടെ ഭൂമിയുടെ ലഭ്യത കുറയുകയും വില വലിയതോതിൽ വർദ്ധിക്കുകയും ചെയ്തതോടെ പുതുതായി വീടുവെക്കുവാൻ ഒരുങ്ങുന്നവർക്കും അത്‌ ഡിഡൈൻ ചെയ്യുന്നവർക്കും വെല്ലുവിളികൾ വർദ്ധിച്ചു. ചെറിയ ഇടങ്ങളിൽ പരമാവധി സൗകര്യങ്ങൾ ഉൾക്കൊള്ളിക്കുവാൻ മികച്ച ഡിസൈനർമാർ എപ്പോഴും ശ്രദ്ധവെക്കുന്നു. ഒരു നല്ല ഡിസൈനറെ സംബമ്ന്ധിച്ച്‌ സ്ഥലപരിമിതിയുടെ വെല്ലുവിളികളെ അതിജീവിച്ചുകൊണ്ട്‌ ഡിസൈൻ ചെയ്യുമ്പോൾ ഇതിനൊരു വെല്ലുവിളിയുയർത്തുക "വാസ്തു വിദഗ്ദരുടെ" ചില അളവുകളും സ്ഥാനങ്ങളും ആയിരിക്കും.ഇതിൽ അപ്രായോഗികവും അന്ധവിശ്വാസം മാത്രമായതുമായ കാര്യങ്ങൾ അവഗണിക്കുകയാണെങ്കിൽ അൽപം വിശ്വാസം ഉള്ളവർക്കുപോലും തങ്ങളുടെ ആഗ്രഹങ്ങൾക്കനുസരിച്ച്‌ ഒരു കുഞ്ഞുവീടൊക്കെ ഒരുക്കാം.

ഭൂനിരപ്പിൽ നിന്നും പതിനഞ്ചുസെന്റീമീറ്റർ ഉയരത്തിൽ ആണ്‌ പോർച്ച്‌. ഇരുചക്രവാഹനം സൂക്ഷിക്കുവാൻ ഒരു ചെറിയ പോർച്ചായും അതേസമയം ഇത്‌ ഒരു സിറ്റൗട്ടായും ഇത്‌ ഉപയോഗിക്കപ്പെടാം. ലിവിങ്ങ്‌ ഏരിയായിൽ നിന്നും മുകളിലേക്കുള്ള സ്റ്റെയർക്കേസ്‌ നൽകിയിരിക്കുന്നു.സ്റ്റെയർക്കേസ്‌ വുഡ്ഡും,സ്റ്റീലും ചേർത്ത്‌ ലളിതമായി നൽകാവുന്നതാണ്‌.ഇതിനപ്പുറത്തായി ഒരു ചെറിയ ഡൈനിങ്ങ്‌ ഏരിയായും തുടർന്ന് ഓപ്പൺ കിച്ചണും നൽകിയിരിക്കുന്നു.കിച്ചണിന്റെ ഒരു ഭാഗത്തായി സ്റ്റോറേജ്‌ ഏറിയയും നൽകിയിട്ടുണ്ട്‌.കിച്ചണിൽ നിന്നും പുറത്തേക്ക്‌ കടന്നാൽ യൂടിലിറ്റി ഏരിയായും ടോയ്‌ലറ്റും. ടോയ്‌ലറ്റിൽ ഒരു ചെറിയ പ്ലാറ്റ്ഫോം കൊടുത്താൽ അതിൽ വാഷിങ്ങ്‌ മേഷീൻ വെക്കാം.(ഇങ്ങനെ ചെയ്യുമ്പോൾ നനവു തട്ടി ഷോക്കടിക്കുവാൻ ഉള്ള സാധ്യതയെ കുറിച്ച്‌ ജാഗ്രത വേണം)ഡൈനിങ്ങിന്റെ ഒരു ഭാഗത്തായി വാഷ്ബേസിനും ബാത്‌റൂമും അവിടെനിന്നും ഒരു ബെഡ്‌റൂമിലേക്കുള്ള വാതിലും. 764 ചതുരശ്രയടിയാണ്‌ താഴത്തെ നിലയിൽ ഉള്ളത്‌.

സ്റ്റെയർ കയറിചെല്ലുമ്പോൾ ഫസ്റ്റ്ഫ്ലോറിൽ ഒരു ചെറിയ ലിവിങ്ങ്‌ ഏരിയയാണ്‌.അതിന്റെ ഇടതുവശത്തായി ഒരു ചെറിയ സ്റ്റഡി ഏരിയ.അവിടെ നിന്നും രണ്ടു ബെഡ്‌റൂമുകളിലേക്കുള്ള ഡോറുകൾ കൊടുത്തിരിക്കുന്നു. ഒരു ബെഡ്‌റൂം അറ്റാച്ച്ഡും മറ്റൊന്നിനോട്‌ ചേർന്ന് കോമൺ ബാത്‌റൂമും നൽകിയിരിക്കുന്നു. 652 ചതുരശ്രയടിയാണ്‌ വിസ്തീർണ്ണം. അൽപം ശ്രദ്ധയോടെ ഇന്റീരിയർ ഒരുക്കിയാൽ വലിപ്പക്കുറവിനെ ഒരു പരിധിവരെ അതിജീവിക്കാം.വലിപ്പത്തിനും ബെഡ്‌റൂമിന്റെ എണ്ണത്തിനുമപ്പുറം സ്നേഹവും സന്തോഷവും സമാധാനവും നിറഞ്ഞ ജീവസ്സുറ്റ ഒരു വീടിന്റെ ഉടമയാകുക എന്നതാണ്‌ ഏറ്റവും പ്രധാനം.

മൂന്നടിമണ്ണിന്റെ കഥയെ ഒരിക്കൽ കൂടെ ഓർമ്മിപ്പിക്കുന്ന പൊന്നൊണത്തിന്റെ നാളിൽ മുഴുവൻ വായനക്കാർക്കുമായി ഈ മൂന്നുസെന്റിലെ വീടിന്റെ പ്ലാൻ സമർപ്പിക്കുന്നു....എല്ലാ വായനക്കാർക്കും എന്റെ ഓണാശംശകൾ.

അഭിനയക്കരുത്തിന്റെ പുലിജന്മത്തിനു പ്രണാമം.

2009-08-07T10:37:00.000+03:00

മനസ്സിൽ നിറയുന്നത്‌ അപ്പുമേസ്തിരിയോ,കൊച്ചുരാമനോ,കാരിഗുരുക്കളോ, ടി.കെയോ അല്ല മറിച്ച്‌ ബഹ്‌റൈൻ മലയാളിസമാജത്തിൽ കാഴ്ചക്കാർക്ക്‌ മുമ്പിൽ അഭിനയത്തിന്റെ അപാരസാധ്യതകളെ വെളിവാക്കിക്കൊണ്ട്‌ നിറഞ്ഞാടിയ ലങ്കാലക്ഷ്മിയിലെ രാവണനെ.ശ്രീജിതനായ രാവണൻ!!

കാലം പ്രതിഭകളെ ഒന്നൊന്നായി കവർണ്ണെടുക്കുന്നത്‌ നിസ്സഹായരായി നോക്കിനിൽക്കുന്ന കലാസ്നേഹികൾക്ക്‌ മറ്റൊരു കനത്ത നഷ്ടം കൂടെ, ഭരത്‌ മുരളി.അരങ്ങിലും അഭ്രപാളിയിലും, പുരുഷ സൗന്ദര്യത്തിന്റെ മാസ്മരിക പ്രകടനം കാഴ്ചവച്ച താരജാഡകൾക്കും തിളക്കങ്ങൾക്കും എന്നും അന്യമായ രീതിയിൽ ഒരു യദാർത്ഥകലാകാരനായി ജീവിച്ച ആ മനുഷ്യൻ.ഒരു കമ്യൂണിസ്റ്റ്‌.

ഒടുവിൽ ജീവിതത്തിന്റെയും അഭിനയത്തിന്റേയും ചമയവും ചായക്കൂട്ടും അഴിച്ചുവച്ച്‌ അപ്രതീക്ഷിതമായ ഒരു നിമിഷത്തിൽ കടന്നുപോയ അഭിനയക്കരുത്തിന്റെ പുലിജന്മത്തിനു പ്രണാമം.

ധീരജവാന്മാർക്ക്‌ അഭിവാദ്യങ്ങൾ.

2009-07-26T08:45:00.000+03:00

പിറന്ന മണ്ണിന്റെ സംരക്ഷണത്തിനായി കാർഗിലിൽ പൊരുതി വീരമൃത്യുവരിച്ച ജവാന്മാർക്ക്‌‌ ആദരാഞ്ജലികളും,ഒപ്പം ഇന്ത്യയുടെ അഭിമാനം ഉയർത്തിപ്പിടിച്ച വീരന്മാരായ ജവാന്മാർക്ക്‌ ഒരിക്കൽ കൂടെ അഭിവാദ്യങ്ങൾ.മത തീവ്രവാദത്തിന്റെ കടുത്ത യാദാർത്ഥ്യങ്ങളിലൂടെ കടന്നുപോകുന്ന നമ്മുടെ നാടിനെയും അവിടത്തെ ജനതയേയും തീവ്രവദികളിൽ നിന്നും ശത്രുക്കളിൽനിന്നും രക്ഷിക്കുവാൻ ജീവൻ ബലിനൽകുവാൻ തയ്യാറി പൊരുതുന്ന ഓരോ പട്ടാളക്കാരനും കുടുമ്പത്തിനും ഒപ്പം ആകണം ഓരോ ഭാരതീയരും.

സമൂഹത്തിൽ ബോംബ്‌ സ്ഫോടനം നടത്തിയും കൂട്ടക്കുരുതിനടത്തിയും അരക്ഷിതാവസ്ഥ സൃഷ്ടിക്കുന്ന മത തീവ്രവാദിയുടെ മനുഷ്യാവകാശത്തെ കുറിച്ചു സംസാരിക്കുന്ന ഒറ്റുകാർക്കൊപ്പം ഇടം കണ്ടെത്തുവാൻ രാജ്യസ്നേഹമുള്ള ഒരു പൗരനും ആകില്ല. മനുഷ്യാവകാശമെന്നത്‌ സമാധാനപരമായ ജീവിതം നയിക്കുന്ന മനുഷ്യനു മാത്രം അവകശപ്പെട്ടതാണ്‌ അല്ലാതെ കൊടും പാതകം ചെയ്യുന്ന ഭീകരന്മാർക്കും അവരുടെ പിണിയാളുകൾക്കും അവകാശപ്പെട്ടതല്ല.

അഭിവാദ്യങ്ങളോടെ.

മഴക്കാലവും നിർമ്മാണപ്രവർത്തനവും.

2009-07-02T16:36:00.002+03:00

മഴക്കാലത്ത്‌ പൊതുവെ നിർമ്മാണപ്രവർത്തനങ്ങൾ കുറവാണ്‌.ഈ സമയത്ത്‌ പൊതുവെ പുറമേയുള്ള ജോലികൾ ചെയ്യുക ബുദ്ധിമുട്ടുള്ള കാര്യമാണ്‌.നിർമ്മ്മാണ ജോലിയിൽ ഏർപ്പെടുന്നവരുടെ സുരക്ഷ മഴക്കാലത്ത്‌ പ്രത്യേകം ഉറപ്പുവരുത്തേണ്ടണ്ട്‌. മഴകൊണ്ട്‌ ജോലി ചെയ്യുന്നവരുടെ സ്പീഡ്‌ കുറവായിരിക്കും എന്ന് മാത്രമല്ല മഴവെള്ളം മൂലം സിമെന്റും മണലും മറ്റും ഒലിച്ചുപോകുവാനും,കെട്ടിടഭാഗങ്ങൾ ഇടിഞ്ഞുവീഴുവാനും,അത്‌ കെട്ടിടത്തിന്റെ ഉറപ്പിനെ ബാധിക്കുകയും ചെയ്യും.

മഴകഴിഞ്ഞിട്ടു ജോലികൾ ആരംഭിക്കാമെന്ന് കരുതുന്ന പലരും ഉണ്ട്‌.എന്നാൽ പലപ്പോഴും മഴകഴിയുന്നതോടെ ധാരാളം നിർമ്മാണപ്രവർത്തനങ്ങൾ ഒരുമിച്ച ആരംഭിക്കും ഇതോടെ ജോലിക്കാരെ കിട്ടുക പ്രയാസമാകും അതിനാൽ കെട്ടിടത്തിനകത്തെ പ്ലാസ്റ്ററിങ്ങ്‌, പ്ലംബിങ്ങ്‌, ടെയിൽസ്പതിക്കൽ,സ്റ്റെയർക്കേസിന്റെ ഹാന്റ്‌ റൈയിൽ ഫിക്സ്‌ ചെയ്യൽ തുടങ്ങി പല ഇന്റീരിയൽ വർക്കും തീർക്കുവാൻ ഈ സമയത്തെ ഉപയോഗിക്കുന്നത്‌ നന്നായിരിക്കും.

മഴമാറിയിട്ട്‌ വീടുനിർമ്മാണം തുടങ്ങുവാൻ ആഗ്രഹിക്കുന്നവർ ഇപ്പോഴേ പ്ലാൻ തയ്യാറാക്കലും അതിന്റെ അപ്രൂവലുകളും പൂർത്തിയാക്കിവെക്കുന്നത്‌ നല്ലതാണ്‌. കെട്ടിടനിർമ്മാണ ചട്ടം കേരളത്തിൽ എല്ലായിടത്തും ബാധകമാണെന്നതിനാൽ നിർമ്മാണപ്രവർത്തനം നടക്കുന്ന പ്രദേശത്തെ തദ്ദേശസ്വയംഭരണ സ്ഥാപനത്തിൽ നിന്നും മുൻകൂട്ടി അനുമതിവങ്ങിക്കേണ്ടത്‌ അത്യാവശ്യമാണ്‌.ലോൺ സംബന്ധിയായ കാര്യങ്ങൾ തീർക്കുന്നതിനും ഈ സമയം വിനിയോഗിക്കാം.കരിങ്കല്ല് പോലെ മഴക്കാലത്ത്‌ വിലകുറയുന്ന നിർമ്മാണസമഗ്രികൾ ഇപ്പോൾ ശേഖരിക്കുന്നതും ചിലവുചുരുക്കുവാൻ സഹായകമായിരിക്കും.

മഴക്കാലത്ത്‌ കോൺക്രീറ്റിങ്ങ്‌ പരമാവധി ഒഴിവാക്കുക.അപ്രതീക്ഷിതമായുണ്ടാകുന്ന മഴയിൽ സിമന്റ്‌ ഒലിച്ചുപോകുവാൻ ഇടവന്നാൽ അത്‌ കെട്ടിടത്തിന്റെ ഉറപ്പിനെ ബാധിക്കും.കോൺക്രീറ്റിങ്ങ്‌ നടത്തുകയാണെങ്കിൽ അതിനു മേളിൽ പോളീത്തീൻ ഷീറ്റോ മറ്റോ ഉപയോഗിച്ച്‌ മഴവെള്ളം വീഴാതിരിക്കുവാൻ ആവശ്യമായ പരിരക്ഷ നൽകുക.

മര ഉരുപ്പടികൾ സൂക്ഷിച്ച്‌ വക്കുമ്പോഴും ഫിക്സ്‌ ചെയ്യുമ്പോൾ വളരെയധികം ശ്രദ്ധിക്കുക. ഈർപ്പം വലിച്ചെടുത്ത്‌ അവ വികസിച്ചിരിക്കുന്ന സമയം ആണിത്‌.അതു പരിഗണിക്കാതെ ഉണങ്ങാത്ത മരം ഉപയോഗിച്ച്‌ ഉരുപ്പടികൾ നിർമ്മിച്ചാലും ഫിക്സ്‌ ചെയ്താലും പിന്നീട്‌ പല കോട്ടങ്ങളും സഹിക്കേണ്ടിവരും.

അത്യാവശ്യമില്ലെങ്കിൽ സിമെന്റും,കമ്പിയും മഴക്കാത്ത വാങ്ങി സൂക്ഷിക്കതിരിക്കുക. തുരുമ്പെടുത്ത കമ്പികൾ കോൺക്രീറ്റിങ്ങിനു ഉപയോഗിക്കാതിരിക്കുക.

പണിപൂർത്തിയാകതെ കിടക്കുന്ന സെപ്റ്റിക്‌ ടാങ്ക്‌ ഉണ്ടെങ്കിൽ അത്‌ മൂടിയിടുക.വെള്ളം കെട്ടിനിന്ന് അതിൽ കൊതുകു പെരുകുവാൻ ഇടവരും എന്നതുമാത്രമല്ല അബദ്ധത്തിൽ മനുഷ്യരോാ മൃഗങ്ങളോ അതിൽ വീഴുന്നതിനും ഉള്ള സാധ്യതകൾ തള്ളിക്കളയുവാനാകില്ല.

പൊതുവെ ഇലക്ട്രിക്കൽ വർക്കുകൾ, പ്ലാസ്റ്ററിങ്ങ്‌,ടെയിൽസ്‌ പതിക്കൽ തുടങ്ങിയ പലകാര്യങ്ങളും മഴക്കാലത്താണ്‌ നടത്താറുള്ളത്‌.എന്നാൽ എത്‌ വളരെ ശ്രദ്ധയോടെ വേണം നടത്തുവാൻ.കെട്ടിടത്തിനകത്ത്‌ റ്റ്യൂബ്‌ലൈറ്റ്‌/ഫ്ലൂറസന്റ്‌ ലൈറ്റ്‌ കൊടുത്ത്‌ ജോലിചെയ്യുന്നവർക്ക്‌ ആവശ്യമായ വെളിച്ചം ഉറപ്പുവരുത്തുക. പ്ലാസ്റ്ററിങ്ങ്‌ ചെയ്യുന്നതിനുമുമ്പായി ആ പ്രതലത്തിലേക്ക്‌ മഴവെള്ളം ഒലിച്ചിറങ്ങില്ലെന്നും അവിടേ ആവശ്യത്തിൽ അധികം ഈർപ്പം ഇല്ലെന്നും ഉറപ്പുവരുത്തുക.അതുപോലെ ഫ്ലോറിങ്ങ്‌ തറയിൽ ഈർപ്പത്തിന്റെ അളവും അവിടേക്ക്‌ മഴവെള്ളം ഒഴുകിവരുന്നതിനോ കെട്ടിനിൽക്കുന്നതിനൊ സാധ്യത ഇല്ലെന്നും ഉറപ്പുവരുത്തേണ്ടതുണ്ട്‌.അന്തരീക്ഷത്തിൽ ഈർപ്പമുണ്ടെന്ന് കരുതി പ്ലാസ്റ്റർ ചെയ്തിടത്ത്‌ ആവശ്യത്തിനു വെള്ളം നനക്കുവാൻ മറക്കരുത്‌.

പ്ലാസ്റ്ററിങ്ങ്‌ ചെയ്യ്മ്പോൾ കൃത്യമായ അനുപാതത്തിൽ സിമെന്റും മണലും ചേർക്കുക. നിലവാരമില്ലാത്ത സിമെന്റോ,ഉപ്പുകലർന്നമണ്ണാ ഉപയോഗിക്കാതിരിക്കുക. നമ്മുടെ നാട്ടിൽ പലപ്പോഴും ചുറ്റുപാടിൽ നിന്നും എടുക്കുന്ന "തരിമുഴുപ്പില്ലാത്ത" മണ്ൺ ഉപയോഗിച്ച്‌ പ്ലാസ്റ്റർ ചെയ്യുന്ന പതിവുണ്ട്‌.ഇത്‌ ഭാവിയിൽ ചുമരിൽ വിള്ളലുകൾ വീഴുന്നതിനും അതുപോലെ പ്ലാസറ്ററിങ്ങ്‌ അടർന്നുപോരുന്നതിനും ഇടയാക്കും. വീടുനിർമ്മിക്കുവാൻ കോൺട്രാക്ടറെ പൂർണ്ണമായും എൽപ്പിക്കുമ്പോൾ ഇക്കാര്യങ്ങളിൽ ശ്രദ്ധിക്കുന്നത്‌ നല്ലതായിരിക്കും.

ഇലക്ട്രിക്കൽ&പ്ലംബിങ്ങ്‌ വർക്കുകൾ പ്ലാസ്റ്ററിങ്ങ്‌/ടെയിൽ ഫിക്സിങ്ങ്‌ വർക്കുകൾ എന്നിവ ചെയ്യുന്ന ജോലിക്കാർ തമ്മിൽ ചെയ്യാൻ പോകുന്ന ജോലിയെസംബന്ധിച്ച്‌ ഒരു ധാരണ ഉണ്ടാക്കുന്നത്‌ അനാവശ്യമായ കുത്തിപ്പൊളികൾ ഒഴിവാക്കുവാൻ നല്ലതാണ്‌.

മലയാളിയുടെ ഹൃദയതൂലിക നിലച്ചു..

2009-06-28T19:18:00.004+03:00

ഹൃദയത്തിന്റെ തൂലികകൊണ്ട്‌ പച്ചമനുഷ്യന്റെ ജീവിതത്തിലെ പ്രണയവും, പ്രതികാരവും,പ്രതീക്ഷയും,നിരാശയും,ദുഃഖവും എല്ലാം നമുക്കായി പകർന്നുതന്നിരുന്ന ആ കലാകാരൻ നിനച്ചിരിക്കാത്ത ഒരു നിമിഷത്തിൽ കണ്ണീർപ്പൂവിന്റെ കവിളിൽ തലോടി മറുവാക്കുകേൾക്കാൻ കാത്തുനിൽക്കാതെ എങ്ങോ മറഞ്ഞു.....എന്നും തന്റെ പ്രേക്ഷകർക്കായി കരുതിവെച്ച നന്മയുടേയും സ്നേഹത്തിന്റേയും കഥകളുടെ പാഥേയം പാതിവഴിയിൽ തൂവിപ്പോയിരിക്കുന്നു...

സ്വന്തം മനസ്സിന്റെ മൂശയിലേക്ക്‌ മനുഷ്യജീവിതങ്ങളെ ഉരുക്കിയൊഴിച്ച്‌ കഥപറയുവാൻ നമുക്കൊരു ലോഹിതദാസേ ഉണ്ടായിരുന്നുള്ളൂ. ആകലാകാരന്റെ ആത്മാവിനു ശാന്തിനേർന്നുകൊണ്ട്‌ അശ്രുപൂക്കൾ അർപ്പിക്കുന്നു.

ത്രീ ബെഡ്രൂം വീട്‌.

2009-05-24T16:11:00.005+03:00

കയറിവരുന്നത്‌ സിറ്റൗട്ടിലേക്ക്‌, സിറ്റൗട്ടിൽ നിന്നും ഒരു കടക്കുന്നത്‌ ഫോയറിലേക്ക്‌, അവിടെ ഒരു ചെറിയ ഇരിപ്പിടം ഒരുക്കിയിരിക്കുന്നു.അതിന്റെ ഇരുവശത്തുമായി ഒരു ലിവിങ്ങ്‌ റൂം നേരെ ഡൈനിങ്ങ്‌ റൂം. (ടി.വി സൗകര്യപ്രദമായ രീതിയിൽ ഡൈനിങ്ങ്‌ റൂമിലോ ലിവിങ്ങ്‌ റൂമിലോ വെക്കാവുന്നതാണ്‌. )ലിവിങ്ങ്‌ റൂമിനേയും ഡൈനിങ്ങ്‌ റൂമിനേയും ബന്ധിപ്പിച്ചുകൊണ്ട്‌ ഒരു വലിയ കോർട്ട്‌യാഡ്‌. കോർട്ട്യഡിനു മേലെ വിലങ്ങനെ കോൺക്രീറ്റ്‌ ബീമോ ഗ്രില്ലോ നൽകി സുരക്ഷ ഉറപ്പാക്കാം. വായുസഞ്ചാര സുഗമമാക്കുവാൻ കോർട്ട്യാഡിൽ നിന്നും പുറത്തേക്ക്‌ ചുമരിൽ ഗ്യാപ്പ്‌ നൽകിയിരിക്കുന്നു.ഇതിൽ സ്റ്റീലിന്റെ ഗ്രില്ല് ഘടിപ്പിച്ചിട്ടുമുണ്ട്‌. മേൽക്കൂര വാർക്കുമ്പോൾ 330 സെന്റീമീരോ അതിലും അധികമോ ഉയരത്തിൽ ആക്കിയാൽ കൂടുതൽ നന്ന്. വീടിനകത്തെ ചൂട്‌ ക്രമീകരിക്കുവാൻ ഇതു വളരെയധികം സഹായിക്കും.

തുടർന്ന് ഡൈനിംഗ്‌ റൂമിന്റെ മുന്നിലും വലതുവശത്തായി മൂന്നു ബെഡ്രൂമുകൾ.ബെഡ്രൂമുകൾകിൽ രണ്ടെണ്ണത്തിനു അറ്റാച്ച്ഡ്‌ ബാത്രൂമുകൾ നൽകിയപ്പോൾ ഒരെണ്ണത്തിനു സമീപത്തായി കോമൺ ബാത്രൂം നൽകിയിരിക്കുന്നു.ഡൈനിങ്ങ്‌ റൂമിൽ നിന്നും കിച്ചണിലേക്ക്‌ നേരിട്ടു പ്രവേശിക്കാം.അതിനകത്ത്‌ കുടുമ്പാംഗങ്ങൾക്ക്‌ ഇരുന്നു ഭക്ഷണം കഴിക്കുവാൻ ഉള്ള സൗകര്യവും ഉണ്ട്‌.കിച്ചണിലെ റഫ്രിജറേറ്റർ,വാഷ്ബേദിൻ,അടുപ്പ്‌ എന്നിവയടങ്ങുന്ന വർക്കിങ്ങ്‌ ട്രയാങ്കിളിന്റെ ദൂരം കുറച്ചിരിക്കുന്നു.ഇതുമൂലം ഇവിടെ ജോലിചെയ്യുന്നവർക്ക്‌ ആയാസം കുറയും. അതിനു പുറകിലായി ഒരു യൂട്ടിലിറ്റി ഏരിയ.വാഷിങ്ങ്‌ മെഷീനും,പുകയില്ലാത്ത അടുപ്പും മറ്റും ഇവിടെ ആണ്‌ ക്രമീകരിച്ചിരിക്കുന്നത്‌.

ഭാവിയിൽ മുകളിൽ മുറികൾ ഏടുക്കാൻ തക്ക സൗകര്യത്തിൽ ഡൈനിങ്ങ്‌ റൂമിനോടു ചേർന്ന് ഒരു സ്റ്റെയർക്കേസും കൊടുത്തിരിക്കുന്നു. ഇതിന്റെ അടിഭാഗത്തായിട്ടാണ്‌ കിടപ്പുമുറിയിലെ വാഡ്രോബ്‌ ക്രമീകരിച്ചിരിക്കുന്നത്‌.കോർട്ട്‌യാഡ്‌ ഒഴിവാക്കിയാൽ (156.00 മീറ്റർ സ്വ്കയർ) 1678 ചതുരശ്രയടി വിസ്തീർണ്ണം വരും ഈ പ്ലാനിന്‌.മുറികൾക്ക്‌ വാസ്തു അളവുകൾ അല്ല നൽകിയിരിക്കുന്നത്‌.

ചൂടുകുറക്കുവാൻ-1

2009-04-21T15:05:00.009+03:00

വേനലിന്റെ കൊടും ചൂടിനെക്കുറിച്ച്‌ നമുക്ക്‌ നല്ല നിശ്ചയമാണ്‌. നമ്മുടെ നാട്ടിൽ കോൺക്രീറ്റ്‌ മേൽക്കൂരകളോടു കൂടിയ വീടുകൾ വർദ്ധിച്ചതോടെ വീടിനകത്തെ ചൂട്‌ ഒരു വില്ലനായി മാറിയിരിക്കുന്നു.രാത്രികാലങ്ങൾ ഉഷ്ണം മൂലം സ്വസ്ഥമായ ഉറക്കം പലർക്കും അസാധ്യമായി. ടെറസ്സിൽ വൈക്കോൽ,ഓല തുടങ്ങിയവ ഇട്ടും ചിലർ ചെടികൾ വച്ചും ഒരു പരിധിവരെ ഇതിനു പരിഹാരം തേടുന്നു. ഇന്നിപ്പോൾ ഭൂരിഭാഗം വീടുകൾക്കു മീതെയും ചോർച്ചതടയുവാൻ ട്രസ്സ്‌ വച്ച്‌ അതിനു മുകളിൽ ഷീറ്റിടുന്നതുകൊണ്ട്‌ മുറിക്കകത്തെ ചൂടിനു അൽപം കുറവ്‌ ഉണ്ട്‌.

സാമ്പത്തീകമായി മുന്നിട്ടുനിൽക്കുന്ന പലരും എ.സിയിലേക്ക്‌ വഴിമാറിയെങ്കിലും സാധാരണക്കാരനെ സംബന്ധിച്ച്‌ ഫാനിനെ മാത്രം ആശ്രയിച്ച്‌ മുന്നോട്ടുപോകുകതന്നെയേ തൽക്കാലം പറ്റുകയുള്ളൂ. ഫാനിന്റെ ഒരു പ്രശ്നം അടച്ചിട്ട മുറിയിൽ നിന്നും ചൂടുവായ്‌ പുറത്തേക്ക്‌ പോകുവാൻ ഉള്ള സൗക്ര്യം കുറവണെങ്കിൽ ഉള്ളിലെ ചൂട്‌ വർദ്ധിക്കും എന്നുള്ളതാണ്‌. ഉഷ്ണം കൂടുതൽ ഉള്ള ചിലയിടങ്ങളിൽ നിന്നുംകണ്ട രണ്ടു സംവിധാനങ്ങൾ ഞാനിവിടെ പരിചയപ്പെടുത്തുന്നു.

1.മുറിയുടെ മൂലയിൽ നിന്നും പുറത്തേക്ക്‌ പോകുന്ന ഒരു ലോഹ കുഴൽ. ഇത്‌ തകരം,നാഗം തുടങ്ങിയവയുടെ ഷീറ്റ്‌ ചുരുട്ടിയെടുത്ത്‌ ഉണ്ടാക്കാവുന്നതാണ്‌.ഇതിനു കറുത്ത പെയ്ന്റടിക്കുന്നതായിരിക്കും നല്ലത്‌.ഇരുമ്പിന്റെ ഫ്രെയ്മിൽ ഇതിനെ പാരപ്പെറ്റിനോട്‌ ബന്ധിപ്പിക്കുക.കാറ്റത്ത്‌ ഉലയാതിരിക്കുവാൻ സ്റ്റേവയറുകൾ കൊടുക്കുന്നതും നന്ന്. ചുരുങ്ങിയത്‌ രണ്ടരമീറ്ററെങ്കിലും ഉയരം വേണം ഇതിന്‌.ഇതിന്റെ മുകൾ അറ്റത്തും താഴെയും ചെറിയ ഇരുമ്പ്‌ നെറ്റ്കൊണ്ട്‌ അടക്കുന്നത്‌ പ്രാണികളും എലിപോലുള്ള ക്ഷുദ്രജീവികളും വരുന്നതിനെ തടയുവാൻ നല്ലതാണ്‌. ഇതിന്റെ മുകൾ അറ്റത്ത്‌ മഴവെള്ളം കത്ത്‌ വരാതിരിക്കുവാൻ ഒരു "തൊപ്പി" (സിമന്റ്‌ ചട്ടി അകമഴ്ത്തി) സ്ഥാപിക്കുക. കുഴലിന്റെ വ്യാസം വർദ്ധിക്കും തോറും മുറിക്കകത്തെ ചൂടുള്ള വായു പുറത്തേക്ക്‌ പോകുന്നതിനുള്ള സാധ്യത വർദ്ധിക്കും.കൂടാതെ ഇതിന്റെ കീഴറ്റത്ത്‌ എക്സോസ്റ്റ്‌ ഫാൻ ഫിറ്റുചെയ്യുന്നതും നല്ലതാണ്‌.
1.ക്യാപ്‌ - സിമന്റ്‌ ചട്ടി ഇതിനായി ഉപയോഗിക്കാം.
2.ക്യാപിനെ കുഴലിനു മുകളിൽ ഉറപ്പിച്ച്‌ നിർത്തുവാൻ ഉള്ള ഫ്രെയ്ം.
3.കുഴൽ-നാഗം,അലുമിനിയം തുടങ്ങി ഏതെങ്കിലും ലോഹ ഷീറ്റിൽ ചുരുട്ടിയെടുത്ത കുഴൽ.ഇതിന്റെ അകത്തും പുറത്തും കറുപ്പ്‌ നിറമുള്ള പെയ്ന്റടിക്കുക.
4.ഇരുമ്പ്‌ നെറ്റ്‌- ഇത്‌ പ്രാണികളും,എലിപോലുള്ള ക്ഷുത്രജീവികളും അകത്തുവരാതെ സംരക്ഷിക്കുന്നു.

5.കുഴലിനെ ബിത്തിയിൽ ഉറപ്പിക്കുന്നതിനുള്ള ടൈ.

2.ഇതു വീടു നിർമ്മിക്കുമ്പോൾ തന്നെ ചെയ്യേണ്ടതാണ്‌.അടുക്കളക്ക്‌ ചിമ്മിനി നൽകുന്നതുപോലെ ഒരു സംവിധാനം തന്നെയാണിതും. മുറിയുടെ മൂലയിൽ കോൺക്രീറ്റ്‌ ചെയ്യുന്ന സമയത്തുതന്നെ മുൻ കൂട്ടി നിശ്ചയിച്ച അളവിൽ ഒരു ഭാഗത്ത്‌ ചിത്രത്തിൽ കാണിച്ച പോലെ കോൺക്രീറ്റ്‌ ഒഴിവാക്കുകയും ആവശ്യ്മായ വലിപ്പത്തിൽ ചെറിയ ഒരു " ബീം" ഉണ്ടാക്കുകയും ചെയ്യുക.(മഴവെള്ളം കിനിഞ്ഞിറങ്ങാതിരിക്കുവാൻ വേണ്ടി കോൺക്രീറ്റിൽ 12-15 സെന്റീമീറ്റർ ഉയരത്തിൽ ഉണ്ടാക്കുന്നത്‌.)ഇതിനു മുകളിൽ ചുരുങ്ങിയത്‌ ഒന്നരമീറ്റർ ഉയരത്തിൽ ചുമർ കെട്ടുക തുടർന്ന് അതിനു മേളിലായി റൂഫ്‌ കൊടുക്കുക.ഉള്ളിലായി നാലുവശത്തെക്കും എയർ ഹോൾ നൽകുകയും അതിനെ ചെറിയ കമ്പിവലകൊണ്ട്‌ "അടക്കുകയും" ചെയ്യുക . വീടിന്റെ എലിവേഷനു അനുസരിച്ച്‌ ഇതിന്റെ വലിപ്പത്തിലും രൂപത്തിലും മാറ്റം വരുത്താവുന്നതാണ്‌.

എല്ലാത്തിനും ഉപരിയായി വീടു ഡിസൈൻ ചെയ്യുമ്പോൾ തന്നെ വേണ്ടത്ര വായുസഞ്ചാരം ഉറപ്പുവരുത്തുക എന്നതു തന്നെയാണ്‌.ദൗർഭാഗ്യവശാൽ ഡൈനിങ്ങ്‌ റൂമിന്റെ പുറകിൽ ഒരു "അടച്ചുറപ്പുള്ള വരാന്ത" പോലുള്ള സംഗതികളാണ്‌ നമ്മുടെ നാട്ടിൽ കണ്ടുവരുന്ന പ്രവണത. പാഷ്യോ അല്ല ഞാൻ ഉദ്ദേശിച്ചത്‌.

കോൺക്രീറ്റ്‌ മുറ്റങ്ങൾ നമുക്കു വേണ്ട.

2009-04-16T16:56:00.000+03:00

ഇത്തിരിയുള്ള സ്ഥലത്ത്‌ നിറഞ്ഞുനിൽക്കുന്ന വീടും അതിനു ചുറ്റും ഉള്ള ഇടം മുഴുവൻ കോൺക്രീറ്റ്‌ ഇട്ടോ കോൺക്രീറ്റ്‌ ടെയിലുകൾ പാകിയോ "വൃത്തിയായി" സൂക്ഷിക്കുക നഗരങ്ങളിലെ ഒരു സ്ഥിരം കാഴ്ചയാണ്‌.ഇത്‌ തികച്ചും നിരുത്സാഹപ്പെടുത്തേണ്ട പ്രവണതയാണ്‌.മഴക്കാലത്ത്‌ ഇവിടെ നിന്നും മഴവെള്ളം ഭൂമിയിലേക്ക്‌ താഴ്‌ന്നുപോകുവാൻ സാധ്യമല്ലാതെ വരികയും ഇത്‌ പൊതുവഴിയിലേക്കോ,ഓടകളിലേക്കോ ഒഴുകിപ്പോകുവാൻ ഇടവരികയും ചെയ്യുന്നു. കൃത്യമായി തടസ്സങ്ങൾ നീക്കി വൃത്തിയായി സൂക്ഷിക്കുന്ന ഓടകൾ അന്യ്മായ നമ്മുടെ നാട്ടിൽ ഇത്‌ ധാരാളം ആരോഗ്യപ്രശനങ്ങൾക്കും ഇടവരുത്തും. കൂടുതൽ വെള്ളം ഒഴുകിയെത്തുന്നതോടെ റോഡുകൾക്കും കേടുപാടുകൾ സംഭവിക്കും. ഭൂമിക്കു മുകളിലെ സ്വാഭാവികമായ "ഹരിതകവചത്തെ" നശിപ്പിച്ചുകൊണ്ട്‌ അനുദിനം നിരവധി നിർമ്മാണപ്രവർത്തനങ്ങൾ നടക്കുന്നു.അന്തരീക്ഷത്തിലെ ചൂടു വർദ്ധിപ്പിക്കുന്നതിൽ അവ ഗണ്യമായ പങ്കുവഹിക്കുന്നു.കൂടാതെ എ.സി ഇന്ന് നമ്മുടെ കെട്ടിടങ്ങളിൽ അതിവേഗം സ്ഥാനം പിടിക്കുന്നു.ഇതെല്ലാം അന്തരീക്ഷ ഊഷ്മാവ്‌ വർദ്ധിപ്പിക്കുവാൻ ഇടവരുത്തുന്നു.

മുറ്റം അൽപം "വൃത്തികേടായാലും" ഭൂമിക്കു മേലുള്ള അനാവശ്യമായ കോൺക്രീറ്റ്‌ ആവരണം ഒഴിവാക്കുവാൻ ഓരോരുത്തരും പരമാവധി ശ്രദ്ധിക്കുക.മുറ്റത്തെ ചെളികെട്ടുന്നത്‌ ഒഴിവാക്കുവാൻ അവിടേ വെള്ളാരം കല്ല് പാകിയാലും കുഴപ്പമില്ല. കെട്ടിടങ്ങളുടെ ബാൽക്കണിയിലും, ടെറസ്സിലും എല്ലാം ചെടികളും പച്ചക്കറികളും വളർത്താവുന്നതാണ്‌.ടെറസ്സിൽ ചോർച്ചയുണ്ടാക്കും എന്നൊക്കെ പറഞ്ഞ്‌ ഒഴിയാതെ അതിനു തടയിടുവാൻ വേണ്ട സംവിധാനം ഒരുക്കി കഴിയുന്നത്ര ഹരിതാഭ സൃഷ്ടിക്കുവാനും അതിനെ സംരക്ഷിക്കുവാനും നാം ഓരോരുത്തരും ശ്രമിച്ചാൽ അത്‌ നമുക്ക്‌ തന്നെയാണ്‌ ഗുണം ചെയ്യുക.

മറ്റൊരുകാര്യം കൂടെ പറഞ്ഞുകൊള്ളട്ടെ.സ്വന്തം വീടിന്റെ മുറ്റത്തെ മണലിൽ ഓടിക്കളിക്കുവാൻ നമ്മുടെ കുട്ടികൾക്ക്‌ അവസരം നൽകുക.കോഴിക്കുട്ടികളെ തീറ്റയും ഹോമോണും കൊടുത്ത്‌ ഫാം ഹൗസുകളിൽ വളർത്തിയെടുക്കുന്ന പോലെ ആകരുത്‌ പുതുതലമുറയെ വാർത്തെടുക്കേണ്ടത്‌.മുറ്റത്തിറങ്ങിയാൽ രോഗം വരും, ഫ്ലോറിങ്ങിൽ അഴുക്കാകും എന്നെല്ലാം പറഞ്ഞ്‌ വിലക്കാതെ പ്രകൃതിയെ തൊട്ടറിയുവാൻ അവർക്കും അവസരം കൊടുക്കുക.

വിഷു ആശംസകൾ

2009-04-14T09:01:00.000+03:00

കാർവർണ്ണന്റെ വിഗ്രഹത്തിനു മുമ്പിൽ ഓട്ടുരുളിയിൽ നിലവിളക്കിന്റെ പ്രകാശത്തിൽ, പൊൻ നിറമാർന്ന കണിക്കൊന്നയും,നവധാന്യങ്ങളും,നാണയങ്ങളും,ഫലങ്ങളും,കോടി വസ്ത്രങ്ങളും വച്ചലങ്കരിച്ച്‌ കേരളം കണികണ്ടുണരുന്ന ഈ ശുഭദിനത്തിൽ എല്ലാ വായനക്കാർക്കും ആശംസകൾ...

കേരളത്തിലെ വർദ്ധിക്കുന്ന മാലിന്യ പ്രശനം

2009-02-19T12:13:00.003+03:00

ഇന്ത്യയിൽ താമസിക്കുവാൻ വേണ്ടി നിർമ്മിക്കപ്പെടുന്ന കെട്ടിടങ്ങളുടെ എണ്ണത്തിൽ കേരളം മുൻപന്തിയിലാണ്‌.എന്നാൽ ഇത്തരത്തിൽ നിർമ്മിക്കപ്പെടുന്ന കെട്ടിടങ്ങളിലെ താമസക്കാർ പുറം തള്ളുന്ന മാലിന്യം കൈകാര്യം ചെയ്യുവാൻ ഉള്ള സംവിധാനങ്ങളെ കുറിച്ച്‌ ഇനിയും കേരളജനതയും ഗൗരവമായി ചിന്തിച്ചിട്ടില്ല.പത്തും ഇരുപതും നിലകൾ ഉള്ള വൻ പാർപ്പിടസമുച്ചായങ്ങൾ മുതൽ ഒന്നര സെന്റുവരുന്ന ചെറിയ സ്ഥലത്തുപോലും വീടുകൾ നിർമ്മിക്കപ്പെടുന്നു.ഇവർ ടാണ കണക്കിനു മാലിന്യങ്ങൾ പുറം തള്ളുന്നു. ഇതുകൂടാതെ ഇവയുടെ സെപ്റ്റിടാങ്കുകളിൽ നിന്നും പുറത്തേക്കുള്ള ഓടകളിലേക്കും( പലതും സ്ലാബില്ലാതെ തുറന്നുകിടക്കുന്നതും, പ്ലാസ്റ്റിക്ക്‌ അടക്കം ഉള്ള മാലിന്യങ്ങൾ നിറഞ്ഞ്‌ അടഞ്ഞവ)അല്ലെങ്കിൽ സെപ്റ്റിക്‌ ടാങ്കിനോടു ചേർന്നുള്ള പിറ്റിലേക്കു പോകുന്നു.ഇതു സമീപത്തുള്ള കിണറുകൾ അടക്കമുള്ള കുടിവെള്ള സ്രോതസ്സുകൾക്ക്‌ ഭീഷണിയാകുന്നു.

മാലിന്യ സംസ്കരണത്തിനു വ്യക്തമായ കാഴ്ചപ്പാടോടെ സമഗ്രമായ പദ്ധതികൾ നടപ്പാക്കേണ്ട കാലം അധിക്രമിച്ചിരിക്കുന്നു. ഓരോ തദ്ദേശസ്വയംഭരണ സ്ഥാപനങ്ങളിലും മാലിന്യം നിർമ്മാർജ്ജനം ചെയ്യുവാൻ ഉള്ള സംവിധാനം അത്യാവശ്യമാണ്‌. നഗരങ്ങൾ വളരുന്നതിനനുസരിച്ച്‌ ഗ്രാമങ്ങളും അതിവേഗം നഗരങ്ങളായി മാറുന്നു.സ്വാഭാവികമായും ഇവിടേയും നല്ല ഓടകളുടെ നിർമ്മാണം,അതുപോലെ പൊതുസ്ഥലങ്ങളിൽ പബ്ലിക്ക്‌ ബിന്നുകൾ അനിവാര്യമാകുന്നു.മാലിന്യങ്ങളെ ഒരു സ്ഥലത്തുകൊണ്ടുവന്ന് തള്ളുകയും അവിടെ ഇട്ട്‌ അശാസ്ത്രീയമായി കത്തിച്ചുകളയുകയും ചെയ്യുന്ന ഇന്നത്തെ രീതി ശരിയല്ല. വങ്കിട കെട്ടിടസമുച്ചയങ്ങളോ അധികം ജനസാന്ദ്രതയോ ഇല്ലത്ത പ്രകൃതിരമണീയമായതും യദേഷ്ഠം ശുദ്ധവായു ലഭിക്കുന്നതുമായ വയനാട്ടിലേക്ക്‌ താമരശ്ശേറി ചുരം കയറിച്ചെല്ലുന്നവരെ എതിരേൽക്കുന്നതു കൽപറ്റയിലെ മാലിന്യം കൊണ്ടുതള്ളുന്നിടത്തുനിന്നും ഉള്ള ദുർഗ്ഗന്ധമാണെന്നത്‌ പറയുമ്പോൾ മറ്റിടങ്ങളിലെ സ്ഥിതി പറയേണ്ടതില്ലല്ലോ? കേരളത്തിലെ നഗരങ്ങളിൽ "വികസനത്തിന്റെ" കാര്യത്തിൽ ഏറ്റവും മുൻ പന്തിയിൽ നിൽക്കുന്ന എറണാംകുളത്തു ജീവിക്കുന്നവർ മാലിന്യങ്ങൾ കൊണ്ടും അതുണ്ടാക്കുന്ന ആരോഗ്യ-പരിസ്ഥിതി പ്രശനങ്ങൾ കൊണ്ടും പൊറുതിമുട്ടിയിരിക്കയാണ്‌.മഴക്കാലമായാൽ ഇതിന്റെ രൂക്ഷത ശതഗുണീഭവിക്കുന്നു. എറണാംകുളം ജില്ലയാണ്‌ ഇന്ന് കേരളത്തിൽ ഏറ്റവും രൂക്ഷമായ മാലിന്യ പ്രശ്നം അഭിമുഖീകരിക്കുന്നത്‌. ഇതു സംമ്പന്തിച്ച്‌ പലതവണ കോടതിയുടെ പരാമർശങ്ങൾ വന്നുകഴിഞ്ഞു. പദ്ധതികളെ കുറിച്ചുള്ള ചർച്ചകളും അതിന്റെ പേരിൽ ചിലവിടുന്ന തുകകളുടെ കണക്കുകളും ഒന്നും മാലിന്യം നീക്കുന്നില്ല.വികസനത്തിനായി ജാഥകളും സെമിനാറുകളും നടത്തുകയും കോടികൾ ലോകമ്പാങ്കടക്കമുള്ള സ്ഥാപനങ്ങളിൽ നിന്നും അന്യായമായ നിബന്ധനകൾക്കു വഴങ്ങി വാങ്ങുകയും ചെയ്യുന്നവർക്ക്‌ എന്തുകൊണ്ട്‌ ഇക്കാര്യത്തിൽ ഒരു പരിഹാരം കാണുവാൻ കഴിയുന്നില്ല?

"ദൈവത്തിന്റെ സ്വന്തം നാട്‌" സന്ദർശിക്കുവാൻ ലോകത്തിന്റെ പലഭാഗങ്ങളിൽ നിന്നും ധാരാളം ടൂറിസ്റ്റുകൾ ഇവിടേ എത്തുന്നുണ്ട്‌. ടൂറിസ്റ്റുകൾ ആരോഗ്യകാര്യത്തിൽ വളരെയധികം ശ്രദ്ധ ചെലുത്തുന്നവരാണ്‌.മാലിന്യത്തെ കുറിച്ച്‌ നമ്മുടെ അധികൃതർ നിസ്സാരമായി കരുതുന്ന പലതും അവരുടെ രാജ്യത്ത്‌ വലിയ ശ്രദ്ധയോടെ പരിപാലിക്കപ്പെടുന്നതാണെന്ന് നാം ഓർക്കേണ്ടതുണ്ട്‌.പൊതുസ്ഥലത്തു തുപ്പിയാൽ പിഴയും നിശ്ചിത നാളുകൾ പൊതുസ്ഥലം തൂത്തുവൃത്തിയാക്കലും നിയമം മൂലം നടപ്പാക്കുന്ന രാജ്യങ്ങളിൽ നിന്നും വരുന്നവർ ആണ്‌ ഭൂരിപക്ഷം ടൂറിസ്റ്റുകളും.

കൊതുകുനിർമ്മാർജ്ജനത്തിനായി വേണ്ട നടപടികൾ കാര്യക്ഷമമായി ചെയ്യാതെ വൈകുന്നേരം മേഷീനോ/കൊതുകുതിരിയോ കത്തിച്ച്‌ കെമിക്കൽ പുകശ്വസിച്ച്‌ നിർവൃതിയടയുന്ന ജനസമൂഹം പൊതുപ്രശനങ്ങളിൽ നിന്നും ഓടിമാറുന്ന കുറ്റകരമായ അനാസ്ഥയാണ്‌ ചെയ്യുന്നത്‌.അധികൃതരുടേയും പൊതുജനത്തിന്റേയും അശ്രദ്ധമൂലം ഇത്തരം കൊതുകു നിർമ്മാർജ്ജന ഉലപന്നങ്ങൾ വിപണിയിൽ എത്തിക്കുന്ന കമ്പനികൾ കോടികൾ ആണ്‌ കൊയ്യുന്നത്‌.ഇറച്ചിവേസ്റ്റ്‌, പ്ലാസ്റ്റിക്ക്‌ അടക്കം ഉള്ള ഉപയോഗശൂനയ്മായ വസ്തുക്കൾ തോന്നിയപോലെ വഴിയോരത്തും മറ്റും വലിച്ചെറിയുന്ന പൊതുജനങ്ങളുടെ സ്വഭാവരീതിയിലും മാറ്റം വരേണ്ടിയിരിക്കുന്നു.ആരോഗ്യമുള്ള പരിസരം എന്നത്‌ അവിടെ ജീവിക്കുകയും സന്ദർശിക്കുകയും ചെയ്യുന്ന ഓരോ പൗരന്റേയും ഉത്തരവാദിത്വമാണ്‌. മാലിന്യ പ്രശനത്തെ രാഷ്ടീയവൽക്കരിക്കാതെ രാഷ്ടീയ പ്രസ്ഥാനവും, പൊതുസമൂഹവും സംസ്ഥാനത്തിന്റെ മൊത്തം ആരോഗ്യ-പരിസ്ഥിതി പ്രശന്മായി കണ്ട്‌ ഉണർന്നുപ്രവർത്തിക്കേണ്ടീയിരിക്കുന്നു.

ഓർക്കുക: വൻ കെട്ടിടങ്ങളിൽ പഞ്ചനക്ഷത്രജീവിതം നയിക്കുന്നവർ പുറം തള്ളുന്ന അഴുക്കുകൾ ഒഴുകുന്ന ചാലുകൾക്കിരുവശവും ഉള്ള ചേരികളിൽ, അഴുക്കുചാലുകളിൽ പുഴുക്കളെ പോലെ ജീവിക്കുന്നവരും മനുഷ്യരാണ്‌. ജനാധിപത്യസംവിധാനത്തിൽ വോട്ടുചെയ്യുവാൻ മാത്രം അവകാശമുള്ള വെറും സ്ലം......അല്ല അവർ.

പ്ലാൻ -32

2009-02-05T16:23:00.004+03:00

പ്ലാനിനു കടപ്പാട്‌: മിസിസ്സ്‌ വിനി.എസ്‌.കുമാർ

ആധുനീകസൗകര്യങ്ങൾ ഉള്ള വീടാണെങ്കിൽ പോലും അതു "കേരളീയശൈലിയിൽ"തന്നെ ആകണം എന്ന് പലർക്കും നിർബന്ധമുണ്ട്‌.ചരിച്ചുവാർത്ത്‌ മുകളിൽ ഓടുപതിച്ച്‌ വരാന്തയിൽ ഉടനീളം ചാരുപടിനൽകിയാൽ അതുകേരളീയശൈലിയാണെന്ന് പലരും തെറ്റിദ്ധരിച്ചുപോയി.നിർഭാഗ്യവശാൽ ഈ ഒരു ധാരണയാണ്‌ നമ്മുടെ നാട്ട്ല് പലപ്പോഴും "വാസ്തു വൈകൃതങ്ങൾ" പെരുകുന്നതിനു ഇടയാക്കുന്നത്‌. മേൽപറഞ്ഞ "കേരളീയ ശൈലിയിൽ" ഉള്ള ഒരു ഡിസൈൻ എന്ന രീതിയിൽ തയ്യാറാക്കിയതാണിവിടെ കൊടുക്കുന്നതും. ചെരിച്ചുവാർത്ത്‌ മുകളിൽ ഓടുപതിച്ച്‌ കാഴ്ചയിൽ നമ്മുടെ പരമ്പരാഗത രീതികളോട്‌ ചില സാദൃശ്യം പുലർത്തുന്ന ഒരു വീടിന്റെ പ്ലാൻ എന്നേ ഇതിനെ പറയുവാൻ കഴിയൂ. ആധുനീകസൗകര്യങ്ങളോടെ "കേരളീയശൈലിയിൽ" എന്ന് പറയുന്നതിനോടെനിക്ക്‌ വിയോജിപ്പുണ്ട്‌.(ഇതേകുറിച്ച്‌ പിന്നീട്‌ എഴുതുന്നതാണ്‌) കേരളീയ വാസ്തുശൈലിക്ക്‌ അതിന്റേതായ തനതു രീതികളും അളവുകളും നിർമ്മാണ നിയമങ്ങളും ഉണ്ട്‌.അതു പിന്തുടരുന്നതുകൊണ്ടാണ്‌ അവയെ കേരളീയശൈലിയിൽ നിർമ്മിച്ചത്‌ എന്ന് പറയുന്നതും.എന്നാൽ ഇന്നാകട്ടെ അത്തരം കാര്യങ്ങളിൽ നിന്നും വേറിട്ടുനിന്നുകൊണ്ട്‌ പഴയ കെട്ടിടങ്ങളിലെ ചില എലിമന്റുകൾ മാത്രം എടുത്ത്‌ ഉപയോഗിക്കുന്നു. ദൗർഭ്യാഗ്യവശാൽ ഞാനും ഇത്തരം "പാതിവെന്ത" തീർക്കുന്നതിനു നിർബന്ധിതനായിട്ടുണ്ട്‌.

എലിവേഷന്റെ സാധ്യതകൾ മുന്നിൽകണ്ടുകൊണ്ട്‌ തയ്യാറാക്കിയ ഈ പ്ലാനിനു 2744 ചതുരശ്രയടി വിസ്തീർണ്ണമാണുള്ളത്‌.മുൻ വശത്ത്‌ ഒരു "പൂമുഖം" കൂടാതെ ല്വീങ്ങും ഡൈനിങ്ങും വെവ്വേറെ നൽകിയിട്ടുള്ള ഇതിനു താഴത്തെനിലയിൽ ഡ്രസ്സിങ്ങ്‌ ഏരിയയും അറ്റാച്ച്ഡ്‌ ബാത്‌റൂമുകളും ചെർന്നുള്ള രണ്ടുകിടപ്പുമുറികളും ഉണ്ട്‌.ഡൈനിങ്ങിനോടുചേർന്ന് ഒരു കോർടുയാഡും അതിന്റെ ഒരു വശത്ത്‌ കൂടുമ്പങ്ങൾക്കിരിക്കുവാൻ ഒരു ചെറിയ തിണ്ണനൽകിയിരിക്കുന്നു.ഡൈനിങ്ങ്‌ റൂമിന്റെ ഒരു ഭാഗത്ത്‌ ഡബിൾഹൈറ്റ്‌ ആണ്‌. "അർദ്ധവൃത്താകൃതിയിൽ" ഉള്ള സ്റ്റെയർക്കേസ്‌ കയറിച്ചെന്നാൽ മുകൾനിലയിലെ ലിവിങ്ങ്‌ ഏരിയയിലേക്ക്‌ എത്തുന്നു.ഇവിടെ നിന്നും ബാൽക്കണിയിലേക്കും പുറകുവശത്തെ ടെറസ്സിലേക്കും പ്രവേശിക്കാം. താഴത്തെ പോലെ തന്നെ മുകൾനിലയിലും രണ്ടുകിടപ്പുമുറികൾ ഉണ്ട്‌.

ഡിസൈനറും കോണ്ട്രാക്ടറും.

2009-01-03T10:44:00.006+03:00

ഡിസൈനർ: പുതിയ ഒരു വീട് തയ്യാറാക്കുവാൻ ആലോചിക്കുമ്പോൾ ഏറ്റവും ശ്രദ്ധിക്കേണ്ട ഒരു കാര്യം ഡിസൈനറെ തിരഞ്ഞെടുക്കുന്നതിലാണ്.ചെറുതായാലും വലുതായാലും ഡിസൈനർക്ക് അതിൽ നല്ലൊരു പങ്ക് വഹിക്കുവാൻ ഉണ്ട്.പലരും മറ്റുള്ളവർ ചെയ്ത വീടിന്റെ ഡിസൈൻ/മാഗസിൻ, നെറ്റ് തുടങ്ങിയവയിൽ പ്രസിദ്ധീകരിച്ചത് പകർത്തുകയോ,അതുമല്ലെങ്കിൽ സ്വന്തമായി തന്നെ ഡിസൈൻ ചെയ്യുകയോ ആണ് പതിവ്.മറ്റു ചിലരാകട്ടെ അടുത്തുള്ള *“തച്ചുശാസ്ത്രഞ്ജന്മാ‍രെ“ സമീപിക്കുന്നു,അവർ നൽകുന്ന “സിങ്കിൾ ലൈൻ ഡയഗ്രം“ വച്ച് ഭാക്കി കര്യങ്ങൾ പണിക്കാർക്ക് വിട്ടുകൊടുക്കുന്നു, വേണ്ടത്ര വൈദഗ്ദ്യമോ ഉൾക്കാഴ്ചയോ ഇല്ലാത്തവരുടെ അറിവില്ലായ്മകൾ ലക്ഷങ്ങൾ ചിലവിട്ട് നിങ്ങൾ നിർമ്മിക്കുന്ന വീടിന്റെ സൌകര്യങ്ങളെയും ഭംഗിയേയും ഇല്ലാതാക്കുവാൻ ഇത് ഇടയാക്കുന്നു.അതുപോലെ മറ്റൊരു അപകടമാണ് അല്പഞ്ജാനികളായ ബന്ധുക്കൾ,ഇവരെയും അകറ്റിനിർത്തുന്നത് നന്നായിരിക്കും.

സ്വന്തം വീടിനെ കുറിച്ച് ഓരോരുത്തരുടെ താല്പര്യങ്ങളും സങ്കൽ‌പ്പങ്ങളും വ്യത്യസ്ഥാമായിരിക്കും. അതുകൊണ്ടുതന്നെ നിർമ്മിക്കുവാൻ പോകുന്ന വീട്ടിൽ താമസിക്കുന്നവരുടെ താല്പര്യങ്ങളും, “സ്വപനങ്ങളും“,ആവശ്യങ്ങളും താമസക്കാരുടെ സ്വഭാവ സവിശേഷതകളും കണക്കിലെടുത്തും ബഡ്ജറ്റിനും,സ്ഥലത്തിന്റെ ഘടനക്കും അനുയോജ്യമാകുന്ന വിധത്തിലും ഡിസൈൻ ചെയ്യുവാൻ കഴിവുള്ളവരെ വേണം തിരഞ്ഞെടുക്കുവാൻ.നിങ്ങൾ തിരഞ്ഞെടുക്കുന്ന ഡിസൈനറുടെ മുൻ‌കാല വർക്കുകൾ നോക്കിയും അവിടെ താമസിക്കുന്നവരുടെ അഭിപ്രായം ആരായുന്നതും നല്ലതാണ്. കുടുമ്പാംഗങ്ങളും ഡിസൈനറുമായൂള്ള തുറന്ന ചർച്ചക്ക് ഒരു ഡിസൈൻ തയ്യാറാക്കുന്നതിൽ നിർണ്ണായകമായ പങ്കാണ് ഉള്ളത്. പ്രായോഗികമായ അറിവും പുതിയ ആശയങ്ങളോടുള്ള പോസിറ്റീവായ സമീപനവും ചെറിയ കാര്യങ്ങൾക്ക് പോലും ചെവികൊടുക്കുന്നറ്റിനുള്ള സന്നദ്ധതയും ഒരു നല്ല ഡിസൈനറുടെ മുഖമുദ്രയാകുന്നു. ജനറൽ ലേയൌട്ട് കൂടാതെ ഇലക്ട്രിക്കൽ, പ്ലംബിങ്ങ്,ഇന്റീരിയർ,സ്റ്റ്ട്രക്ചറൽ തുടങ്ങിയവയ്ക്ക് പ്രത്യേകം ലേയൌട്ടും ആവശ്യമായ സെക്ഷനുകളും മറ്റു ഡീറ്റെയിത്സും പ്രൊഫഷണൽ ഡിസൈനർമാർ നൽകുന്നു.കോസ്റ്റ് എസ്റ്റിമേറ്റ് വീടുപ്ലാനിങ്ങിന്റെ ഒരു പ്രധാന ഘടകമാണ്, ബഡ്ജറ്റിനനുസരിച്ച് കാര്യങ്ങൾ നിശ്ചയിക്കുവാനും ഒരു വീടിന്റെ വിവിധ നിർമ്മാണഘട്ടങ്ങളിൽ വരുന്ന ചിലവിനെ കുറിച്ചൊരു ഏകദേശധാരണ നൽകുവാനും ഇത് സഹായിക്കുന്നു. നിങ്ങളുടെ ആവശ്യങ്ങളും താൽ‌പര്യങ്ങളും പരിഗണിക്കാതെ താൻ നിശ്ചയിക്കുന്ന/മുങ്കൂട്ടി ഡിസൻ ചെയ്ത ഏതെങ്കിലും ഡിസൈൻ നിർബന്ധബുദ്ധിയോടെ അടിച്ചേൽ‌പ്പിക്കുന്നവരും കേവലം എക്സ്റ്റീരിയർ മാത്രം നന്നാക്കി തന്റെ പേരു വർദ്ധിപ്പിക്കുവാൻ ശ്രമീക്കുന്നവരുമായ ഡിസൈനർമാരെ ഒഴിവാക്കുവാൻ തയ്യാറാകുക. നിർമ്മാണത്തിന്റെ ഏതുഘട്ടത്തിലും ആവശ്യമെങ്കിൽ സൈറ്റ് സന്ദർശിക്കുവാൻ വ്യക്തമായ ഉപദേശവും ഡീറ്റെയിത്സും നൽകുവാൻ കഴിവുള്ള ആളായിരിക്കണം നീങ്ങളുടെ വീടിന്റെ ഡിസൈനർ.
ഡിസൈനർമാർ തങ്ങളുടെ പ്രതിഫലം നിശ്ചയിക്കുന്നത് വ്യത്യസ്ഥരീതിയിൽ ആയിരിക്കും.ചിലർ ഡിസൈനിന്റെ പ്രത്യേകതകൾ,നൽകുന്നഡീറ്റെയിത്സ് എന്നിവ അനുസരിച്ചും.മറ്റു ചിലർ പ്രൊജക്ടിന്റെ മൊത്തം ചിലവിന്റെ നിശ്ചിത ശതമാനവും ആയിരിക്കും ഈടാക്കുക.നാട്ടിൻ പുറങ്ങളിൽ ഇത് ഏരിയയെ അടിസ്ഥാനമാക്കീയാണ് പലരും സാധാരണയായി ഈടാക്കുന്നത്.

തദ്ദേശസ്വയംഭരണ സ്ഥാപനങ്ങളിൽ നിന്നും ആവശ്യമെങ്കിൽ മറ്റു സർക്കാർ സ്ഥാപ്പനങ്ങളിൽ നിന്നും കെട്ടിടനിർമ്മാണാനുമതിയും, ലോണിനാവശ്യമായ പേപ്പേഴ്സ് തയ്യാറാക്കലും എല്ലാം ചില ഡിസൈനർമാർ ചെയ്യാറുണ്ട്.

കോണ്‌ട്രാക്ടർ:സ്വന്തമായി പണിക്കാരെ സംഘടിപ്പിച്ച് നിർമ്മാണം നടത്തുന്ന രീതിയായിരുന്നു പണ്ട് പ്രചാരത്തിൽലുണ്ടായിരുന്നത്. എന്നാൽ പിന്നീട് വ്യക്തിപരമായ അസൌകര്യങ്ങൾ മൂലം ഇന്ന് പലരും നിർമ്മാണം ഈ രംഗത്തെ ബിൽഡേഴ്സിനേയോ/ കോണ്ട്രാക്ടർമാരെയോ ഏൽ‌പ്പിക്കുവാൻ തുടങ്ങി. ഡിസൈനറ് തയ്യാറാക്കുന്ന രേഖകളിൽ നിന്നും രൂപത്തിലേക്ക് നിങ്ങളുടെ വീടിനെ നയിക്കുന്നവനാണ് കോൺ‌ട്രാക്ടർ എന്ന് പറയാം. നല്ല ഒരു ഡിസൈനറെ തിരഞ്ഞെടുക്കു ന്നതുപോലെ നിർണ്ണായകമാണ് ഒരു കോൺ‌ട്രാക്ടറെ കണ്ടെത്തുന്നതും.ഡിസൈനറുടെ കാര്യത്തിലെന്ന പോലെ ഇവർ മുമ്പ് ചെയ്ത വർക്കുകളെ കുറിച്ച് അഭിപ്രായമറിയുന്നത് അവശ്യമാണ്. വേണ്ടത്ര സാങ്കേതികഞ്ജാനമോ മുൻ പരിചയമോ ഇല്ലാതെ പലരും കുറച്ച് പണിക്കാരെകൂട്ടി നിർമ്മാൺ മേഘലയിൽ കടന്നുകൂടിയിട്ടുണ്ട്. ഇത് പ്രോജക്ടുകളുടെ ക്വാളിറ്റി മോശമാക്കുവാനും ചിലവു വർദ്ധിക്കുവാനുമിടവരുത്തുന്നു. ഇത്തരക്കാരെയും അറ്റുപോലെ പാതിവഴിൽ പ്രോജക്ട് ഇട്ടുപോകുന്നവരെ യാതൊരു കാരണവശാലും പരിഗണിക്കരുത്.

ഒരു കോണ്ട്രാക്ടറെ തിരഞ്ഞെടുക്കുമ്പോൾ ശ്രദ്ധിക്കേണ്ട ചിലകാര്യങ്ങൾ ഇവയാണ്.

1.തൊഴിൽ രംഗത്ത് മുൻ‌പരിചയവും, വേണ്ടത്ര വിദ്യാഭ്യാസയോഗ്യതയും ഉണ്ടായിരിക്കണം.കോൺ‌ട്രാക്ടറുടെ കീഴിൽ നല്ല എഞ്ചിനീയർ/സൂപ്പർവൈസർ,വിദഗ്ദരായ തൊഴിലാളികൾ എന്നിവർ ഉണ്ടായിരിക്കണം.
2.ചെയ്യുന്ന വർക്കുകളിലെ പെർഫക്ഷൻ,ഡിസൈനർ നൽകുന്ന ഡ്രോയിങ്ങ്സും മറ്റു ഡീറ്റെയിത്സും മനസ്സിലാക്കി അതിനനുസരിച്ച് നിർമ്മാണംനടത്തുവാൻ കഴിവുണ്ടായിരിക്കണം
3.ഉപയോഗിക്കുന്ന മെറ്റീരിയത്സ് നിലവാരമുള്ളതായിരിക്കണം.
4.കാര്യക്ഷമമായി പ്രൊജക്ടിനെ മുന്നോട്ടുകൊണ്ടുപോകുവാനും പ്രതിസന്ധികളെ തരണം ചെയ്യുവാനും ഉള്ള കഴിവ്.
5.സാമ്പത്തീക കാര്യങ്ങളിലെ കൃത്യത.

കോണ്ട്രാക്ട്

വീടു നിർമ്മിക്കുവാൻ കോണ്ട്രാക്ടറെ നിശ്ചയിച്ചുകഴിഞ്ഞാൽ അവരുമായി ഒരു കരാറിൽ ഏർപ്പെടുന്നത് അത്യാവശ്യമാണ്. ഇത് സർക്കാർ അംഗീകരിച്ച മുദ്രപത്രത്തിൽ ആയിരിക്കണം.
1.കോണ്ട്രാക്ടിൽ നിർമ്മിക്കുന്ന ആളും, കോണ്ട്രാക്ടരും ആരെന്ന് വ്യക്തമായി രേഖപ്പെടുത്തിയിരിക്കണം.
2.നിർമ്മിക്കുവാൻ ഉദ്ദേശിക്കുന്ന കെട്ടിടത്തെകൂറിച്ചും,സ്ഥലത്തെ കുറിച്ചും,തദ്ദേശസ്വയംഭരണ സ്ഥപനത്തിൽ നിന്നും ഉള്ള കെട്ടിടനിർമ്മാണത്തിനുള്ള അനുമതിയെകുറിച്ചും ഇതിൽ പരാമർശിച്ചിരിക്കണം.
3. ചതുരശ്രയടി/ചതുരശ്രമീറ്റർ എന്നിങ്ങനെ ഏതുമാനദണ്ടം വച്ചാണ് കെട്ടിടത്തിറ്റെ ചുറ്റളവ് നിശ്ചയിക്കുന്നതെന്നും ഇതുപ്രകാരം എത്ര ഏരിയ ഉണ്ടെന്നും നിർബന്ധമായും കോണ്ട്രാക്ടിൽ എഴുതിയിരിക്കണം.കൂടാതെ കെട്ടിടനിർമ്മാണത്തിന്റെ വിവിധ ഘട്ടങ്ങളിൽ നൽകേണ്ട തുകയെകുറിച്ചു അത് മൂന്നാമതൊരാളെ വച്ച് പരിശോധിച്ചതിനു ശേഷമാ‍ണെങ്കിൽ അതിനെ കുറിച്ചും പരാമർശിച്ചിരിക്കണം.
4.സമയാ സമയങ്ങളിൽ ഉടമ തുകനൽകാതിരിക്കുകയോ കോണ്ട്രാക്ടർ പണി പൂർത്തിയാക്കാതിരിക്കുകയോ ചെയ്താൽ പരസ്പരം പിഴ/ നഷ്ടപരിഹാരം ഈടാക്കുവാൻ നിശ്ചയിച്ചിട്ടുണ്ടെങ്കിൽ അതേ കുറിച്ച് വ്യക്തമാക്കണം.കോടതിവ്യവഹാരങ്ങൾ ഉണ്ടാകുകയാണെങ്കിൽ അതേ കുറിച്ചും,നിർമ്മാണകാലയളവിൽ ഉടമയോ കോണ്ട്രാക്ടറോ മരണപ്പെടുകയോ മറ്റോ ചെയ്താൽ, ഉടമ സ്ഥലം മറ്റൊരാൾക്ക് വിറ്റാൽ തുടങ്ങിയ കാര്യങ്ങളെ കുറിച്ചും വ്യക്തമാക്കണം.
5.നിർമ്മാണ സാമഗ്രികളെ കുറിച്ച് വിശദമായി രേഖപ്പെടുത്തണം.( ടൈൽ/ഫ്ലോറിന്ങിനായുള്ള മെറ്റീരിയൽ ഇതിൽ നിന്നും ഒഴിവാക്കുകയും നിർമ്മാണം പൂർത്തിയാക്കുന്ന വേളയിൽ ഉടമ, ഡിസൈനർ,കോണ്ട്രാകടർ എന്നിവർ ബഡ്ജറ്റിനനുസരിച്ച് ഫ്ലോറിങ്ങ് മെറ്റീരിയലിന്റെ ഡിസൈനും നിലവാരവും നിശ്ചയിച്ച് സെലക്ട് ചെയ്യുന്നതും ആയിരിക്കും നന്നാകുക.പലപ്പോഴും ടൈത്സ് ഡിസൈനും മറ്റും ഒരു വില്ലനാകാറുണ്ട്.)
6.കെട്ടിടത്തിന്റെ പ്ലാൻ,എല്ലാ വശങ്ങളുടേയും എലിവേഷൻ,ജനറൽ സെക്സ്ഷൻ, പേഴ്പക്ട്രീവ് വ്യൂ എന്നിവയുടെ ഒരു കോപ്പി കൂടെ കരാറിന്റെ കൂടെ പരസ്പരം സൈൻ ചെയ്ത് ചേർക്കുന്നത് നന്നായിരിക്കും.
7.മെറ്റീരിയലുകൾക്കുണ്ടായേക്കാവുന്ന വിലവ്യത്യാസം കൂടെ കണക്കിലെടുത്ത് നിശ്ചിത ശതമാനത്തിനു മുകളിൽ വില കൂടുകയോ മറ്റോ ചെയ്താൽ ഉടമ കോണ്ട്രാക്ടർക്ക് നൽകാം എന്ന് പറഞ്ഞിരിക്കണം.
8.നിർമ്മാണ വേളയിൽ ഉണ്ടാകുന്ന പൊളിക്കലുകൾക്കും കൂട്ടിചേർക്കലുകൾക്കും ഈടാക്കാവുന്ന ചാർജ്ജിനെകുറിച്ച് വ്യക്തമാക്കണം.
9.നിർമ്മാണ പ്രവർത്തനത്തിനാവശ്യമായ വെള്ളം,വൈദ്യുതി എന്നിവ ആരുടെ ഉത്തരവാദിത്വം എന്നത് വ്യക്തമാക്കിയിരിക്കണം.
10.കോണ്ട്രാക്ടറുടെ ലാഭവിഹിതത്തെ കുറിച്ചും ഇതിൽ വ്യക്തമാക്കുന്നത് നന്നായിരിക്കും.

കോണ്ട്രാക്ടിൽ തന്നെ “ടേൺകീ”,ലേബർ കോണ്ട്രക്ട്, സ്ട്രക്ചർ കോണ്ട്രാക്ട് എന്നിങ്ങനെ ചില വിഭാഗമുണ്ട്.കയരിത്താമസിക്കാവുന്ന വിധത്തിൽ പൂർണ്ണമായും വീടിന്റെ നിർമ്മാണം പൂർത്തിയാക്കി ഉടമയുടെ കയ്യിൽ താക്കോൽ കൊടുക്കുന്ന രീതിയാണ് “ടേൺകീ”.മൂന്നാമതൊരു സൂപ്പർവൈസർ സാക്ഷ്യപ്പെടുത്തി അതാതു സമയത്ത് നിർമ്മാണപ്രവർത്തനം പരിശോധിച്ച് കോണ്ട്രാക്ടർ നൽകുന്ന ബില്ല് പാസ്സാക്കുന്നു.

ലേബർ കോണ്ട്രാക്ട് എന്നാൽ ഒരോ വർക്കുകൾക്കും പ്രത്യേകം പ്രത്യേകം അല്ലെങ്കിൽ ഇന്ന ഘട്ടം വരെ തീർക്കുവാൻ എന്നരീതിയിലോ ആയിരിക്കും ഈ കരാറ്. സ്ക്വർഫീറ്റ്/സ്ക്വയർ മീറ്ററിനു തുക നിശ്ചയിച്ച് നിർമ്മാണം നടത്തുന്നു.ഇവിടെ കോണ്ട്രാക്ടർ തൊഴിലാളികളെ സപ്ലൈ ചെയ്യുകയും മേൽനോട്ടക്കാരൻ,നിർമ്മാണത്തിനാവശ്യമായ സാമഗ്രികൾ എന്നിവ ഉടമസ്ഥൻ ആണ് ഏർപ്പാടാക്കുന്ന്ൻത്. ഇത് ഓരോഘട്ടവും പൂർത്തിയാകുമ്പോൾ അതാതു സമയത്ത് കോണ്ട്രാക്ടർ നൽകുന്ന ബില്ല് സൂപ്പർ വൈസർ വിലയിരുത്തിയതിനു ശേഷം പാസ്സാക്കുന്നു.

മൂന്നാമത്തെ വിഭാഗമാകട്ടെ കെട്ടിടത്തിന്റെ ഫൌണ്ടേഷൻ മുതൽ മേൽക്കൂരവരെ ഇവർ ചെയ്യുന്നു.അതും മേൽ‌പ്പറഞ്ഞപോലെ നിബന്ധനകളും മറ്റും ഉൾക്കൊള്ളിച്ചുള്ള കരാറിനെ അടിസ്ഥാനപ്പെടുത്തിയായിരിക്കും.

*വാസ്തു എന്ന പഴയകാല നിർമ്മാണ സങ്കേതം ആണെന്നും ഇന്ന് ദുർവ്യാഖ്യാം ചെയ്തും കച്ചവടത്തിനായുള്ള ഒരു മാർഗ്ഗം മാത്രമായും അധപതിച്ച് നമ്മുടെ കെട്ടിടനിർമ്മാണ മെഘലയെ തെറ്റായ ഒരു ദിശയിലേക്ക് കൊണ്ടുപോയ്ക്കൊണ്ടിരിക്കുന്ന ഒരു കാലഘട്ടമാണ് ഇത്.കേവലം അളവുകൾക്കും അന്ധവിശ്വാസങ്ങൾക്കും മാത്രം പ്രാധാന്യം നൽകിക്കൊണ്ടാകരുത് നിങ്ങളുടെ വീടിന്റെ ഡിസൻ എന്ന് ഓർക്കുന്നത് നന്നായിരിക്കും.

ക്രിസ്തുമസ്സ് ആശംസകൾ

2008-12-24T09:28:00.003+03:00

നക്ഷത്രങ്ങൾ മിന്നിമറയുന്നതും, മഞ്ഞുപെയ്യുന്നതുമായ ഒരു രത്രിയിൽ ബദ്‌ലഹേമിലെ പുൽക്കൂടിൽ പിറന്ന് അഹിംസയുടേയും സഹനത്തിന്റേയും പാതയിലൂടേ സഞ്ചരിച്ച് മാനവരാശിയുടെ മോചനത്തിനായി കുരിശിലേറുകയും ചെയ്ത യേശുക്രിസ്തു വിന്റെ തിരുപ്പിറവി ആഘോഷിക്കുന്ന ഈ വേളയിൽ എല്ലാവർക്കും എന്റെ ക്രിസ്തുമസ്സ് ആശംസകൾ.

നിർമ്മാണ ട്രെന്റും സാധാരണക്കാരും

2008-12-23T11:53:00.004+03:00

മറ്റുപലതിലും എന്നപോലെ കേരളത്തിലും നിർമ്മാണരംഗത്ത്‌ ട്രെന്റുകളുടെ കാലമാണ്‌. വൈവിധ്യങ്ങൾ നിറഞ്ഞ നിരവധി വീടുകൾ നിർമ്മിക്കപ്പെടുന്നു അവ അച്ചടി-ദൃശ്യമാധ്യമങ്ങളിലൂടെ മലയാളികളുടെ അടുത്ത്‌ യഥേഷ്ടം എത്തുകയും ചെയ്യുന്നു.സാധാരണക്കാർ പോലും ഇത്തരം ദൃശ്യങ്ങളിൽ "വീണു"പോകുന്നു. തന്റെ വീട്‌ മറ്റുള്ളവരിൽ നിന്നും "വ്യത്യസ്ഥമാകണം" എന്ന് ആഗ്രഹിക്കുന്നവരാണ്‌ ഭൂരിഭാഗവും.മറ്റുള്ളവർക്ക് മുമ്പിൽ താൻ ഗരിമ കാണിക്കുവാൻ മലയാളിക്ക് എന്നും അത്യുത്സാഹമാണ് ഇതിനായി അവർ നല്ല തുക ചിലവിടുവാനും തയ്യാറാകുന്നു.

സാമ്പത്തീകമായി മുന്നിൽ നിൽക്കുന്നവരെ സമ്പന്തിച്ചേടത്തോളം "വിലകൂടിയ പരീക്ഷണങ്ങൾ" പലപ്പോഴും സാധ്യമാണ്‌. എന്നാൽ ലാളിത്യവും സൗകര്യവും ഉള്ള വീടുകൾ നിർമ്മിക്കുക എന്നതായിരിക്കണം സാധാരണക്കാരനെ സംമ്പന്തിച്ച്‌ വീടു നിർമ്മിക്കുമ്പോൾ കൂടുതൽ ഉചിതമാകുക.ട്രെന്റുകൾക്കനുസരിച്ച്‌ നിർമ്മിതികൾ പടുത്തുയർത്തുവാൻ ശ്രമിക്കുമ്പോൾ പലപ്പോഴും അതാവശ്യപ്പെടുന്ന സങ്കേതിക മികവിനായും,പ്രത്യേക നിർമ്മാണസാമഗ്രികൾക്കായും കൂടുതൽ തുക മറ്റീവ്ക്കേണ്ടിവരുന്നു.മാത്രമല്ല നിർമ്മാണശേഷം മെയ്ന്റനൻസ്‌ ചിലവും കൂടിയേക്കാം.അലങ്കാരങ്ങൾ കുത്തിനിറച്ചും അനുയോജ്യമായമല്ലാത്ത നിറക്കൂട്ടുകൾ നൽകിയും വീടിനെ ശ്രദ്ദേയമാക്കാം എന്ന് കരുതുന്നത്‌ അബദ്ധമാണ്‌.ഇത്തരം കാര്യങ്ങൾ ഏതാനും അൽപായുസ്സാണെന്ന് തിരിചറിഞ്ഞു മിനിമലിസത്തിനു പ്രാധാന്യം നൽകുന്നതായിരിക്കും കൂടുതൽ നല്ലത്‌. ഒരു ഉദാഹരണം നോക്കുക. അടുത്തകാലത്ത് “ട്രേഡീഷണൽ ട്രെന്റിന്റെ“ ഭാഗമായി പലരും ചാരുപടി നമ്മുടെ പല വീടുകളുടേയും വരാന്തകളിൽ സ്ഥാനം പിടിച്ചു.പണ്ടുണ്ടായിരുന്നതിന്റെ വികൃതരൂപങ്ങൾ ഇന്ന് പെട്ടെന്ന്തന്നെ പലർക്കും അരോചകം ആയി തോന്നുവാൻ തുടങ്ങി. ചിലർ അതു പൊളിച്ചുമാറ്റാനും.നൂറ്റാണ്ടുകൾ പഴക്കമുള്ള കെട്ടിടങ്ങൾക്ക് ഇന്നും ഇത് അലങ്കാരമായി വർത്തിക്കുമ്പോൾ മൂന്നോ നാലോ വർഷം മുമ്പ് നിർമ്മിച്ചവക്ക് ഇത് അരോചകമായി മാറി.എന്തെന്നാൽ ഓരോ നിർമ്മിതിക്കും നൽകുന്ന അലങ്കാരങ്ങൾ അതാതിന്റെ “ഫോമിനു” അനുയോജ്യമായ വിധത്തിൽ അല്ലെങ്കിൽ അതിനു അല്പായുസ്സാണെന്ന് ഇതു വ്യക്തമാക്കുന്നു. ബേക്കർ വീടുകൾക്കും അവയുടെ വികൃതാനുകരണങ്ങൾക്കും ഇതു തന്നെ ആണ് പറയുവാൻ ഉള്ളത്. ബേക്കർ വീടുകൾ ചിലവു ചുരുക്കലിന്റെയും ഉപയോഗക്ഷമതയുടേയും മൂർത്തരൂപങ്ങളായപ്പോൾ “ചിലവേറിയ ചിലവുകുറഞ്ഞ വീടുകളായി” അതിന്റെ അനുകരണങ്ങൾ.

പ്ലാൻ എങ്ങെൻ വേണമെങ്കിലും ആയിക്കോട്ടെ എലിവേഷൻ നന്നായി ചെയ്യുക ആളുകൾ കണ്ടാൽ കൊള്ളാം എന്ന് പറയുന്ന ധാരാളം ആളുകളെ കണ്ടിട്ടുണ്ട്‌. പുറം കാഴ്ചകൾ മോശമാക്കണം എന്നല്ല പറഞ്ഞുവരുന്നത്‌ എന്നാൽ പുറം ഭംഗിയേക്കാൾ പ്രാധാന്യം നൽകേണ്ടത്‌ അകത്തെ സൗകര്യങ്ങൾ ഒരുക്കുന്നതിലും വെളിച്ചവും വായുവും യഥേഷ്ടം ലഭിക്കുന്നതിലും ആണെന്നത്‌ മനസ്സിലാക്കുന്നതാകും കൂടുതൽ നന്നാകുക.കാരണം ലക്ഷങ്ങൾ മുടക്കി വീടുവെക്കുമ്പോൾ അതിനകത്ത്‌ താമസിക്കുന്നവരുടെ സൗകര്യത്തിനും സന്തോഷത്തിനും ആകണം പ്രാധാന്യം നൽകേണ്ടത്‌.

പെയ്ന്റിങ്ങിലും ഫ്ലോറിങ്ങിലും റ്റൊയ്ലറ്റ് ഫിറ്റിങ്ങ്സിലും അടുത്തകാലത്ത് വൻ മാറ്റം ആണ് ദൃശ്യമാകുന്നത്.പഴയകാലത്തെതിൽ നിന്നും വ്യത്യസ്ഥമായി ഇന്ന് ആളൂകൾ “ഡ്യൂറബിലിറ്റിക്ക്” പ്രാധാനം കൊടുക്കുന്നില്ല എന്നതാണ് വസ്തുത.ഇപ്പോളത്തെ ഒരു ട്രെന്റിനനുസരിച്ച് പെയ്ന്റും,ടൈലും മറ്റും സെലക്ട് ചെയ്യുന്നു.എന്നാൽ ഈ സ്പെഷ്യൽ കളറുകൾ അല്പം കഴിയുമ്പോൾ സ്പെഷ്യൽ അല്ലാതാകും സ്വാഭാവികമായും ഇത് മാറ്റുവാൻ നിർബന്ധിതമാകും.ഇത് വിപണിയുടെ ഒരു തന്ത്രമാണ്.ഇതിനെ അതിജീവിക്കുവാൻ ലളിതമായ അലങ്കാരങ്ങളും നിറക്കൂട്ടുകളൂം സ്വീകരിക്കുക എന്നതായിരിക്കും ഉചിതമായ മാർഗ്ഗം.

നാട്ടുകാർ മുഴുവൻ "വീടുകൊള്ളാം" എന്ന് പുറമെ നിന്ന് നോക്കി അഭിപ്രായം പറയുമ്പോളൂം അസൗകര്യങ്ങളുടെ നിറകുടമായ ഒരു വീട്ടിൽ താമസിക്കുന്നതിൽ എന്ത്‌ അർത്ഥമാണുള്ളത്‌? വിലകൂടിയ ടെന്റുകൾക്ക്‌ പുറകെ പാഞ്ഞു സമയവും പണവും സ്വസ്ഥതയും നഷ്ടപ്പെടുത്തുന്നത്‌ മണ്ടത്തരം ആണ്‌.മറ്റുള്ളവരുടെ തൃപ്തിയും സന്തോഷവും അല്ല അവനവന്റെ ഇഷ്ടങ്ങളും സൗകര്യങ്ങളും പരിഗണിച്ച്‌ സ്വന്തം സാമ്പത്തീക സ്ഥിതിക്ക്‌ അനുസരിച്ച്‌ പുതിയ സങ്കേതങ്ങളിൽനിന്നും തനിക്ക്‌ അനുയോജ്യമായവയെ ശരിയാംവണ്ണം ഉപയോഗപ്പെടുത്തിക്കൊണ്ട്‌ വീടു നിർമ്മിക്കുന്നതാണ്‌ ബുദ്ധി.

പ്ലാൻ-30

2008-12-04T13:39:00.000+03:00

ഒരു ചെറിയ കുടുമ്പത്തിനു താമസിക്കുവാൻ പറ്റുന്ന രീതിയിൽ പോർചടക്കം (പോർചില്ലതെ 1042 ചതുരശ്രയടി) 1162 ചതുരശ്രയടി വിസ്തീർണ്ണമുള്ള ഒരു വീടിന്റെ പ്ലാനാണിത്‌.രണ്ടു കിടപ്പുമുറികൾക്കും അറ്റാച്ഡ്‌ ബാത്‌റൂമുകൾ നൽകിയിരിക്കുന്നു.കൂടാതെ വസ്ത്രങ്ങൾ സൂക്ഷിക്കുവാൻ വാർഡ്‌റോബും. ലിവിങ്ങ്‌,ഡൈനിങ്ങ്‌ ഏരിയാകളെ ബന്ധിപ്പിക്കുന്ന ഓപ്പണിങ്ങിൽ ഒരു ഭാഗം പ്രത്യേകം ഹാച്‌ കൊടുത്തിരിക്കുന്നത്‌ ശ്രദ്ധിചാൽ കാണാം. ഇവിടെ മരം കൊണ്ടോ മറ്റോ 60x24x210 സെന്റീമീറ്റർ വലിപ്പത്തിൽ ഒരു "ഷെൽഫ്‌" നൽകുക, ഈ ഷെൽഫിനു ഇരുവശത്തും മറവില്ല വെറും തട്ടുകൾ മാത്രം.അതിൽ ഓരോ തട്ടിലും ചെറിയ കൗതുക വഷ്ടുക്കൾ വെക്കാം.എന്തെങ്കിലും ഫംഗ്ഷനോ മറ്റോ വരുമ്പോൾ എതു മാറ്റിയാൽ കൂടുതൽ സൗകര്യം ഉണ്ടാകും.

മുകൾ നില തൽക്കാലം നിർമ്മിക്കുന്നില്ലെങ്കിൽ സ്റ്റെയർക്കേസ്‌ ഏരിയ മാത്രം മുകളിലേക്ക്‌ എടുത്ത്‌ അതിനു ട്രസ്സ്‌ ഉപയോഗിച്‌ താൽക്കാലിക റൂഫ്‌ കൊടുത്ത്‌ നിർത്തുക.സ്റ്റെയർ കേസിനു സമീപം ഉള്ള വാഷ്ബേസിൻ ടൊയലറ്റിലേക്ക്‌ അൽപം നീക്കിവെചാൽ നന്നാകും. ആർഭാടങ്ങൾ ഒഴിവാക്കി ഏകദേശം 7.5 ലക്ഷത്തിനു നിർമ്മാണം പൂർത്തിയാക്കുവാൻ കഴിഞ്ഞാൽ നന്നാകും.ചെറിയ പ്ലോട്ടിനു അനുയോജ്യം.

ഗൃഹനിർമ്മാണവും സാമ്പത്തീക മാന്ദ്യവും

2008-11-27T15:37:00.004+03:00

കമ്പോള വ്യവസ്ഥിതിയുടെ പരീക്ഷണ ശാലയാണിന്ന് കേരളം. വസ്ത്രമായാലും,പാർപ്പിടമായാലും,ഭക്ഷണമായാലും കമ്പോളത്തിന്റെ ശക്തമായ പുറംതോടിനെ ഭേധിച്ച് പുറത്തുകടക്കുവാൻ മലയാളിയുടെ മനസ്സിനു കഴിയുന്നില്ല. പാർപ്പിട നിർമ്മാണ രംഗം ഇന്ന് ട്രന്റുകളുടെ വിശാലാമായ മേച്ചിൽ പുറങ്ങൾ മലയാളിക്ക് മുമ്പിൽ തുറന്നിടുന്നു. അതിന്റെ പ്രലോഭനങ്ങളെ അതിജീവിക്കുവാൻ സാധിക്കാതെ ഈയ്യാം പാറ്റകളെ പോലെ മലയാളി കടമെന്ന അഗ്നിനാളത്തിലേക്ക് പറന്നടുത്ത് സ്വയം ഉരുകുന്നു. നാലോ അഞ്ചോ പേർ വരുന്ന ഒരു ശരാശരി മലയാളികുടുമ്പത്തിനു എന്തിനു ഇരുപതു ലക്ഷം രൂപക്ക് മുകളിൽ ചിലവിടണം? ആർഭാടത്തിന്റെ അവസാനവാക്കാവണം നഗരത്തിന്റെ നടുക്കാകണം സ്വന്തം വീടെന്ന് ചിന്തിച്ച് ഭീമമായ കടംവരുത്തിവെക്കുന്നവൻ സ്വയം അനർഥമാണ് വരുത്തിവെക്കുന്നത്.

ആഗോള സാമ്പത്തീക പ്രതിസന്ധി കേരളത്തേയും ബാധിക്കും എന്ന് കേരളത്തിന്റെ ധനമന്ത്രി സൂചിപ്പിച്ചുകഴിഞ്ഞു.പ്രവാസികളെ സംബന്ധിച്ച് ആഗോള സമ്പത്തീക പ്രതിസന്ധി ഇരുതല മൂർച്ചയുള്ള വാളാണ്.ഗൾഫുമേഘലയിൽ ഉണ്ടാകുന്ന പ്രതിസന്ധി അവന്റെ ബിസിനസ്സിനെ/ജോലിയെ സാരമായി ബാധിക്കും. എണ്ണയുടെ വില കുറയുകയും കൺഷ്ട്രക്ഷൻ,റിയൽ എസ്റ്റേറ്റ് രംഗത്ത് വലിയ തോതിൽ ഇടിവൂ സംഭവിക്കുകയും ചെയ്യുന്ന സാഹചര്യത്തിൽ പ്രവാസി മലയാളിയുടെ അവസ്ഥ തീർത്തും ആശങ്കാജനകം ആണ്.ഈ ഒരു അവസ്ഥയിൽ ജോലി നഷ്ടപ്പെട്ടാൽ കേരളം പോലെ ഒരു നാട്ടിൽ ഇക്കൂട്ടർ എന്തു ചെയ്യും?
സ്വന്തം വീടിനായും അടുത്ത തലമുറക്ക് ഒരു നിക്ഷേപമെന്ന നിലയിലും പ്രവാസികൾ ഇന്ന് കേരളത്തിലെ നിർമ്മാണ മേഘലയിൽ ചിലവിടുന്നത് കോടികൾ ആണ്. (ഇതിൽ പലർക്കും തങ്ങളുടെ നിക്ഷേപത്തിന്റെ യദാർഥ മൂല്യവും തങ്ങൾ ചിലവിടുന്ന് തുകയും തമ്മിലുള്ള അന്തരം പോലും അറിയില്ല എന്നാണ് തോന്നുന്നത്) എന്നാൽ ഒരു സാമ്പത്തീക മാന്ത്യം വന്നാൽ നിങ്ങൾ ഉദ്ദേശിക്കുന്ന വിലക്ക് ഒരു പക്ഷെ കൈവശം ഉള്ള പ്രോപ്പർടികൾ വിറ്റു പോകണം എന്നില്ല.അത്തരം സാഹചര്യത്തിൽ കയ്യിൽ/ബാ‍ങ്കിൽ ലിക്വിഡ് ക്യാഷ് ഇല്ലെങ്കിൽ ജീവിതം ദുസ്സഹമായിരിക്കും.

താമസിക്കാനാണെങ്കിൽ ലളിതമായ ആർഭാടങ്ങളില്ലാത്ത വീടുകളെ കുറിച്ച് ചിന്തിക്കുന്നതാകും ഇന്നത്തെ സാഹചര്യത്തിൽ പ്രവാസികൾക്ക് പ്രത്യേകിച്ച് ഇടത്തരക്കർക്ക് അഭികാമ്യം. ബേക്കർജിയെപ്പോലുള്ള മഹാന്മാർ ചിലവുകുറഞ്ഞ ഉത്തമമായ നിരവധി മാതൃകകൾ നമുക്ക് മുമ്പിൽ നിർമ്മിച്ചുവച്ചിട്ടാണ് പോയത്.അത്തരം മാതൃകകളെ പിന്തുടരുവാൻ ശ്രമിച്ചാൽ പാർപ്പിട നിർമ്മാണ രംഗത്തെ അനാവശ്യമായ ചിലവുകൾ നമുക്ക് ഒഴിവാക്കാം.പ്രകൃതിക്കും അതുതന്നെയാണ് നല്ലത്.

നല്ല ഒരു ഡിസൈനറൂടെ ഉപദേശപ്രകാരം മികച്ച പണിക്കാരെ തിരഞ്ഞെടുത്ത് കൃത്യമായ പ്ലാനിങ്ങോടെ മാത്രം വീടുനിർമ്മിക്കുവാൻ ആരംഭിക്കുക.മറ്റുള്ളവർ അല്ല നിങ്ങൾ പണിയുന്ന വീട്ടിൽ താമസിക്കുന്നത് അതുകൊണ്ടുതന്നെ അന്യന്റെ “സൌകര്യങ്ങൾ”ക്കല്ല നിങ്ങളുടെ ആവശ്യങ്ങൾക്കും സാമ്പത്തീക സ്ഥിതിക്കും ആയിരിക്കണം പ്രാധാന്യം നൽകേണ്ടത്.
വീടു നിർമ്മാണത്തിൽ ഇന്നു മരം,ഫ്ലോറിങ്ങ്,ഇൽക്ട്രിക്കൽ എന്നിവക്കായി ചിലവിടുന്നത്.തെക്കുതന്നെ വേണം എന്ന നിർബന്ധം ഒഴിവാക്കുക.പൊളിക്കുന്ന പഴയ കെട്ടിടങ്ങളുടെ ഉരുപ്പടികാളിൽ നിന്നും പരമാവധി പ്രയോജനപ്പെടുത്തുക. ഫ്ലോറിങ്ങിനു ചിലവുകുറഞ്ഞ ടൈൽ തിരഞ്ഞെടുക്കാം.തൽക്കാലം ടൈലിനു പകരം നല്ല “കരി” (ഓക്സൈഡ്) ഇട്ട് ഫിനിഷ് ചെയ്താലും കുഴപ്പം ഒന്നും സംഭവിക്കീല്ല.ആവശ്യത്തിനുമാത്രം “ ഇലക്ടിക്ക് പോയന്റുകൾ”നൽകുക. ചുമരിൽ പുട്ടിയിട്ട് മിനുക്കിയില്ലേലും കുഴപ്പം ഇല്ലെന്ന് സ്വന്തം മനസ്സിനെ ബോധ്യപ്പെടുത്തുക.

മനസ്സമാധാനത്തോടെ സ്വന്തം വീട്ടിൽ കഴിയൂവാൻ പരമാവധി കടബാധ്യതകൾ ഒഴിവാക്കുക തന്നെ ആയിരിക്കും ഏറ്റവും ഉചിതമായ നടപടി.സാമ്പത്തീക മാന്ത്യം ഒക്കെ മാറി നിക്ഷേപങ്ങൾക്ക് അവസരം വരും അതിനായി ഇന്ന് കടം വാങ്ങി എന്തിനു സ്വസ്ഥത കളയണം?

പിന്മൊഴി: ചായകുടിക്കുവാൻ ചായലത്തോട്ടം വാങ്ങണോന്ന് പണ്ടുള്ളവർ ചോദിക്കാറുണ്ട് അതു തന്നെ ആണെന്നിക്കും ചോദിക്കാനുള്ളത് വല്ലപ്പോളും “ചന്ദ്രനിൽ പോകണം“ എന്ന് കരുതി എല്ലാ സൌകര്യങ്ങളും ഉള്ള താമസം സുലഭമാണെങ്കിൽ പിന്നെ അവിടെ വീടു നിർമ്മിക്കണോ/വാങ്ങണോ?
ഇത് ആരെയെങ്കിലും ഭയപ്പെടുത്തുവാനോ അല്ലെങ്കിൽ ആരെയെങ്കിലും ഇകഴ്ത്തിക്കാണിക്കുവാനോ എഴുതിയ കുറിപ്പല്ല.പ്രവാസികളുടെ നന്മക്ക്വേണ്ടിമാത്രം.

കോർറ്റ്‌യാഡിന്റെ ഡീറ്റെയിൽസ്‌.

2008-11-23T08:49:00.002+03:00

എന്റെ പല പ്ലാനുകളിലും കോർറ്റ്‌യാഡ്‌ കൊടുക്കാറുണ്ട്‌.കോർറ്റ്‌യാഡിന്റെ സുരക്ഷിതത്വത്തെ കുറിച്ച്‌ പലർക്കും ഇനിയും സംശയം ഉണ്ട്‌.എന്നാൽ കോർറ്റ്‌യാഡിന്റെ മുകളിൽ 10-12 സെന്റീമീറ്റർ ഇടവിട്ട്‌ ചെറിയ ബീമുകൾ നൽകിയാൽ ആളുകൾ അകത്തുകടക്കില്ല എന്ന് ഒന്നുരണ്ടിടത്ത്‌ ഞാൻ അത്‌ വിശദമാക്കുകയും 10-12 സെന്റീമീറ്റർ വീതിയുള്ള ചെയ്തിരുന്നു. ഒരു ചിത്രത്തിന്റെ സഹായം ഉണ്ടെങ്കിൽ കൂടുതൽ നന്നായിരിക്കും എന്ന് പല വായനക്കാരും അറിയിച്ചു. അതിനാൽ ഞാൻ ഇവിടെ ഒരു സെക്ഷൻ നൽകുന്നു. ഇത്‌ ഒരു സാധരണ മാതൃക മാത്രം ആണ്‌. വ്യത്യസ്ഥമായ ഡിസൈൻ ഇതിൽ കൊണ്ടുവരാവുന്നതാണ്‌. ശക്തമായ മഴയുള്ളപ്പോൾ കോർട്‌യാഡിനോട്‌ ചേർന്നുള്ള തുറന്ന ഇടങ്ങളിലേക്ക്‌ "ശീതൻ" ഉണ്ടാകില്ലേ എന്ന് പലരും സംശയം പ്രകടിപ്പിക്കാറുണ്ട്‌. എന്നാൽ വല്ലപ്പോഴും മാത്രമേ ശക്തമായ ശീതൻ ഉണ്ടാകൂ.ആ സമയത്ത്‌ താൽകാലികമായി പ്ലാസ്റ്റിക്ക്‌ ഷീറ്റ്‌ കൊണ്ട്‌ "ശീതൻ" തടയാം. (ശീതൻ എന്ന വക്ക്‌ കാറ്റിൽ പറന്നുവരുന്ന വളരെ ചെറിയ മഴത്തുള്ളികൾ എന്നാണ്‌ അർത്ഥമാക്കുന്നത്‌. )

കോർട്‌യാഡ് വീടിന്റെ മധ്യഭാഗത്താണ് കൊടുക്കുന്നതെങ്കിൽ വെള്ളം പുറത്തേക്ക് ഒഴുകി പോകുവാൻ അടിയിലൂടെ പൈപ്പ് കൊടുക്കേണ്ടതാണ്.ഇതിൽ മണ്ണോ,ഇലകളും മറ്റും വീണോ വെള്ളം ഒഴുകിപോകുവാൻ ബുദ്ധിമുട്ടുണ്ടാക്കുന്ന മറ്റു തടസ്സങ്ങളോ വരാതിരിക്കുവാൻ വേണ്ട മുൻ‌കരുതൽ എടുക്കുന്നത് നന്നായിരിക്കും.സാധാരണ ഗതിയിൽ കോർട്യാഡിന്റെ അടിഭാഗം കോൺക്രീറ്റ് ഇടാതിരിക്കുന്നതാവും നന്നാവുക.കോർട്യാഡിന്റെ അടിഭാഗം മണലും ചെറിയ വെള്ളാരം കല്ലുകൾവിരിച്ച് ഭംഗിയാക്കാം.ആകർഷകമായ ചെടികൾ വച്ച് പ്രക്രിതിയേ അകത്തേക്ക് കൊണ്ടുവരികയുമാവാം.

ക്ഷമയും കലയും ചേർത്ത് ബോൺസായ്

2008-10-20T11:03:00.012+03:00

ചിത്രത്തിനു കടപ്പാട് ഗൂഗിൾ സെർച്ചിനോടും ഇന്റർ നെറ്റിൽ ഈ ചിത്രം പ്രസിദ്ധീകരിച്ചവരോടും.

പ്രക്രിതിയിലെ മരങ്ങളുടെ വളർച്ചമുരടിപ്പിച്ച ചെറുപതിപ്പുകൾ ഒറ്റക്കോ കൂട്ടമായോ വളർത്തുന്ന ഒരു “കല”യാണ് ബോൺസായ്. ക്ഷമയും കലാവാസനയും ഉണ്ടെങ്കിൽ മാത്രവ്രക്ഷത്തിന്റെ എല്ലാവിധ ഗുണങ്ങളും പ്രത്യേകതകളും ഈ ചെറുമരങ്ങളിലേക്ക് കൊണ്ടുവരുവാൻ നമുക്ക് സാധിക്കും.മാത്രവിക്ഷത്തിന്റെ സ്വഭാവമനുസരിച്ച് സമയാ സമയങ്ങളിൽ പൂക്കുകയും കായ്ക്കുകയും ഇലപൊഴിയുകയും ചെയ്യുന്ന ബോൺസായ് മരങ്ങൾ ഒരു കൌതുകം തന്നെയാണ്. 2000 വർഷങ്ങൾക്ക് മുമ്പ് ചൈനയിലാണ് ബോൺസായിയുടെ ഉൽഭവം എന്ന് പറയപ്പെടുന്നു.ഏതാണ്ട് ആ കാൽഘട്ടത്തിൽ തന്നെ ജെപ്പാനിലും,കൊറിയയിലും മറ്റും ഇതിനു വൻ പ്രചാരം ഉണ്ടായി.

ആൽ,പുളി,മാവ്,പൂമരം,സപ്പോട്ട,ബെഞ്ചമിൻ,നാരകം,നെല്ലി,ബോഗൺ വില്ല,മുള,കള്ളിച്ചെടി എന്നിവയാണ് നമ്മുടെ നാട്ടിൽ പ്രധാനമായും ബോൺസായി ആക്കുവാൻ ആളുകൾ തിരഞ്ഞെടുക്കുന്ന മരങ്ങൾ.ഇതിൽ തന്നെ ആൽ മരത്തിന്റെ വിവിധ ഇനങ്ങളോടാണ് ആളുകൾക്ക് കൂടുതൽ താല്പര്യം.

പൊക്കം അനുസരിച്ച് ബോൺസായിയെ തരം തരം തിരിക്കുന്നത് ഒരു രീതിയാണ്.2.5-7.5 സെന്റീമീറ്റർ പൊക്കമുള്ളവയെ ടൈനി എന്നും,13-25 സെനീമീറ്റർ വരെ ഉയരം ഉള്ളവയെ സ്മോൾ വിഭാഗത്തിൽ പെടുത്തിയിരിക്കുമ്പോൾ മീഡിയത്തിൽ വരുന്നത് 40 സെന്റീമീറ്റർ വരെ പൊക്കം ഉള്ളവയെ ആണ്.തുടർന്ന് വരുന്ന മീഡിയം ലാർജിൽ 40-60 സെന്റീമീറ്റർ ഉയരം ഉള്ളവയെ ഉൾപ്പെടുത്തിയിരിക്കുന്നു. അതിനു മുകളിൽ 120 സെന്റീമീറ്റർ വരെ ഉള്ളവ ലാർജ് വിഭാഗത്തിൽ പെടുന്നു.

വളർത്തുന്ന രീതിക്കനുസരിച്ച് തരംതിരിക്കുന്നത് കൂട്ടായി ഒരു വനത്തിന്റെ പ്രതീതിയുണ്ടാക്കുന്നവ, പാറക്കൂട്ടങ്ങൾക്കിടയിലൂടെ വേരുകൾ പറ്റിപ്പിടിച്ച് വളരുന്നത്, പടർന്ന് പന്തലിച്ച് “വൻ വ്രിക്ഷമായി” നിൽക്കുന്നത്,കാറ്റത്ത് ഒരുവശത്തേക്ക് ചരിഞ്ഞ് നിൽക്കുന്നപോലെയുള്ളത്,ഒരു ഭാഗം ഉണങ്ങിയത് എന്നിങ്ങനെ ആണ്. (ഇനിയും കൂടുതൽ രീതികൾ ഉണ്ടത്രെ)

ബോൺസായ് ഉണ്ടാക്കുവാൻ:
ബോൺസായ് നിർമ്മിക്കുവാൻ ആദ്യപടിയായി ചെയ്യേണ്ടത് തങ്ങൾക്ക് ഇഷ്ടപ്പെട്ട മരവും വളത്തെണ്ടരീതിയും നിശ്ചയിക്കുക എന്നതാണ്. അതിനുശേഷം അനുയോജ്യമായ വ്രക്ഷത്തൈ ശേഖരിക്കണം.മരപ്പൊത്തുകൾ,മതിലുകൾ,തുടങ്ങി കെട്ടിടങ്ങളുടെയും മറ്റും വശങ്ങളിൽ പറ്റിപ്പിടിച്ച് വളരുന്ന ചെടികളെ ശേഖരിക്കുന്നതായിരിക്കും നന്നാവുക. ഇങ്ങനെ ലഭിക്കാത്തപക്ഷം അനുയോജ്യമായ ആക്രിതിയുള്ള കൊമ്പുകൾ മാത്രവ്രക്ഷത്തിൽ നിന്നും ഗ്രാഫ്റ്റ് ചെയ്ത് എടുക്കുകയും ആകാം. സ്വാഭാവികമായ വളർച്ചയെ മുരടിപ്പിക്കുവാൻ ആയി അവയെ താശ്ചകുറഞ്ഞ ചട്ടിയിൽ മണൽ,ചകിരി,പാറ/ചരൽ എന്നിവയുടെ മിശ്രിതം നിറച്ച് അതിൽ നടുക. വർഷത്തിൽലൊരിക്കലെങ്കിലും ഈ മിശ്രിതം മാറ്റുക. മറ്റു ചെടികൾക്ക് നൽകുന്നതിലും കുറച്ച് വെള്ളം ഒഴിച്ചാൽ മതിയാകും. ചട്ടിക്ക് ആവശ്യത്തിനു ദ്വാരങ്ങൾ ഇട്ടില്ലെങ്കിൽ വേരു ചീഞ്ഞുപോകുവാൻ സാധ്യതയുണ്ട്. ഇന്റോർ ചെടികളാണെങ്കിൽ ഇടക്ക് പുറത്ത് വച്ച് സൂര്യപ്രകാസം കൊള്ളിക്കുന്നത് നല്ലതാണ്.അതുപോലെ സൂര്യപ്രകാശം ഏതെങ്കിലും വശത്തുനിന്നും ലഭിക്കുന്ന ഇടത്താണ് ചെടിവച്ചിരിക്കുന്നതെങ്കിൽ അതിന്റെ വളർച്ച ആ ദിശയിലേക്ക് പോകുന്നത് ശ്രദ്ധിക്കണം.

ചെടി നട്ട് അത് വളരുവാൻ തുടങ്ങിയാൽ അതിന്റെ കൊമ്പുകൾ സമയാ സമയങ്ങൾ പ്രൂൺ ചെയ്യേണ്ടതുണ്ട്.അതുപോലെ കൊമ്പുകളുടെ ആക്രിതി നിയന്ത്രിക്കുവാൻ ചെമ്പ് കമ്പിയോ അലുമിനിയം കമ്പിയോ ഉപയോഗിച്ച് മുൻ നിശ്ചയിച്ച രീതിയിൽ കൊണ്ടുവരാം. തടിയിൽ കമ്പി ചുറ്റുന്നത് പഴമ തോന്നിപ്പിക്കുവാൻ ഉപകരിക്കും, പക്ഷെ അത് മരത്തിന്റെ തടിയിൽ പൂണ്ടുപോകാതെ ശ്രദ്ധിക്കണം.പേരാൽ പോലെ തടിയിൽ നിന്നും വേരു തഴേക്ക് വളരുന്നവയെ പ്രത്യേകം ശ്രദ്ധിക്കണം. റോക്കിനു മുകളിൽ വേരുകൾ പടരുന്ന രീതിയിൽ ബോൺസായ് ചെയ്യുവാൻ ഉദ്ദേശിക്കുന്നു എങ്കിൽ ആദ്യം പാറയുടെ മേലെ ചെടിവച്ച് ചുറ്റും മണ്ണും മറ്റു മിശ്രിതങ്ങളും നിറക്കുക. തുടർന്ന് വേരുകൾ വളർന്ന് ഇറങ്ങുമ്പോൾ ഈ ഭാഗത്തെ മണലും മറ്റു മിശ്രിതങ്ങളും മാറ്റിയാൽ മതി.ഈ വേരുകളെയും മേല്പറഞ്ഞ രീതിയിൽ കമ്പികൊണ്ട് ചുറ്റി ആക്രിതിയും പഴമയും വരുത്താവുന്നതാണ്. ചട്ടികൾ വീടിനു പുറത്ത് മണൽ ഉള്ളയിടത്താണ് സൂക്ഷിക്കുന്നതെങ്കിൽ ബോൺസായി മരത്തിന്റെ വേരുകൾ ചട്ടിയിലെ ദ്വാരങ്ങൾ വഴി പുറത്തേക്ക് വളരുന്നത് ശ്രദ്ധിക്കണം. അല്ലാത്തപക്ഷം അത് മണ്ണിൽ നിന്നും വെള്ളവും വളവും വലിച്ചെടുത്ത് തഴച്ചുവളരുവൻ ഉള്ള സാധ്യതയുണ്ട്.

വർഷങ്ങളുടെ പ്രയത്നം കൊണ്ടുമാത്രമേ ഒരു നല്ല ബോൺസായ് ഉണ്ടാക്കിയെടുക്കുവാൻ പറ്റൂ. പതിറ്റാണ്ടുകളുടേയുംനൂറ്റാണ്ടുകളൂടേയും പഴക്കമുള്ള ബോൺസായ്കൾ ഉണ്ട്.പ്രായം കൂടും തോറും ഇവയുടെ മൂല്യവും വർദ്ധിക്കുന്നു. ഈ കുഞ്ഞൻ മരങ്ങൾ പല സ്ഥാപനങ്ങളിലേയും ഇന്റീരിയറിന്റെ ഭാഗമായി ഇടം പിടിച്ചിരിക്കുന്നു. പെട്ടെന്ന് വളർത്തീയെടുക്കാൻ പറ്റാത്തതിനാൽ ബോൺസായ്ക്ക് ഇന്ന് മാർക്കറ്റിൽ നല്ല ഡിമാന്റുണ്ട്.വലിയ മുതൽ മുടക്കില്ലാത്തതും അധികം സമയം ചിലവിടണ്ടാത്തതുമായ ഒരു വരുമാന മാർഗ്ഗമായി ബോൺസായിയെ കാണാവുന്നതാണ്,ഇതിനായി ടെറസ്സോ മുറ്റത്ത് പ്രത്യേകം തയ്യാറാക്കിയ ഇടമോ ഉപയോഗിക്കാം. വ്യാവസായികമായി വളർത്തിയില്ലെങ്കിലും ഒന്ന് ശ്രമിച്ചാൽ സ്വീകരണമുറിയിലോ കോർട് യാഡിലോ അലങ്കാരത്തിനായി ഒരു ബോൺസായി സ്വന്തായി ഒരുക്കാവുന്നതാണ്.

ചൈനയിലും, ജപ്പാനിലും മറ്റും പാരമ്പര്യമായി അടുത്ത തലമുറക്ക് കൈമാറ്റം ചെയ്യുന്നതും, വിവാഹ സമ്മാനമായി നൽകുന്നതുമെല്ലാം പ്രചാരത്തിൽ ഉണ്ടായിരുന്നത്രെ!

വാൽമൊഴി:സ്വാഭാവികമായ വളർച്ചമുരടിപ്പിച്ച് നിയന്ത്രണങ്ങളോടെ വളർത്തുന്ന ബോൺസായിയെ എതിർക്കുന്നവരും വ്രിക്ഷങ്ങളോടുള്ള ക്രൂരതയാണിതെന്ന് പറയുന്നവരുമായ പ്രക്രിതി സ്നേഹികൾ ഉണ്ട്.

നിലാവൊഴുകുന്ന വീട്

2008-10-09T08:20:00.000+03:00

നല്ല നിലാവുള്ള രാത്രിയിൽ ഇലക്ട്രിക്ക് ബൾബുകളുടെ പ്രകാശമില്ലാതെ ചന്ദ്രന്റെ പാൽ‌വെളിച്ചം പരന്നൊഴുകുന്ന അകത്തളങ്ങൾ ഉള്ള ഒരു വീടിനെ കുറിച്ച് ഒന്ന് ഓർത്തുനോക്കിയേ.തിരക്കുപിടിച്ച ആധിഉനിക ജീവിതത്തിൽ മനസ്സിനു സ്വസ്തതയും സമാധാനവും നൽകുവാൻ ഇത്തരം വീടുകൾക്ക് കഴിഞ്ഞേക്കും.ഇതിനായി വീടിനകത്ത് ചെറിയ ഒരു നടുമുറ്റം നൽകിയാൽ മാത്രം മതി.

മൂന്നു കിടപ്പുമുറികളോടുകൂടിയ “കേരളീയ ശൈലിയിൽ” ഒരു വീടെന്ന് പറയുന്ന ഒത്തിരി ആളുകൾ ഉണ്ട്. അത്തരക്കാർക്കു വേണ്ടി ഒരു “സൈഡ് മുറ്റവും“ ചരിഞ്ഞ മേൽക്കൂരയും മുഖപ്പും ചാരുപടിയും കൊടുത്ത് ഡിസൈൻ ചെയ്ത വീടാണിത്.വായു സഞ്ചാരം യഥേഷ്ടം ലഭിക്കാവുന്ന വിധത്തിൽ ആണ് ഈ വീടിന്റെ ഡിസൈൻ.കോർടുയാഡ് ഉള്ളതിനാൽ വായുവും വെളിച്ചവും ഇതിനകത്ത് യഥേഷ്ടം ലഭ്യമാകും.കോർട്യാഡിൽ ചെറിയ കല്ലുകളോ ചെടികളോ വച്ച് അലങ്കരിക്കാം. ചൂടുള്ള മാസങ്ങളിൽ ഇവിടെ വെള്ളം ഒഴിച്ചുകൊടുത്തൽ വീടിനകത്ത് തണുപ്പ് അനുഭവപ്പെടും. ഡ്രോയിങ്ങ് റൂമിനും ഡൈനിനും കണക്റ്റീവായിട്ടാണ് കോർടുയാഡ് ഒരുക്കിയിരിക്കുന്നത്.കൂടാതെ നടുമുറ്റത്ത് പെയ്തിറങ്ങുന്നത് നിലാവായാലും മഴയായാലും കിടപ്പുമുറിയിൽ നിന്നും ഉള്ള വലിയ ജനൽ തുറന്നിട്ടാൽ നിങ്ങൾക്ക് അത് കിടന്നുകൊണ്ടുതന്നെ ആസ്വദിക്കാം.സ്വകാര്യതക്ക് ജനൽ കർട്ടൻ ഇടുകയും ആകാം.ഇതൊരു പ്രത്യേക അനുഭവം ആയിരിക്കും എന്നതിനു സംശയം ഇല്ല.

പോർച്ചിൽ നിന്നും കയറുന്നത് വരാന്തയിലേക്കാണ്.സാധാരണയിൽ നിന്നും വ്യത്യസ്ഥമായി വലിയ നീളൻ വരാന്ത ഒഴിവാക്കിയിരിക്കുന്നു എന്നാൽ അവിടെ ചാരുപടി നൽകുന്നതിനുള്ള സ്ഥലം ഉണ്ട്താനും.ലിവിങ്ങ് റൂമിൽ പരമാവധി സ്പേസ് ഉപയോഗപ്രദമാക്കുവാൻ “സി” ആക്രിതിയിൽ ആണ് ഇരിപ്പിട സംവിധാനമ ഒരുക്കിയിരിക്കുന്നത്. ഡൈനിങ്ങ് ഏരിയായിൽ ക്രോക്കറി ഷെ‌ൽ‌ഫിനുള്ള സ്ഥാനം പ്രത്യേകം ഒരുക്കിയിരിക്കുന്നു.

രണ്ടു കിടപ്പുമുറികളിൽ വാർഡ് റോബ് സൌകര്യം ഒരുക്കിയിരിക്കുന്നു. ഒരു കോമ്മൺ അടക്കം മൂന്നു ടോയ്ലറ്റുകൾ.അതിൽ ഡ്രൈ ഏരിയായും വെറ്റ് ഏരിയായും വേർതിരിച്ചിരിക്കുന്നു.ആധുനിക സൌകര്യങ്ങൾ ഒരുക്കാവുന്ന ഒരു അടുക്കളയും.അതിനോടു ചേർന്നു സ്റ്റോറേജ് സ്പേസും ഉണ്ട്.ഇവിടെ സ്റ്റോറിന്റെ വാതിൽ നെറ്റ് ഉള്ള ഇരുമ്പ് ഫ്രേമിൽ ചെയ്താൽ നന്നായിരിക്കും സ്റ്റോറ് റൊoഒമിൽ വായുവും വെളിച്ചവും നിർബന്ധമാണ്.ഇല്ലെങ്കിൽ പൂപ്പൽ സാധ്യത കൂടും.ഇനി അല്പംകൂടെ നന്നാക്കുവാൻ സ്റ്റോറിനോടു ചേർന്നുള്ള റ്റോയ്‌ലറ്റിന്റെ റൂഫ് താഴ്ത്തി വാർത്ത് അവിടെ വെന്റിലേറ്റർ നൽകുകയും ആകാം. പുറത്ത് കിച്ചൺ-2ൽ വിറക് അടുപ്പ് സജ്ജീകരിച്ചിരിക്കുന്നു. വാഷിങ്ങ് മെഷീനിനുള്ള സൌകര്യവും അവിടെ ഒരുക്കാം.കിച്ചൺ-2നു പുറത്ത് അമ്മിയും മറ്റും ഇടുവാൻ ഒരു ചെറിയ ഏരിയായും ഉണ്ട്.

കാവി/ബ്രിക്ക് റെഡ് നിറത്തിലുള്ളടൈലും ചുമരിനു ഐവറികളറും നൽകിയാൽ നന്നായിരിക്കും.കൂടാതെ ബെഡ്രൂമുകളിൽ ഒരു ചുമരിനു അല്പം കടും നിറങ്ങൾ ആകാം.കോർടുയാഡിന്റെ വിന്റോ വരുന്ന ചുമരിൽ അല്പം ഹരിതാഭനൽകിയാൽ കൂടുതൽ നന്നാകും.ബാത്രൂമിലെ ടൈലുകൾക്കിടയിൽ അല്പം സ്പെഷ്യൽ കളറുകൾ മിക്സ് ചെയ്ത് ഒട്ടിക്കുകയും ആകാം.

1644 + പോർച്ച് 119 (1763)ചതുരശ്രയടി വിസ്തീർണ്ണമുള്ളതാണീ വീട്. ചിലവ് ഏകദേശം 16 ലക്ഷം മുതൽ മേളിലോട്ട് പ്രതീക്ഷിക്കാം.

വാൽമൊഴി:കോർടുയാഡ് നൽകിയാൽ വീടിനകത്ത് കള്ളൻ കയറും,ഇടിമിന്നുമ്പോൾ അപകടം സംഭവിക്കും എന്നൊക്കെ ആളുകൾ പറഞ്ഞേക്കാം. അത് കാര്യമാക്കണ്ട.കള്ളൻ കയറാതിരിക്കുവാൻ കോർട്യാഡിന്റെ മേൾഭാഗത്ത് സംവിധാനം ഒരുക്കിയാൽ മതി

വിജയദശമി ആശംസകൾ

2008-10-09T07:20:00.001+03:00

തിന്മയുടെ മേൽ നന്മ വരിച്ചവിജയത്തിന്റെ ഈ ദിനത്തിൽ എല്ലാ വായനക്കാർക്കും,ആദ്യാക്ഷരത്തിന്റെ ഹരിശ്രീകുറിക്കുന്ന കുരുന്നുകൾക്കും പാർപ്പിടത്തിന്റെ ആശംസകൾ.

കുരുന്നുകളേ നിങ്ങൾ വായിച്ചും എഴുതിയും വളരുക.വിവേകത്തോടെ വെളിച്ചത്തിന്റെ ലോകത്ത് ഉദയസൂര്യന്മാരെ പോലെ ശോഭിക്കുക.വെളിച്ചം ദുഖമാണുണ്ണീ എന്ന് പറയുന്നവരുടെ ഈ ലോകത്ത് തമസ്സിന്റെ ലോകത്തേക്ക് നയിക്കുവാൻ ഒരുപാടുപേർ ഉള്ള ഈ ലോകത്ത് തമസ്സിനെ നിഗ്രഹിക്കുന്ന വെളിച്ചത്തിന്റെ നാമ്പാകട്ടെ നിങ്ങൾ ഓരോ കുഞ്ഞുങ്ങളും.

മഹത്തായ പാരമ്പര്യം ഉള്ള ഒരു സംസ്കാരത്തിന്റെ ഉടമകൾ ആണ് ഓരോ ഭാരതീയനും. പുരോഗമനത്തിന്റെ പേരുപറഞ്ഞും മറ്റാരുടെ ഒക്കെയോ അജണ്ടകൾ നടപ്പിലാക്കുവാൻ വേണ്ടിയും സാംസ്കാരിക ബിംബങ്ങളേയും, ആചാരങ്ങളേയും വർഗ്ഗീയതയുടെ കളങ്ങളിൽ തളച്ചിടലും തച്ചുടക്കലും ഇന്നൊരു പതിവായിരിക്കുന്നു. ഭാരതീയതയെ തള്ളിപ്പറയുക അല്ല മറിച്ച് അതിന്റെ നന്മകളെ ഉൾക്കൊള്ളാനാണ് നാം ശ്രമിക്കേണ്ടത്. ഭ്രാമാത്മകമായ ചില ചിന്തകൾ നിങ്ങൾക്ക് പകർന്നു നൽകി സ്വന്തം സംസ്കാരത്തെകുറിച്ച് വിലകുറഞ്ഞ വീക്ഷണങ്ങൾ പകരുവാൻ ശ്രമിക്കുന്നവർ എന്താണ് ചെയ്യുന്നതെന്ന് സ്വയം വിലയിരുത്തുക.

ചതുരങ്ങൾ കൊണ്ടൊരു വീട്

2008-09-25T10:43:00.006+03:00

“ചതുരങ്ങൾ കൊണ്ടൊരു വീട്“ എന്ന ആശയം വച്ച് ഒരു വീടൊരുക്കണം എന്ന ആഗ്രഹപ്രകാരം ഒരു സുഹ്രത്തിനു വേണ്ടി ഉണ്ടാക്കിയ ഒരു ഡിസൈനാണിത്. കണ്ടുമടുത്ത ഓടുപതിച്ച ചരിച്ചുവാർക്കുന്ന മേൽക്കൂരക്കുപകരം “ഫ്ലാറ്റ് റൂഫ്” വ്യത്യസ്ഥ ലെവലുകളിൽ കൊടുക്കുവാൻ ഉദ്ദേശിക്കുന്നു.ഇതിനായിട്ടാണ് അവിടാവിടെ ചില കട്ടിങ്ങുകൾ കൊടുത്തിരിക്കുന്നത് .

കൂടുതൽ വിശദമായി പിന്നീട് എഴുതാം.

(ത്രിശൂരിലെ പ്രമുഖ ആർക്കിടെക്റ്റ് ലിജോയുടെ ഡിസൈനൂകൾ കണ്ടിട്ടാകണം ഇദ്ദേഹത്തിനു ഇങ്ങനെ ഒരു ആശയം ഉദിച്ചത്. ലിജോയുടെ ഡിസൈനുകൾ വളരെ അധികം ആകർഷകവും വേറിട്ടുനിൽക്കുന്നതുമാണെന്ന് എടുത്തുപറയേണ്ടതുതന്നെയാണ്. എന്നെ വളരെ അധികം ആകർഷിച്ചിട്ടുള്ള ഡിസൈനർ ആണ് ശ്രീമാൻ ലിജോ. മാന്യ വായനക്കാർ ഈ ഡിസൈനെ പക്ഷെ ബഹുമനപ്പെട്ട ലിജോയുടെ ഡിസൈനുമായി ഒരുനിലക്കും താരതമ്യം ചെയ്യരുത്. വളരെയധികം കഴിവുകൾ ഉള്ള താൻ ചെയ്യുന്ന ഡിസൈനുകളെ കുറിച്ച് വ്യക്തമായ ഉൾക്കാഴ്ചയുള്ള സംഗീതത്തെ സ്നേഹിക്കുകയും അതിനെ ഡിസൈനിൽ കൊണ്ടുവരുവാൻ ശ്രമിക്കുകയും ചെയ്യുന്ന അദ്ദേഹത്തെ കുറിച്ച് ഒരു പോസ്റ്റിടണം എന്ന് ആഗ്രഹിച്ചു ഒരിക്കൽ നേരിൽ കണ്ടു സംസാരിച്ചിരുന്നു. പോസ്റ്റിനു അല്പം കൂടേ ഡീറ്റെയിത്സ് ഉണ്ടാക്കണം..അതിനാൽ അടുത്ത വെക്കേഷനിൽ ആകാം.)

ഐശ്വര്യപൂർണ്ണമായ ഓണാശംസകൾ

2008-09-11T08:31:00.002+03:00

പൂക്കളങ്ങളും പൂവിളികളുമായി കഴിഞ്ഞുപോയ നല്ല നാളുകളുടെ ഓർമ്മകൾ പുതുക്കുന്ന ഈ വേളയിൽ ലോകമെങ്ങും ഉള്ള മലയാളീകൾക്ക് പാർപ്പിടത്തിന്റെ ഐശ്വര്യപൂർണ്ണമായ ഓണാശംസകൾ.സുഖവും സ‌മ്രതിയും സന്തോഷവും നിറഞ്ഞ ആ നല്ലനാളുകൾ ആസുരമായ ഇന്നിന്റെ പൊള്ളുന്ന യാദാർഥ്യങ്ങളിൽ കുളിർമ്മ പകരട്ടെ.......

മഴക്കാലത്ത്‌ വീടിനെ ശ്രദ്ദയോടെ പരിപാലിക്കുക.

2008-08-31T09:56:00.001+03:00

ഇന്ന് കേരളത്തിലെ മിക്കവീടുകളും ഒരു "ഷെൽറ്ററിനു" കീഴിലാണ്‌.അതെ മഴപെയ്താൽ ചോരാതിരിക്കാൻ ഇന്ന് മിക്ക ടെറസ്സുവീടുകൾക്ക്‌ മുകളിലും ഒരു ടിൻ-അലുമിനിയം അല്ലെങ്കിൽ മറ്റു ഷീറ്റുകൾ ട്രെസ്സിൽ ഉറപ്പിച്ച്‌ നിർത്തിയിരിക്കുന്ന കാഴ്ച നമുക്ക്‌ കാണാനാകും.ലക്ഷങ്ങൾ ചിലവാക്കി പണിയുന്ന വീടിനു സംരക്ഷണം നൽകുവാൻ വീണ്ടും ആയിരങ്ങളും ലക്ഷങ്ങളും ചിലവിടേണ്ട അവസ്ഥയാണിന്ന്. എന്നാൽ അൽപം ശ്രദ്ധവെച്ചാൽ നമുക്ക്‌ ഇത്‌ ഒരു പരിധിവരെ ഒഴിവാക്കാവുന്നതേയുള്ളൂ. മഴക്കാലം മനുഷ്യർക്കെന്നപോലെ കെട്ടിടങ്ങൾക്കും "അസുഖം" വരുന്ന കാലമാണ്‌.പ്രധാനമായും ചോർച്ചയാണ്‌ വില്ലൻ കൂടാതെ മഴവെള്ളം ഒലിച്ചിറങ്ങി ചുവരുകൾ കേടുവരുന്നു, ചിതൽ ശല്യം ഉണ്ടാകുന്നു,പൂപ്പൽ കെട്ടി അതിൽ നിന്നും പുഴുക്കൾ വരുന്നു എന്നിങ്ങനെ നിരവധി "രോഗങ്ങൾ". മഴക്കാലം ആരംഭിക്കുന്നതിനു മുമ്പുതന്നെ ഇതിനുള്ള പ്രതിവിധികൾ ആരംഭിക്കണം എന്നതാണ്‌ വാസ്തവം.വീടിന്റെ ആയുസ്സു നീട്ടിക്കിട്ടുവാൻ കൃത്യമായി മെയ്ന്റനൻസ്‌ നടത്തി സൂക്ഷിക്കുക എന്നതാണ്‌ പ്രധാനം.

മഴ ആരംഭിക്കുന്നതിനു മുമ്പുതന്നെ ഡ്രൈൻ പൈപ്പുകൾ വൃത്തിയാക്കുക.അതിൽ അടിഞ്ഞിരിക്കുന്ന കരടുകളും ഇലകളും മറ്റും കളഞ്ഞ്‌ വെള്ളം ഒഴുകിപ്പോകുവാൻ ഉള്ള സൗകര്യം ഉണ്ടാക്കുക. ടെരസ്സിൽ നിന്നും വെള്ളം പെട്ടെന്നൊഴികിപ്പോകുവാൻ വേണ്ടി ആവശ്യത്തിനു പൈപ്പുകൾ സ്ഥാപിച്ചി ട്ടില്ലെങ്കിൽ അവ സ്ഥാപിക്കുക. പ്രത്യേകിച്ചും സൺഷേഡുകളിൽ. മറ്റൊന്ന് ഭിത്തിയിലും മറ്റും ഉള്ള വിള്ളലുകളിൽ വെള്ളം ഒലിച്ചിറങ്ങാതിരിക്കുവാൻ സിമന്റിട്ട്‌ അടക്കുക.ടെറസ്സിൽ ചെടിച്ചട്ടിയിലും മണൽ നിറച്ച ചാക്കുകളിലും കൃഷിചെയ്യുന്നവർ ഉണ്ട്‌.ഇങ്ങനെ ചെയ്യുന്നവർ വെള്ളം കെട്ടിനിൽക്കാതെ കൃത്യമായി ഒഴുകിപ്പോകുന്നുണ്ടോ എന്ന് ശ്രദ്ധിക്കുക.ചട്ടികൾ ഇഷ്ടികകളിലോ മറ്റോ ടെറസ്സിൽ നിന്നും അൽപം പൊക്കി സ്ഥാപിക്കുന്നത്‌ നന്നായിരിക്കും.

ഓടുവീടുകൾ ആണെങ്കിൽ ഓടിനിടയിലെ വിടവുകൾ നികത്തുകയും മരഉരുപ്പടികളിൽ കശുവണ്ടിപ്പശയോ,കരിയോയിലോ (വണ്ടിയുടെ എഞ്ചിനിൽ നിന്നും ഒഴിവാക്കുന്ന) ഡീസലോ പുരട്ടുക.ചിതൽ ശല്യം ഒഴിവാക്കുവാൻ ഇതു നല്ലതാണ്‌. ടെറസ്സ്‌ ചോരുന്നത്‌ ഇന്ന് ഒരു സാധാരണ സംഭവം ആയിരിക്കുന്നു.സിമന്റിന്റേയും മറ്റു നിർമ്മാണ വസ്തുക്കളുടേയും ക്വാളിറ്റിയിൽ ഉണ്ടായ മാറ്റവും കോൺക്രീറ്റു ചെയ്യുമ്പോൾ ശരിയായ രീതിയിൽ കോമ്പാക്ഷൻ നടക്കാത്തതും സിമന്റ്‌ കോൺക്രീറ്റ്‌ മിശ്രിതം തയ്യാറാക്കുന്നതിലെ അപാകതയും എല്ലാം ചേരുമ്പോൾ വീടു ചോരുന്നതിനുള്ള സാധ്യത വർദ്ധിക്കുന്നു. കോൺക്രീറ്റ്‌ ഒരിക്കൽ ഉറച്ചുകഴിഞ്ഞാൽ മറ്റൊരു കൂട്ട്‌ കോൺക്രീറ്റുമായി ഒരിക്കലും ചേരില്ല.താൽക്കാലികമായി അങ്ങിനെ തോന്നിയാലും അത്‌ പിന്നീട്‌ വീണ്ടും വിള്ളൽ ഉണ്ടാക്കും.. എന്നാൽ നാട്ടിൽ ഇപ്പോൾ ധരാളം വാട്ടർ പ്രോ‍ൂഫിങ്ങ്‌ സംവിധാനങ്ങൾ ലഭ്യമാണ്‌. അനുയോജ്യമായത്‌ ഒരു വിധഗ്ദനായ എഞ്ചിനീയറുടേയോ അല്ലെങ്കിൽ ഈ രംഗത്തുപ്രവർത്തിക്കുന്ന മറ്റുള്ള വിദഗ്ദരുടേയോ ഉപദേശത്തിലും മേൽനോട്ടത്തിലും ചെയ്യുന്നത്‌ നന്നായിരിക്കും.പലപ്പോഴും പണിക്കാരുടെ ഉപദേശത്തിനു പുറകെ പോകുന്നത്‌ നഷ്ടം വരുത്തിവെക്കാൻ സാധ്യതയുണ്ട്‌.

മഴയുടെ ഇടവേളകളിൽ വെയിൽ സമയത്ത്‌ ടോയ്‌ലറ്റുകളിലെ വെന്റിലേറ്ററുകൾ തുറന്നിടുക. ടോയലറ്റുകളിൽ പൂപ്പൽ ഉണ്ടാകുവാനും അതിൽ നിന്നും പലതരത്തിൽ ഉള്ള അസുഖങ്ങൾ ഉണ്ടാകുവാനും ഉള്ള സാധ്യത ധാരാളമാണ്‌.കൂടാതെ ടോയ്‌ലറ്റുകളിൽ നിന്നും ഉള്ള മലിന ജലം കുടിവെള്ള ശ്രോതസ്സുകളിൽ കലരാതിരിക്കുവാൻ ശ്രദ്ധിക്കണം. മുറികളിലെ ജനലുകൾ ഈപ്പം മൂലം വീത്ത്‌ തുറക്കുവാൻ ബുദ്ധിമുട്ടായിരിക്കും എങ്കിലും വെയിൽ കാണുന്ന സമയത്ത്‌ അവയെ തുറന്നിടുക.മുറികളിൽ ശുദ്ധവായുകടക്കുന്നതിനും ഫംഗസ്സ്‌,ചിതൽ ശല്യം ഉണ്ടാകാതിരിക്കുന്നതിനും ഇത്‌ നല്ലതാണ്‌. സ്റ്റോർ മുറിയിൽ ഉള്ള അനാവശ്യമായ വസ്തുകക്കൾ അപ്പപ്പോൾ നീക്കം ചെയുക.ഇല്ലാത്തപക്ഷം അത്‌ മറ്റുള്ള ബക്ഷണ സാധനങ്ങളിലേക്കും ഫംഗസ്സ്‌ ബാധ പകരുന്നതിനു ഇടയാക്കും.

ഇലക്ട്രിക്ക്‌ ഫിറ്റിങ്ങുകളിലേക്ക്‌ മഴവെള്ളം ഒലിച്ചിറങ്ങുന്നുണ്ടെങ്കിൽ അത്‌ തടയുകയോ അല്ലാത്തപക്ഷം അവിടേക്കുള്ള വൈദ്യുതി ബന്ധം വിച്ഛേദിക്കുകയോ ചെയ്യുക.രാത്രിയകാലങ്ങളിൽ ഇടിമിന്നൽ ഉണ്ടെങ്കിൽ ടിവിയുടേയും ടെലിഫോണിന്റേയും കേബിൾ കണക്ഷൻ വിടുത്തിയിടുന്നതും നല്ലതാണ്‌.

പൂർത്തിയാകുന്നവീട്‌.

2008-08-20T09:16:00.003+03:00

പാർപ്പിടത്തിൽ മുമ്പ്‌ പ്രസിദ്ധീകരിച്ചിരുന്ന ഒരു വീടിന്റെ നിർമ്മാണം പൂർത്തിയായിക്കൊണ്ടിരിക്കുന്നു. ഏകദേശം 106 ചതുരശ്രമീറ്റർ ഉള്ള ഈ വീടിന്റെ ചിലവ്‌ ഏകദേശം 7.65 ലക്ഷം രൂപയാണ്‌.(ചിത്രം അയച്ചുതന്നതിനു ശേഷമാണ്‌ നിർമ്മാണം പൂർത്തിയായത്‌). തറയിൽ ഇട്ടിരിക്കുന്നത്‌ വിക്ടിഫൈഡ്‌ ടെയിൽ( ചതുരശ്രയടിക്ക്‌ 40 രൂപ)ലും ടോയ്‌ലറ്റുകളിൽ ഏകദേശം 24 രൂപവരുന്ന ഫ്ലോർ ടെയിലും ആണ്‌ ഉപയോഗിച്ചിരിക്കുന്നത്‌.സാധാരണ പെയ്റ്റിങ്ങ്‌ മാത്രമേ ചെയ്തിട്ടുള്ളൂ വാൾപുട്ടി ഇട്ടിട്ടില്ല. വാതിലിനും ജനലിനും മറ്റും കുന്നിവാക പിങ്കോട എന്നീ മരങ്ങൾ ആണ്‌ ഉപയോഗിച്ചിരിക്കുന്നത്‌. മഴവെള്ള സംഭരണിക്കും ഓവർഹെഡ്ഡ്‌ വാട്ടർ ടാങ്കിനും സിന്റെക്സിന്റെ അഞ്ഞൂറിന്റേയും ആയിരത്തിന്റേയും ടാങ്കുകൾ സ്ഥാപിച്ചു.നിലവാരം ഉള്ള കേബിൾ ഉപയോഗിച്ചുകൊണ്ടും എന്നാൽ അത്യാവശ്യത്തിനുമാത്രം പോയിന്റുനൽകിക്കൊണ്ടും വയറിങ്ങിൽ ചിലവു ചുരുക്കിയിട്ടുണ്ട്‌.

തൃശ്ശൂർ ജില്ലയിലെ തീരദേശ വാസിയായ ഉദയകുമാറിന്റെ വീടാണിത്‌.കോർട്‌യാർഡ്‌ ഒഴിവാക്കി അവിടം സ്റ്റഡി ഏരിയാ അക്കിയിരിക്കുന്നു എന്നത്‌ മാത്രമാണ്‌ പ്ലാനിൽ നിന്നും വ്യത്യാസം വരുത്തിയിരിക്കുന്നത്‌. തൊഴിലാളികളുടെ സഹകരണവും ഈ വീടിന്റെ നിർമ്മാനപ്രവർത്തനത്തിൽ എടുത്തുപറയേണ്ട ഒരു ഘടകമാണ്‌. ജോലിസമയത്ത്‌ മൊബെയിൽഫോൺ ഉപയോഗിക്കുന്നതിൽ നിന്നും മേസ്തിരിയും എഞ്ചിനീയറും തൊഴിലാളികളെ കർശനമായി വിലക്കിയിരുന്നു.

സ്വാതന്ത്ര ദിനാശംശ

2008-08-14T08:52:00.000+03:00

വീണ്ടും ഒരു ഓഗസ്റ്റ്‌ പതിനഞ്ച്‌ വന്നെത്തിയിരിക്കുന്നു.പതിറ്റാണ്ടുകൾക്ക്‌ മുമ്പ്‌ ത്യാഗത്തിന്റെയും സഹനത്തിന്റേയും ഒടുവിൽ ലഭിച്ച സ്വാത്രന്ത്രത്തിന്റെ അന്ന് അഭിമാനപൂർവ്വം ത്രിവർണ്ണ പതാകയേന്തി ഭാരതത്തിന്റെ തെരുവുകളിൽ സ്വാതന്ത്രം ആഘോഷിച്ചവന്റെ സന്തോഷം, അത്‌ ഊഹിക്കുവാൻ പോലും കഴിയുന്നില്ല.

അന്ന് സ്വാതന്ത്രത്തിന്റെ ആദ്യപൊൻ പുലരി കണ്ടുണർന്ന ഭാരതീയന്റെ മനസ്സല്ല ഇന്നത്തെ കോടികൾകൊണ്ട്‌ ജനാതിപത്യത്തെ വിലക്കുവാങ്ങുന്നത്‌ ചാനലിൽ കണ്ടു രസിക്കുന്നവന്റെ മനസ്സ്‌.രക്തവും ജീവിതവും കൊടുത്ത്‌ ആ പോരാളികൾ നേടിത്തന്ന സ്വാതന്ത്രത്തെ കേവലം ചിലരുടേ നേട്ടങ്ങൾക്കായി വിറ്റുതുലക്കുമ്പോൾ നാം നിസ്സഹായരായി നോക്കി നിൽക്കുന്നു. പാളലമന്റിൽ കോടികൾകൊണ്ട്‌ അമ്മാനമാടി നേടിയ വിജയത്തിൽ ഇന്ത്യൻ ജനാധിപത്യത്തെ ആണവക്കരാ‍ീൽ ഒപ്പിട്ടുകൊണ്ട്‌ അമേരിക്കക്ക്‌ വിധേയത്വം പ്രഖ്യാപിക്കുന്ന ഈ വേളയിൽ കുനിഞ്ഞ ശിരസ്സോടെ ഒരു നിസ്സഹായനായ ഭാരതീയന്റെ സ്വാതന്ത്ര ദിനാശംശകൾ. വീര സ്വാതന്ത്ര സേനാനികളേ അർഹതയില്ലെങ്കിലും ലജ്ജയോടെ അപേക്ഷിക്കുന്നു ഞങ്ങൾക്ക്‌ മാപ്പുതരിക.
വന്ദേ മാതരം..

(സ്വാതന്ത്ര സമരസേനാനികൾ അഭിമാനത്തോടെ മതവും ജാതിയും കുലവും നോക്കാതെ പട്ടിണിയും പീഠനങ്ങളും വകവെക്കാതെ ഉറച്ച ശബദത്തിൽ ചൊല്ലിയ വന്ദേ മാതരം പോലും ചൊല്ലുവാൻ ലജ്ജിക്കുന്ന ബൻസുകാറേൽ പറക്കുന്ന ഇന്നത്തെ വർഗ്ഗീയ പ്രമാണിമാർക്ക്‌ കഴിയാത്തത്‌ അന്യൻ ജീവിതം തുലച്ചുനേടിത്തന്ന സ്വാതന്ത്രത്തിന്റെ വില അറിയാത്തതുകൊണ്ടുമാത്രമാണ്‌)

ചലച്ചിത്രകാരൻ ഭരതന്‌ പാർപ്പിടത്തിന്റെ ഓർമ്മാഞ്ജലി.

2008-07-30T08:57:00.000+03:00

പത്തുവർഷം മുമ്പ്‌ നമ്മെ വിട്ടുപോയ ചലച്ചിത്രകാരൻ ഭരതന്‌ പാർപ്പിടത്തിന്റെ ഓർമ്മാഞ്ജലി. ഭരതേട്ടൻ ഭാക്കിവെച്ചുപോയ ഒരു പിടി നല്ല ചിത്രങ്ങളും ചലച്ചിത്രകാവ്യങ്ങളും നമ്മുടെ ഓർമ്മകളിൽ എന്നും നല്ല മിഴിവുള്ള ചിത്രമായി അദ്ദേഹത്തെ നിലനിർത്തും. ഒരു പൂരക്കമ്പക്കാരനായ ഞാൻ ഇന്നും ഉത്രാളിപൂരത്തിനു പോകുമ്പോൽ എന്റെ കണ്ണുകൾ അറിയാതെ ആ താടിക്കാരനെ ആ പൂരക്കമ്പക്കാരനെ തിരയാറുണ്ട്‌

പ്ലാൻ-26

2008-07-19T12:15:00.001+03:00

ഭൂമിയുടെ വില അനുദിനം വർദ്ധിക്കുന്നതും വലിയ പ്ലോട്ടുകൾ ച്രുകഷ്ണങ്ങളായി മാറിയതും വീടുകളുടെ വലിപ്പത്തെ ബാധിച്ചുതുടങ്ങിയിരിക്കുന്നു.ഇത്‌ ഡിസൈനേഴ്സിന്റെ ജോലിയും വർദ്ധിപ്പിച്ചിരിക്കുന്നു എന്നതാണ്‌ സത്യം.ക്ലൈന്റിനെ ആവശ്യങ്ങൾ പരമാവധി ഉൾക്കൊള്ളിച്ചുകൊണ്ട്‌ ചെറിയ പ്ലോട്ടുകളിലെ വീടുകൾ ഡിസൈൻ ചെയ്യുക ജോലിയിൽ കൂടുതൽ സന്തോഷം തരുന്ന കാര്യമാണ്‌. അത്തരത്തിൽ ഇടുങ്ങിയ ഒരു പ്ലോട്ടിൽ ചെയ്ത ഒരു പ്ലാനാണീത്‌.നിർഭാഗ്യവശാൽ വാസ്തുവിദഗ്ദന്റെ കടുത്ത നിയമാവലികൾ അതിജീവിക്കുവാൻ ഈ പ്ലാനിനായില്ല.

ലിവിങ്ങ്‌ റൂമിൽ നിന്നും ഡൈനിങ്ങ്‌ റൂമിലേക്ക്‌ ആർചുകൂടാതെ രണ്ടു ചെറിയ ഓപ്പണിങ്ങുകൾ.(തഴെനിന്നും എഴുപത്തിയഞ്ച്‌ സെന്റീമീറ്റർ ഉയരത്തിൽ തുടങ്ങി രണ്ട്മീറ്റർ പത്തുസെന്റീമീറ്റർ വരെ പൊക്കത്തിൽ.)കെട്ടിയടച്ച ഒരു ഫീലിങ്ങ്‌ ഉണ്ടാകാത്രിക്കുവാൻ ആണിത്‌.ഡൈനിങ്ങ്‌ റൂമിൽ കെർവ്വ്‌ ആയിട്ടുള ചുമരിനോടുചെർന്ന് "ബിൽറ്റ്ൻ" ഇരിപ്പിടം ഒരുക്കിയിരിക്കുന്നു.അതിനു മുകൾ ഭാഗം ഡൈബിൽ ഹൈറ്റണ്‌.ഇത്‌ കൂടുതൽ വെളിചവും വായുവും പ്രധാനം ചെയ്യുന്നതുകൂടാതെ രണ്ടുനിലകളെയും തമ്മിൽ വേർത്തിരിക്കാതെ നിലനിർത്തുന്നു.ബെഡ്‌റൂമും അതിനോടുചേർന്ന് ഒരു ബാത്‌റൂമും കൊടുത്തിരിക്കുന്നു.സ്റ്റെയർക്കേസിനടിയിൽ ഒരു കോമൺ ടോയിലറ്റും കൊടുത്തിട്ടുണ്ട്‌.ഇതിന്റെ ഡോർ വേണമെങ്കിൽ പുറകൂവശത്തെ യൂടിലിറ്റിയിൽ നിന്നും ആക്കാവുന്നതാണ്‌.കിച്ചൺ ശ്രദ്ധിച്‌ ഡിസൈൻ ചെയ്താൽ ചെറുതാണെന്ന ഫീലിങ്ങ്‌ ഉണ്ടാകില്ല.

സ്റ്റെയർക്കേസിനടിയിൽ വേണമെങ്കിൽ ടി.വി വെക്കാം. അപ്പോൾ ലിവിങ്ങ്‌ റൂമിൽ അടിഥികൾ ഉണ്ടെങ്കിൽ തന്നെ വീട്ടിലുള്ളവർക്ക്‌ ഡൈനിംഗ്‌ ഏരിയായിൽ ഇരുന്നു ടിവികാണാം.സ്റ്റെയർക്കേസ്‌ കയറി ചെല്ലുന്നത്‌ അപ്പർ ലിവിങ്ങിലേക്കാണ്‌.അവിടെ ഇരിക്കുവാൻ ഉള്ള സൗകര്യം ഒരുക്കാം.കൂടാതെ ഇവിടെ ഒരു ഊഞ്ഞാൽ ഇടുന്നതിനു റൂഫിൽ കൊളുത്തുകൾ ഇടുന്നത്‌ നല്ലതാണ്‌. മുകൾ നിലയിൽ ഒരു മാസ്റ്റർബെഡ്‌റൂമും കുട്ടികളുടെ മുറിയും ആണുള്ളത്‌.ഇതിനു രണ്ടിനും പൊതുവായി ഒരു ബാത്‌റൂം ആണ്‌ നൽകിയിരിക്കുന്നത്‌.മാസ്റ്റർ ബെഡ്‌റൂമിൽ നിന്നും രണ്ടു ചെറിയ വിന്റോകൾ അകത്തെ ഡബിൾ ഹൈറ്റിലേക്ക്‌ കൊടുത്തിരിക്കുന്നു.ഇതു തുറന്നാൽ തഴെ ഡൈനിങ്ങ്‌ റൂം കാണാം. മുന്വശത്ത്‌ ഒരു ബാൽക്കണിയൂം പുറകുവശത്ത്‌ ഒരു ഓപ്പൺ ടെറസ്സും ഉണ്ട്‌.

മഴവെള്ളം സംഭരിക്കുക.

2008-07-02T10:59:00.001+03:00

ഈ വര്‍ഷം അല്‍പം കുറവാണെങ്കിലും പൊതുവെ നല്ല മഴലഭിക്കുന്ന സംസ്ഥാനമാണല്ലോ കേരളം.എന്നാല്‍ അതുപോലെ തന്നെ ചില വര്‍ഷങ്ങളില്‍ കേരളം കൊടും വരള്‍ച്ചയെ അഭിമുഖീകരിക്കാറുമുണ്ട്‌.ഒന്നുമനസ്സുവെച്ചാല്‍ നാം പാഴാക്കിക്കളയുന്ന മഴവെള്ളം സംഭരിച്ച്‌ ഒരുപരിധിവരെ ഈ പ്രശ്നം ഒഴിവാക്കാവുന്നതേ ഉള്ളൂ. കെട്ടിടനിര്‍മ്മാണചട്ടം അനുസരിച്ച്‌ കേരളത്തില്‍ പുതുതായി പണിയുന്ന (നൂറു ചതുരശ്രമീറ്ററില്‍ കൂടുതല്‍ പ്ളിന്ത്‌ ഏരിയ ഉള്ള) കെട്ടിടങ്ങള്‍ക്കെല്ലാം മഴവെള്ള സംഭരണി നിര്‍ബന്ധമാക്കിയിട്ടുണ്ട്‌.ഇതു കൂടി ഉണ്ടെങ്കില്‍ മാത്രമേ കെട്ടിടത്തിനു നമ്പര്‍ അനുവദിക്കൂ എന്നാണ്‌ പറയുന്നത്‌ എങ്കിലും പലപ്പോഴും ഇതു പാലിക്കപ്പെടുന്നില്ല എന്നതാണ്‌ സത്യം.ലക്ഷങ്ങള്‍ മുടക്കി വീടുനിര്‍മ്മിക്കുന്നവര്‍ പോലും അതിണ്റ്റെ കൂടെ അല്‍പംകൂടെ പണം ചിലവാക്കി ഒരു മഴവെള്ള സംഭരണി നിര്‍മ്മിക്കുവാന്‍ എന്തുകൊണ്ടോ മടികാണിക്കുന്നു.തദ്ദേശസ്വയംഭരണ സ്ഥാപനങ്ങള്‍ ഇക്കാര്യത്തില്‍ കര്‍ക്കശനിലപാടെടുത്ത്‌ ഈ പ്രവണതയെ നിരുത്സാഹപ്പെടുത്തണം.

മേല്‍ക്കൂരയില്‍ പതിക്കുന്ന മഴവെള്ളം ശേഖരിച്ചു പൈപ്പുവഴി താഴെ സ്ഥാപിച്ചിരിക്കുന്ന മഴവെള്ള സംഭരണ ടാങ്കിലേക്ക്‌ എത്തിക്കുന്ന ലളിതമായ ഒരു സംഗതിയാണിത്‌.പൈപ്പില്‍ ഒരു ഫില്‍റ്ററും ആദ്യം പെയ്യുന്ന മഴവെള്ളം ഒഴിവാക്കുവാന്‍ ഒരു ടാപ്പും ,മഴവെള്ളസംഭരണി നിറഞ്ഞാല്‍ വെള്ളം പുറത്തുപോകുവാന്‍ ഒരു "ഓവര്‍ഫ്ളോ പൈപ്പും" സ്ഥാപിക്കണം.ഫെറോസിമെണ്റ്റില്‍ നിര്‍മ്മിച്ചതോ അല്ലെങ്കില്‍ റെഡിമെയ്ഡായി വാങ്ങാന്‍ ലഭിക്കുന്ന "പ്ളസ്റ്റിക്‌" ടാങ്കിലോ മഴവെള്ളം ശേഖരിക്കാവുന്നതാണ്‌.ഇത്തരം സംഭരണികള്‍ക്ക്‌ നിര്‍ബന്ധമായും അടപ്പുണ്ടായിരിക്കണം. സൂര്യപ്രകാശം നേരിട്ട്‌ പതിക്കാതിരിക്കാനും പക്ഷികള്‍ കാഷ്ടിക്കാതിരിക്കാനും മറ്റു രീതിയില്‍ ഉള്ള പൊടിപടലങ്ങളോ കരടോ വീഴാതിരിക്കാനും ഇത്‌ ഉപകരിക്കും.ഇത്തരത്തില്‍ ശേഖരിക്കുന്ന വെള്ളം ദീര്‍ഘനാള്‍ കേടുകൂടാതെ ഇരിക്കും. കുടിക്കാനും മറ്റാവശ്യങ്ങള്‍ക്കും ഇത്‌ ഉപയോഗിക്കാവുന്നതാണ്‌.

കേരളം അതിരൂക്ഷമായ കുടിവെള്ളക്ഷാമം നേരിടുന്ന മാര്‍ച്ചുമുതല്‍ മെയ്‌ അവസാനം വരെയുള്ള കാലയളവില്‍ ചുരുങ്ങിയ പക്ഷം കുടിക്കാനെങ്കിലും ഈ വെള്ളം ഉപയോഗപ്പെടും.ടാങ്കറില്‍ കൊണ്ടുവരുന്ന വെള്ളവും ബോട്ടിലില്‍ നിറച്ച വെള്ളം വാങ്ങിക്കുന്നതിലും ആദായകരവും ആരോഗ്യകരവും ഈ വെള്ളം തന്നെ ആയിരിക്കും.

മൂന്നുസെന്റില്‍ ഒരു വീട്‌.

2008-03-27T17:42:00.004+03:00

മൂന്നുസെന്റ്‌ സ്ഥലത്ത്‌ സൗകര്യങ്ങളോടുകൂടിയ ഒരു വീട്‌ നിര്‍മ്മിക്കുക എന്നത്‌ പണ്ട്‌ ആലോചിക്കുവാന്‍ പോലും കഴിയില്ലായിരുന്നു.അന്ന് ധാരാളം ഭൂമി ലഭ്യമായിരുന്നു. എന്നാല്‍ ഇന്ന് ഭൂമി വില കുതിച്ചുകയറിക്കൊണ്ടിരിക്കുന്ന സാഹചര്യത്തില്‍ "പൊന്നിന്‍" വിലകൊടുത്ത്‌ ഭൂമി വാങ്ങി വീടുവെക്കുക ശരാശരിമലയാളിയെ സംബന്ധിച്ച്‌ വളരെയധികം ബുദ്ധിമുട്ടുള്ളകാര്യമാണ്‌.എന്റെ ഒരു സുഹൃത്തിനുവേണ്ടി തയ്യാറാക്കിയപ്ലാനാണിത്‌.

താഴെ ഒരു അറ്റാച്ച്ഡ്‌ കിടപ്പുമുറിയും ഡൈനിങ്ങും കിച്ചണും ചെറിയ പോര്‍ച്ചുമ്മെല്ലാമുള്‍പ്പെടെ 871 ചതുരശ്രയടി ഏരിയായാണുവരുന്നത്‌.കിച്ചണില്‍ അത്യാവശ്യം സാധനങ്ങള്‍ സൂക്ഷിക്കുവാന്‍ ഡോറിനു പുറകിലായി ചെറിയ ഒരു സ്റ്റോറേജ്‌ ഏരിയ കൊടുത്തിരിക്കുന്നു.ജോലിക്കിടെ ക്ഷീണിക്കുമ്പോള്‍ വിശ്രമിക്കുവാന്‍ അവിടെ ഒരു ചെറിയ സീറ്റിങ്ങ്‌ അറേഞ്ച്മെന്റും നല്‍കാം. ഇതിനടിയില്‍ സ്റ്റോറേജ്‌ ഏരിയായും ഉണ്ടാക്കാം. വര്‍ക്ക്‌ ഏരിയായില്‍ ഒരു റ്റോയ്‌ലറ്റ്‌ ശരിക്കുപറഞ്ഞാല്‍ ഈ വീടിനെ സംബന്ധിച്ച്‌ അനാവശ്യമാണ്‌.എങ്കിലും വീട്ടുകാരുടെ നിര്‍ബന്ധത്തിനുവഴങ്ങി അതു നല്‍കിയിരിക്കുന്നു.(മിക്കവീടുകള്‍ ഡിസൈന്‍ ചെയ്യുമ്പോഴും വീട്ടില്‍ വല്ലപ്പോഴും വരുന്ന അദിഥികള്‍ക്ക്‌ അല്ലെങ്കില്‍ ജോലിക്കുവരുന്നവര്‍ക്ക്‌ ഒരു ടോയലറ്റ്‌ എന്ന് പറഞ്ഞ്‌ ഉള്‍പ്പെടുത്താറുണ്ട്‌. വ്യക്തിപരമായ അഭിപ്രായം അനുസരിച്ച്‌ ചെറിയവീടുകളില്‍ ഇതൊരു അനാവശ്യമാണെന്നേ ഞാന്‍ പറയൂ.)

സ്റ്റെയര്‍കേസിന്റെ അടിഭാഗത്ത്‌ ടി.വി വെക്കുവാന്‍ അനുയോജ്യമാണ്‌.മുകള്‍ നിലയിലേക്ക്‌ കയറുമ്പോള്‍ പന്ത്രണ്ടാമത്തെ സ്റ്റെപ്പില്‍ നിന്നും പോര്‍ച്ചിന്റെ മുകളിലേക്ക്‌ ഒരു ഡോര്‍ കൊടുത്തിരിക്കുന്നു.ഇതാണ്‌ ഈ വീടിന്റെ ബാല്‍ക്കണി.

മുകളില്‍ കുടുബാംഗങ്ങള്‍ക്ക്‌ ഒത്തുകൂടുവാനും സംഗീതമാസ്വദിക്കുവാനും മറ്റും ഒരു ഹാള്‍ കൊടുത്തിരിക്കുന്നു. അതില്‍ നിന്നും പുറത്തേക്കുള്ള വാതില്‍ തുറന്നാല്‍ ടെറസ്സ്‌ ഗാര്‍ഡന്‍ ആയി.താഴെ സ്ഥലം ഇല്ലാത്തതിനാല്‍ ഇവിടെ ചെടികള്‍ ചട്ടികളിലാക്കി വെക്കാം. അടിഭാഗത്ത്‌ പ്ലാസ്റ്റിക്ക്‌ പാത്രങ്ങളോ മറ്റൊ വച്ച്‌ ചട്ടികളുടെ അടിഭാഗത്തുനിന്നും വെള്ളം ഇറങ്ങി ടെറസ്സില്‍ സദാ ഈര്‍പ്പം നിലനില്‍ക്കുന്നത്‌ തടയണം എന്ന് മാത്രം. വൈകുന്നേരങ്ങളില്‍ കാറ്റുകൊള്ളുവാന്‍ ഊഞ്ഞാലോ, ബില്‍റ്റിന്‍ ബഞ്ചോ മറ്റൊ കൊടുത്ത്‌ സൗകര്യം ഒരുക്കാവുന്നതാണ്‌.മുകളിലെ കിടപ്പുമുറികളില്‍ ഒന്ന് താഴത്തെ സിറ്റ്‌ ഓട്ട്‌ ഏരിയായുടെ മുകള്‍ഭാഗം കൂടെ ചേര്‍ത്ത്‌ വതുാക്കി എടുത്തിരിക്കുന്നു. മുകളിലെ രണ്ടു ബെഡ്രൂമുകള്‍ക്കും മധ്യെ ഉള്ള ടോയറ്റ്‌ കോമണ്‍ ആക്കിയാല്‍ മുകളിലെ ഒരു ടോയ്‌ലറ്റ്‌ ഒഴിവാക്കാം.ടോയ്‌ലറ്റിന്റെ എണ്ണം കുറയും മ്പോള്‍ നല്ലൊരു തുക ലാഭിക്കുകയും ചെയ്യാം.താഴെയും മുകളിലും ആയി 871+68=1559 ചതുരശ്രയടി വിസ്തീര്‍ണ്ണമാണ്‌ ഈ വീടിനുള്ളത്‌.

NB: വാസ്തു അളവുകള്‍ അനുസരിച്ചല്ല ഈ വീടിന്റെ പ്ലാന്‍ തയ്യാറാക്കിയിരിക്കുന്നത്‌.

unnipengat

2008-03-06T15:43:00.002+03:00

This is not for other bloggers.

ഏങ്ങണ്ടിയൂര്‍ എന്ന സ്ഥലത്ത്‌ മി.ഉണ്ണികൃഷ്ണന്റെ വീടിന്റെ പ്ലാനാണിത്‌. ഏരിയ കുറക്കുവാനും വാസ്തുവില്‍ അളവുകള്‍ നിര്‍ത്തുവാനും ചെയ്ത ചില അഡ്ജസ്റ്റുമെന്റുകള്‍ കൊണ്ട്‌ പ്ലാനില്‍ ചില ബുദ്ധിമുട്ടുകള്‍ ഉണ്ട്‌.

പാര്‍പ്പിടത്തിന്റെ ഡിസൈനിങ്ങില്‍ വില്ലാപ്രോജക്ട്‌.

2008-03-01T08:58:00.004+03:00

കേരളത്തിലെ വില്ലാപ്രോജക്ടുകള്‍ ഇന്ന് റെഡിറ്റു ലിവ്‌ എന്ന സങ്കല്‍പ്പത്തിലേക്ക്‌ മാറിയിരിക്കുകയാണല്ലോ.കട്ടിലും മേശയും കബോഡും കിച്ചണ്‍ കാമ്പിനറ്റും ഡൈനിങ്ങ്‌ ടേബിളും തുടങ്ങി ലിവിങ്ങ്‌ റൂമിലെ ഇരിപ്പിടം വരെ തയ്യാറാക്കിയതിനു ശേഷമേ ഈ വീട്‌ വില്‍ക്കുകയുള്ളൂ. ചുരുക്കിപ്പറഞ്ഞാല്‍ താമസക്കാര്‍ വന്ന് പാലുകാച്ചുകയേവേണ്ടൂ എന്ന് വേണമെങ്കില്‍ പറയാവുന്ന അവസ്ഥയിലേക്ക്‌ എത്തിയിരിക്കുന്നു ഈ രംഗത്തെ വളര്‍ച്ച.പ്രവാസികളും കേരളത്തില്‍ ഉള്ള ചിലരും ചേര്‍ന്ന് ഇത്തരത്തില്‍ ഉള്ള ഒരു പ്രൊകടിനെ കുറിച്ച്‌ സംസാരിക്കുകയും ഈ ആശയവുമായി മുന്നോട്ടുപോകുവാന്‍ തീരുമാനിക്കുകയും ചെയ്തു. ഇവര്‍ക്കായി പാര്‍പ്പിടം ചില ഡിസൈനുകള്‍ തയ്യാറാക്കിക്കൊണ്ടിരിക്കുകയാണ്‌.ഈ പ്രൊജക്ടിലെ ഓരോ വീടും വ്യത്യസ്ഥം ആകണം എന്നാണ്‌ എന്റെ ആഗ്രഹം എങ്കിലും നിര്‍മ്മാണത്തിന്റെ സൗകര്യത്തിനും മറ്റുമായി മൂന്നോ നാലോ ടൈപ്പ്‌ വില്ലകള്‍ ആയിരിക്കും ഇതില്‍ ഉണ്ടാകുക. ഓടുപതിച്ച്‌ ചരിച്ചുവാര്‍ക്കുന്ന റൂഫ്‌ എന്ന ആശയത്തോട്‌ വ്യക്തിപരമായി വിയോജിപ്പുണ്ടെങ്കിലും ഒരു കൊമേഴ്സ്യല്‍ പ്രോജക്ടെന്ന നിലയില്‍ ക്ലൈന്റിനു എത്രയും കൂടുതല്‍ വിപണന മൂല്യം ലക്ഷ്യമാക്കിക്കൊണ്ടാണ്‌ ഇതിലെ ഓരോ വീടും ചെയ്യുന്നത്‌.

നമ്മുടെ നാട്ടില്‍ ഇപ്പോള്‍ അനൗണ്‍സ്‌ ചെയ്യുന്ന വില്ലാ പ്രോജക്ടുകളില്‍ ഭൂരിപക്ഷവും ഓടുപതിച്ച മേല്‍ക്കൂരയോടുകൂടിയവയാണ്‌. ഇതിന്റെ ഒരു കാരണം ചരിച്ചുവാര്‍ത്താല്‍ ചോരുകയില്ല എന്ന് സാധാരണക്കാരിലും ഇടത്തരക്കാരിലും ഉള്ള തെറ്റിദ്ധാരണയും മറ്റൊന്ന് ബ്രോഷറില്‍ പ്രിന്റുചെയ്യുമ്പോഴും നേരില്‍ കാണുമ്പോഴും ഓടുവച്ച ഭാഗത്തിനു ബ്രിക്ക്‌ റെഡ്‌/ഓറഞ്ച്‌ നിറം കൊടുത്താല്‍ ഒറ്റനോട്ടത്തില്‍ കിട്ടുന്ന ആകര്‍ഷകത്വവും ആണ്‌.ഇവിടെ കൊടുത്തിരിക്കുന്ന വില്ലയുടെ ഗ്രൗണ്ട്‌ ഫ്ലോറിന്‌ 1258 ചതുരശ്രയടി വിസ്തീര്‍ണ്ണമാണുള്ളത്‌.കൂടാതെ ഫസ്റ്റ്‌ ഫ്ലോറില്‍ ബാല്‍ക്കണിയടക്കം 510 ചതുരശ്രയടിയും.ഈ വീടിന്റെ ഒരു പ്രത്യേകത കിഴക്കോട്ടും തെക്കോട്ടും "എലിവേഷന്‍" ഉണ്ടെന്നതാണ്‌.(സാങ്കേതികമായി പറയുമ്പോള്‍ എല്ലാവശത്തേക്കും എലിവേഷന്‍ ഉണ്ട്‌ എന്നാല്‍ ആളുകള്‍ പെട്ടെന്നുകാണുന്ന ഭാഗം എന്നാണ്‌ ഇവിടെ ഞാന്‍ ഉദ്ദേശിക്കുന്നത്‌)ചാരുപടിയോടുകൂടിയ സിറ്റൗട്ടും അടുക്കളയിലേക്ക്‌ പോര്‍ച്ചില്‍നിന്നും എളുപ്പത്തില്‍ കടക്കാം എന്നതും മറ്റൊരു പ്രത്യേകതയാണെന്ന് പറയാം.പൂര്‍ണ്ണമായും സ്വകാര്യത ഉറപ്പുവര്‍ത്തിക്കൊണ്ടാണ്‌ ബെഡ്രൂമുകള്‍ ഒരുക്കിയിരിക്കുന്നത്‌.ഇനിയും വേണമെങ്കില്‍ ഒന്നോ രണ്ടോ ബെഡ്രൂമുകള്‍ മുകളില്‍ കൂട്ടിച്ചേര്‍ക്കുകയും ആകാം.മൊത്ത 1768 ചതുരശ്രയടി വിസ്തീര്‍ണ്ണമുള്ള ഈ വില്ലക്ക്‌ ഏകദേശം പതിനാല്‌ ലക്ഷം രൂപയാണ്‌ നിര്‍മ്മാണചിലവു ഉദ്ദേശിക്കുന്നത്‌.(സാധാരണക്കാര്‍ വീടുനിര്‍മ്മിക്കുമ്പോള്‍ ഏകദേശം അറുപതിനായിരം മുതല്‍ ഒരു ലക്ഷം വരെ ഈ വീടിന്റെ നിര്‍മ്മാണത്തിനു അധികം ചിലവിടേണ്ടിവരും) ഇന്റീരിയറിന്‌ ഒന്നര ലക്ഷം രൂപയും. സെന്റിന്‌ ഇന്നത്തെ നിലവാരമനുസരിച്ച്‌ ഒരുലക്ഷം രൂപവിലയുള്ള ആറുസെന്റ്‌ സ്ഥലത്ത്‌ പണിപൂര്‍ത്തിയാക്കി വില്‍പനക്ക്‌ തയ്യാറാകുമ്പോള്‍ ഈ വീടിന്റെവില ഇരുപത്തിനാലുമുതല്‍ ഇരുപത്തി ഏഴുലക്ഷം രൂപവരെ ആയേക്കാം.

വ്യക്തിപരമായ കാരണങ്ങളാല്‍ ഈ പ്രോജക്ട്‌ എവിടെ വരുന്നു എന്നുള്ളത്‌ തല്‍ക്കാലം വെളിപ്പെടുത്തുന്നില്ല.

പാര്‍പ്പിടത്തെ ഇതുവരെ പ്ലാനുകള്‍ വില്‍ക്കുവാനുള്ള ഒരു ഉപാധിയായി മാറ്റിയിട്ടില്ല. നല്ലവരായ പല വായനക്കാരും പ്ലാനുകള്‍ അയച്ചുതരുവാന്‍ എഴുതാറുണ്ട്‌ പറ്റുന്ന രീതിയില്‍ ചെയ്തുകൊടുക്കാറുമുണ്ട്‌.സമയക്കുറവുകൊണ്ട്‌ പലപ്പോഴും മറുപടി വൈകുക പതിവായിരിക്കുന്നു ദയവായി ക്ഷമിക്കുക..

പ്ലാന്‍-25

2008-03-01T08:46:00.002+03:00

ചെറിയ വീടുകള്‍ അല്ലെങ്കില്‍ ചെറിയ സ്ഥലത്തെ വീടുകള്‍ ഇന്ന് ധാരാളമായി നിര്‍മ്മിക്കപ്പെടുന്നു.വലിയ വീടുകള്‍ കണ്ട്‌ ബാങ്കില്‍ നിന്നും ലോണെടുത്ത്‌ അത്തരം വീടുകള്‍ നിര്‍മ്മിക്കാന്‍ മുതിരുന്ന ഇടത്തരക്കാര്‍ ഒത്തിരി ഉണ്ടെങ്കിലും പ്രായോഗികമായി ചിന്തിക്കുന്നവരുടെ എണ്ണം ഒരു ഭാഗത്ത്‌ വര്‍ദ്ധിച്ചുകൊണ്ടിരിക്കുന്നുണ്ട്‌ എന്നതാണ്‌ സത്യം. നിര്‍മ്മാണവസ്തുക്കളുടെ വില വര്‍ദ്ധിച്ചതും ഭൂമിയുടെ ലഭ്യതക്കുറവും ചെറിയ വീടുകള്‍ നിര്‍മ്മിക്കുവാന്‍ പ്രേരിപ്പിക്കുന്നതില്‍ നിര്‍ണ്ണായക ഘടകമാണ്‌.ടിവി സ്ക്രീനില്‍ തെളിയുന്ന പാര്‍പ്പിട വിസ്മയങ്ങള്‍ക്ക്‌ പുറകെ പായാതെ അവനവന്റെ ആവശ്യങ്ങളെ മനസ്സിലാക്കി അനാവശ്യമായ സാമ്പത്തിക ബാധ്യത തലയില്‍ ഏറ്റാതെ വീടുവെക്കുക എന്നതാണ്‌ ബുദ്ധി.

റെജില്‍ എന്ന സുഹൃത്തിനു വേണ്ടി നിര്‍മ്മിക്കുന്ന വീടിന്റെ പ്ലാനാണിത്‌.വീതികുറഞ്ഞ ഒരു പ്ലോട്ടാണിത്‌. 1062 ചതുരശ്രയടി വിസ്തീര്‍ണ്ണമുണ്ട്‌ ഇതിന്റെ ഗ്രൗണ്ട്‌ ഫ്ലോറിന്‌.കാര്‍പോര്‍ച്ച്‌ തല്‍ക്കാലം ഒഴിവാക്കിയിരിക്കുന്നു. ആവശ്യമെങ്കില്‍ ട്രസ്സ്‌ ഉപയോഗിച്ച്‌ മതിലിനോടുചേര്‍ന്ന് നിര്‍മ്മിക്കാം എന്നതാണ്‌ കക്ഷിയുടെ അഭിപ്രായം.സ്റ്റോര്‍ റൂം ഒഴിവാക്കി കിച്ചണില്‍ സാധനങ്ങള്‍ സ്റ്റോറുചെയ്യുവാന്‍ ഒരു ചെറിയ ഏരിയ ഉണ്ടാക്കിയിരിക്കുന്നു.ഇന്നത്തെ വീടുകളില്‍ സ്റ്റോര്‍ റൂം എന്നത്‌ അത്യാവശ്യമില്ലാത്ത ഒരു ഘടകമാണ്‌.(ചിലര്‍ക്കിപ്പോഴും അത്‌ ടോയലറ്റുപോലെ ഒരു നിര്‍ബന്ധഘടകം ആണെന്നത്‌ സമ്മതിക്കുന്നു).

പ്ലോട്ടിന്റെ ചില പ്രത്യേകതകള്‍ കണക്കിലെടുത്ത്‌ (വീട്ടിലേക്കുള്ള വഴി അടുത്തവീടിന്റെ സ്ഥാനം) കിച്ചണ്‍ വടക്ക്‌ പടിഞ്ഞാറുഭാഗത്താണ്‌ കൊടുത്തിരിക്കുന്നത്‌.വര്‍ക്ക്‌ ഏരിയായില്‍ പുകയുള്ള അടുപ്പും അതിന്റെ ചിമ്മിനിയും ക്രമീകരിച്ചിരിക്കുന്നു.മാസ്റ്റര്‍ ബെഡ്രൂമില്‍ ഒരു ബില്‍റ്റിന്‍ കബോഡ്‌ കൊടുത്തിരിക്കുന്നു. കബോഡിനും വാതിലിനും ഇടയില്‍ ഒരു 15 സെന്റീമീറ്റര്‍ ഗ്യാപ്‌ കൊടുക്കണം. ഇല്ലെങ്കില്‍ വാതിലുകള്‍ പരസ്പരം കൂട്ടിമുട്ടുവാനുള്ള സാധ്യതയുണ്ട്‌.വര്‍ഡ്‌ റോബിന്റെ ഒരു ഭാഗത്തെ ബെഡ്രൂമിന്റെ വാതില്‍ തുറന്നിടുമ്പോള്‍ മറക്കുന്നുണ്ട്‌.ഈ ഭാഗത്ത്‌ അത്യാവശ്യം ഇല്ലാത്ത വസ്ത്രങ്ങള്‍ വെക്കുന്നതാണ്‌ സൗകര്യം.ഡൈനിങ്ങ്‌ ഏരിയായില്‍ വാഷ്ബേസിന്‍ കൊടുത്തിരിക്കുന്നു.

സ്റ്റെയര്‍ കേസിന്റെ അടിഭാഗം പതിനഞ്ചുസെന്റീമീറ്റര്‍ താഴ്ത്തിയാണ്‌ ഫ്ലോര്‍ ചെയ്യുന്നത്‌. ഇവിടെ തയ്യല്‍മെഷീനും ഇസ്തിരിയിടുവാനും ഉള്ള സൗകര്യവും ഒരുക്കാം.കയറിവരുമ്പോള്‍ സ്റ്റെയര്‍കേസ്‌ കാണുമെന്ന് വാസ്തുവിദഗ്ദനും ചില സുഹൃത്തുക്കളും പറയുകയുണ്ടായി. ലിവിങ്ങില്‍ നിന്നും ഉള്ള ആര്‍ച്ചിനു പുറകിലായി ഒരു കര്‍ട്ടന്‍ സ്ഥാപിച്ച്‌ ആ വിഷയം ഒഴിവാക്കാം.സ്റ്റെയര്‍ റൂമിന്റെ പൊക്കം 270 സെന്റീമീറ്റര്‍ ആണ്‌.മുകളില്‍ മുറികള്‍ എടുക്കുന്ന സമയത്ത്‌ ഇതിനു മുകളിലേക്ക്‌ 30 സെന്റീമീറ്റര്‍ ഉയരത്തില്‍ ബ്രിക്ക്‌ കെട്ടി അതിനു മുകളില്‍ റൂഫ്‌ വാര്‍ക്കാം. നിലവിലുള്ള കോണ്‍ക്രീറ്റ്‌ കുത്തിപ്പൊളിച്ച്‌ അതിനോട്‌ ജോയന്റ്‌ ചെയ്തു വാര്‍ക്കുന്നത്‌ ചോര്‍ച്ചക്കുള്ള സാധ്യത വര്‍ദ്ധിപ്പിക്കും.

ആയിരം കണ്ണി ഉത്സവം മാര്‍ച്ച്‌-13 ന്‌.

2008-03-01T08:43:00.000+03:00

തൃശ്ശൂര്‍ ജില്ലയിലെ പടിഞ്ഞാറുഭാഗം വലപ്പാടുമുതല്‍ ചേറ്റുവ വരെ അറിയപ്പെടുന്നത്‌ മണപ്പുറം എന്നാണ്‌. മണപ്പുറത്തെ ഏറ്റവും വലിയ ഉത്സവം ആയ ആയിരം കണ്ണി ഉത്സവം മാര്‍ച്ച്‌ 13 ന്‌ ആണ്‌.വാടാനപ്പള്ളിയില്‍ നിന്നും കഷ്ടിച്ച്‌ മൂന്നുകിലോമീറ്റര്‍ വടക്കുമാറി ഈസ്റ്റ്‌ ടിപ്പുസുല്‍ത്താന്‍ റോഡില്‍ സ്ഥിതിചെയ്യുന്ന ഈ ചെറിയ ക്ഷേത്രത്തില്‍ ഉത്സവത്തിനു എത്തുന്നത്‌ ആയിരങ്ങളാണ്‌.ജില്ലയിലെ അറിയപ്പെടുന്ന മല്‍സരപ്പൂരമായ ആയിരംകണ്ണിയില്‍ നാല്‍പതിലധികമാനകള്‍പങ്കെടുക്കാറുണ്ടെങ്കിലും അധികൃതരുടെ കര്‍ശനനിര്‍ദ്ദേശത്തെതുടര്‍ന്ന് ഇത്തവണ പകല്‍പ്പൂരത്തിനു അണിനിരക്കുന്നത്‌ മുപ്പത്തിമൂന്ന് ഗജവീരന്മാരായിരിക്കും.വഴിപാടുപൂരങ്ങള്‍ രാവിലെ എട്ടുമുതല്‍ പതിനൊന്നുമണിവരെ ആയിരിക്കും ഉണ്ടാകുകതിടമ്പ്‌ തലയെടുപ്പിന്റെയും ആനയഴകിന്റേയും കേരളത്തിലെ തമ്പുരാന്‍ തെച്ചിക്കോട്ടുകാവ്‌ രാമചന്ദ്രന്‍ ഉറപ്പിച്ചുകഴിഞ്ഞു..പൊക്കുളങ്ങര്‍ ഉത്സവം മാര്‍ച്ച്‌ 12ന്‌. നാഷ്ണല്‍ ഹൈവേ 17 ല്‍ വാടാനപ്പള്ളിയില്‍ നിന്നും അഞ്ചുകിലോമീറ്റര്‍ വടക്കുമാറി സ്ഥിതിചെയ്യുന്ന പൊക്കുളങ്ങര ഉത്സവം മല്‍സരപ്പൂരത്തിന്റെ മറ്റൊരു വേദിയാണ്‌. ഇവിടെയുംതിടമ്പ്‌ തെച്ചിക്കോട്ടുകാവ്‌ രാമചന്ദ്രന്‍. കൂടുതല്‍ വിശേഷങ്ങള്‍http://www. darppanam.blogspot.com

Mr.Raveendran's plan

2008-02-05T16:52:00.000+03:00

A plan for 3 cent

2008-02-05T16:47:00.000+03:00

ആറുസെന്റില്‍ ഒരു വീട്‌ പ്ലാന്‍-19

2007-11-13T14:05:00.000+03:00

ആറുസെന്റ്‌ സ്ഥലത്ത്‌ ചെയ്തുകൊണ്ടിരിക്കുന്ന ഒരു വീടിന്റെ പ്ലാന്‍.

അടുക്കളമാത്രം വാസ്തുകണക്കില്‍ ആക്കിയിരിക്കുന്നു.ഗ്യാസ്‌ സ്റ്റൗ ഉപയോഗിച്ച്‌ പാചകം ചെയ്യുന്നതിനും മാത്രം സൗകര്യം ഉള്ള ഒരു ചെറിയ അടുക്കളയാണ്‌ ആദ്യത്തേത്‌. പുറത്ത്‌ വര്‍ക്ക്‌ ഏരിയായില്‍ വിറകടുപ്പിനുള്ള സൗകര്യം ഒരുക്കിയിരിക്കുന്നു. ഈ വര്‍ക്ക്‌ ഏരിയാക്കും സ്റ്റോറിനും 220 സെന്റീമീറ്റര്‍ ഉയരത്തില്‍ റൂഫ്‌ കൊടുക്കണം. എങ്കിലേ കോമണ്‍ ടോയ്‌ലറ്റിനു വെന്റിലേഷന്‍ ലഭിക്കുകയുള്ളൂ.

അടുക്കളയില്‍ നിന്നും ഒരു ചെറിയ ഓപ്പണിങ്ങ്‌ കോര്‍ട്ടുയാഡിലേക്ക്‌ നല്‍കിയിരിക്കുന്നു. കോര്‍ട്ടുയാഡിന്റെ ഒരു വശത്തുകൊടുത്തിരിക്കുന്ന വിന്റോവഴി മുന്‍വശത്ത്‌ ആരെങ്കിലും വന്നാല്‍ കിച്ചണില്‍ നിന്നുകൊണ്ടുതന്നെ കാണാവുന്നതാണ്‌.കോര്‍ട്ടുയാഡ്‌ ചെറുതാണെങ്കിലും അകത്തെ ചൂടുള്ള വായു പുറത്തേക്ക്‌ പോകുന്നതിനു ഉപകരിക്കുന്നു. ഇതുമൂലം വീടിനകത്ത്‌ ചൂടുകുറവായിരിക്കും.കോര്‍ട്ടുയാഡിന്റെ മധ്യത്തില്‍ വെള്ളാരം കല്ല് പാകിയും അതിനു നടുവില്‍ ടെറാകോട്ടകൊണ്ടോ കോണ്‍ക്രീറ്റുകൊണ്ടോ ഉരുളിയുടെ ആകൃതിയില്‍ ഉണ്ടാക്കിയ ടാങ്കില്‍ മത്യങ്ങളെ വളര്‍ത്താവുന്നതാണ്‌.വര്‍ഷക്കാലത്ത്‌ ഈ ടാങ്കില്‍ വെള്ളം നിറഞ്ഞു മത്യങ്ങള്‍ ചാടിപോകാതിരിക്കുവാന്‍ മുകളില്‍ വല ഇടാം.കൂടാതെ ടാങ്കിനു മുകള്‍വശത്ത്‌ വശങ്ങളിലേക്ക്‌ ദ്വാരങ്ങള്‍ ഇട്ട്‌ വെള്ളം നിറഞ്ഞൊഴുകാതിരിക്കാനുള്ള സംവിധാനം ഒരുക്കാം.

വടക്കുകിഴക്ക്‌ ഭാഗത്ത്‌ അടുക്കളയും കിഴക്കോട്ട്‌ പ്രധാനവാതിലും ക്രമീകരിച്ചിരിക്കുന്ന ഈ വീടിന്റെ തെക്കുപടിഞ്ഞാറുമൂലയില്‍ ആണ്‌ പ്ലോട്ടിന്റെ പ്രത്യേകതകൊണ്ട്‌ (റോഡ്‌ തക്കുപടിഞ്ഞാറെ മൂലവരെയേ ഉള്ളൂ.) കാര്‍പോര്‍ച്ച്‌ കൊടുത്തിരിക്കുന്നത്‌.

ഡിസൈനിനു കടപ്പാട്‌ മി.സിസ്സ്‌ എസ്‌.കുമാര്‍.

കെട്ടിടനിര്‍മ്മാണ ചട്ടങ്ങള്‍ പഞ്ചായത്തുകളിലേക്കും.

2007-11-13T14:01:00.000+03:00

ഗ്രാമങ്ങള്‍ നഗരങ്ങളായിക്കൊണ്ടിരിക്കുന്ന ഇന്നത്തെ സാഹചര്യത്തില്‍ കെട്ടിടനിര്‍മ്മാണത്തിനു ചില നിബന്ധനകള്‍ പണ്ടേ നടപ്പിലാക്കേണ്ടതായിരുന്നു. റോഡുവികസനം പലയിടത്തും അസാധ്യമാകുകയോ ദുഷകരമാകുകയോ ചെയ്തതില്‍ മുന്‍ ഭരണാധികാരികളുടെ ദീര്‍ഘവീക്ഷണമില്ലായ്മയും സങ്കുചിത രാഷ്ടീയതാല്‍പര്യവും മുന്‍ നിര്‍ത്തിയുള്ള നടപടികള്‍ പ്രധാനപങ്കുവഹിച്ചിട്ടുണ്ട്‌.പലകാരണങ്ങളാല്‍ അല്‍പം വൈകിയാണെങ്കിലും ഗ്രാമങ്ങളില്‍ കെട്ടിടനിര്‍മ്മാണചട്ടങ്ങള്‍ ഇന്ന് പ്രാബല്യത്തില്‍ വന്നിരിക്കുന്നു.

സംസ്ഥാനത്തെ 999 പഞ്ചായത്തുകളിളിലും കെട്ടിടനിര്‍മ്മാണചട്ടം നിലവില്‍ വരുത്തിയ അച്യുതാനന്ദന്‍ ഗവണ്മെന്റിനു (പൂര്‍ണ്ണമായും സഖാവ്‌ വിഭാവനം ചെയ്ത രീതിയില്‍ ആണോ ഭരണം നടക്കുന്നതെന്ന് അറിയില്ല) അഭിനന്ദനങ്ങള്‍ അര്‍പ്പിക്കുന്നതോടൊപ്പം പുതുതായി കൊണ്ടുവരാന്‍ പോകുന്ന പഞ്ചായത്ത്‌ കെട്ടിടനിര്‍മ്മാണ ചട്ടങ്ങളില്‍ ഉള്‍പ്പെടുത്തേണ്ട/ശ്രദ്ധിക്കേണ്ട ചില കാര്യങ്ങള്‍ കൂടെ സൂചിപ്പിക്കുന്നു.പുതുതായികൊണ്ടുവരുന്ന പഞ്ചായത്ത്‌ കെട്ടിടനിര്‍മ്മാണ ചട്ടങ്ങളില്‍ കൂടുതല്‍ ഇളവു വരുത്തുകയും അഴിമതിക്ക്‌ ഇടവരുത്താത്തവിധത്തില്‍ നിയമങ്ങളില്‍ വ്യക്തത ഉണ്ടായിരിക്കുകയും ചെയ്യണം.ബോധപൂര്‍വ്വം നിയമം ലംഘിക്കുന്നവര്‍ക്കെതിരെ ശക്തമായ നടപടികള്‍ എടുക്കുകയും വേണം.

1.മൂന്നുസെറ്റുവരെയുള്ള സ്ഥലത്തു പണിയുന്ന കെട്ടിടങ്ങള്‍ക്ക്‌ അനുവദിച്ചിട്ടുള്ള ദൂരപരിധി സംബന്ധിച്ചുള്ള ഇളവുകള്‍ അഞ്ചുസെന്റുവരെ അനുവദിക്കുക.

2.പൂര്‍ണ്ണമായും ഓല,മുള തുടാങ്ങിയവകൊണ്ട്‌ താല്‍ക്കാലികമായി നിര്‍മ്മിക്കുന്ന വീടുകളെ കെട്ടിടനിര്‍മ്മണചട്ടങ്ങളില്‍ നിന്നും ഒഴിവാക്കുക. ( ചുമരു ഇല്ലാതെ ഓലകൊണ്ട്‌ വശങ്ങള്‍ മറച്ചും മേല്‍ക്കൂര ഓലകൊണ്ട്‌ നിര്‍മ്മിച്ചതുമായ വീടുകള്‍)

3.നഗരപ്രദേശങ്ങളില്‍ നിന്നും വ്യത്യസ്ഥമായി ഗ്രാമങ്ങളില്‍ "നാട്ടുവഴികള്‍" അഥവാ ഇടവഴികള്‍ ഒത്തിരിയുണ്ട്‌.ഇത്തരം വഴിയില്‍ നിന്നും ആദ്യ 75 മീറ്റര്‍ വരെ 1.5 മീറ്ററും തുടര്‍ന്ന് 2മീറ്ററും എന്ന വ്യവസ്ഥ ലഘൂകരിച്ച്‌ ആദ്യ അഞ്ഞൂറുമീറ്റര്‍ നീളമുള്ള വഴിയില്‍ നിന്നും കെട്ടിടത്തിലേക്ക്‌ 1.20 മീറ്റര്‍ അകലം ആക്കുക.

4.ഭൂജലനിരപ്പ്‌ ഉയര്‍ന്നതും,വര്‍ഷക്കാലത്ത്‌ വെള്ളക്കെട്ടുള്ളതും, കുടിവെള്ളത്തിനു ക്ഷമം ഇല്ലാത്തതുമായ പ്രദേശങ്ങളില്‍ മഴവെള്ളസംഭരണികള്‍ നിര്‍ബന്ധമാക്കാതിരിക്കുക. നിലവില്‍ 100 മീറ്റര്‍ സ്ക്വയറില്‍ കൂടുതല്‍ വലിപ്പമുള്ള കെട്ടിടങ്ങള്‍ക്ക്‌ കെട്ടിടത്തിന്റെ തറവിസ്തീര്‍ണ്ണത്തിനു ആനുപാതികമായ വലിപ്പത്തില്‍ മഴവെള്ള സംഭരണി നിര്‍ബന്ധമാണ്‌.ഇത്‌ ഗ്രാമീണമേഘലയില്‍ വീടുവെക്കുന്ന സാധാരണക്കാര്‍ക്ക്‌ ഏകദേശം 10000 മുതല്‍ 20000 വരെ അധിക ചിലവു വരുത്തുന്നു.

5.മണല്‍ പാസ്സ്‌ അംഗീകൃത ലൈസന്‍സ്ഡ്‌ എഞ്ചിനീയര്‍ ക്വാണ്ടിറ്റി കണക്കാക്കി സാക്ഷ്യപ്പെടുത്തുന്ന അളവില്‍ അനുവദിക്കുന്ന രീതി നിര്‍ബന്ധമാക്കുക.കൂടാതെ ഒരു സര്‍വ്വേനമ്പറില്‍ ഉള്ള ഭൂമിയില്‍ കെട്ടിടം നിര്‍മ്മിക്കുന്നതിനുള്ള അനുമതി നല്‍കുകയും അതുപ്രകാരം മണല്‍പാസ്‌ അനുവദിക്കുകയും ചെയ്യുമ്പോള്‍ തന്നെ പ്രസ്തുത സ്ഥലത്ത്‌ പണിയുന്ന കെട്ടിടത്തിനു മണല്‍ അനുവദിക്കും മ്പോള്‍ അതു ഘട്ടം ഘട്ടം ആക്കുക. പലയിടത്തും "ഡെമ്മിപ്ലാനുകള്‍" സബ്മിറ്റ്‌ ചെയ്ത്‌ മണല്‍പാസ്‌ എടുക്കുകയും പിന്നീട്‌ വീടുപണിയാതിക്കുകയും ചെയ്യുന്ന പ്രവണ കണ്ടുവരുന്നു.(മണല്‍ മാഫിയ ഇങ്ങനെ മണ്ണ്‍ സംഘടിപ്പിച്ച്‌ മറിച്ചുവില്‍ക്കുന്നു)

6.എഞ്ചിനീയര്‍മാക്കും സൂപ്പര്‍വൈസര്‍മാക്കും ലൈസന്‍സ്‌ ഏര്‍പ്പെടുത്തിയപോലെ മേസ്തിരിമാര്‍ക്കും ലൈസന്‍സ്‌ ഏര്‍പ്പെടുത്തുകയും പ്രസ്തുത മേസ്തിരിയുടെ കീഴില്‍ ആളുകളെ ജോലിക്ക്‌ നിര്‍ത്തുകയും ചെയ്യുക.അവിദഗ്ദരായ മേസ്തിരിമാര്‍ക്ക്‌ പുതിയ ശാസ്തീയമായ അറിവുകള്‍ പകര്‍ന്നുകൊടുക്കുവാന്‍ അതാതു ജില്ലകളീല്‍ സംവിധാനം ഒരുക്കുക. (വനം വകുപ്പ്‌ ആനപാപ്പന്മാര്‍ക്ക്‌ കോഴ്സുനടത്തി ലൈസന്‍സ്‌ നല്‍കുന്നപോലെ ഉള്ള സംവിധാനം)

7.അന്യ സംസ്ഥനനങ്ങളില്‍ നിന്നും വരുന്ന തൊഴിലാളികള്‍ മലയാളിയായ മേസന്റെ കീഴില്‍ തന്നെ ജോലിചെയ്യുന്നു എന്നും അവര്‍ ഏതുസംസ്ഥാനത്തുനിന്നും വരുന്നു അവരെ സംബന്ധിച്ചുള്ള തിരിച്ചറിയല്‍ രേഖകളും തൊഴില്‍ ഉടമയില്‍നിന്നും കൃത്യമായി കൂലിയും അടിസ്ഥാന സൗകര്യവും ലഭിക്കുന്നുണ്ടെന്ന് ഉറപ്പുവരുത്തുവാനുള്ള സംവിധാനം അതാതു പഞ്ചായത്തുകളില്‍ ഏര്‍പ്പെടുത്തുക.

8. പുഴയില്‍ നിന്നും നൂറുമീറ്ററും അമ്പതു മീറ്റര്‍ നീളമുള്ള പുഴയില്‍ നിന്ന് അമ്പതു മീറ്ററും ദൂരത്തില്‍ കെട്ടിടം നിര്‍മ്മിക്കുവാന്‍ കഴിയൂ എന്ന കേന്ദ്രനിയമം കേരളത്തില്‍ പലയിടത്തും 5-10 സെന്റ്‌ ഭൂമിയുള്ളവരും കാലങ്ങളായി പ്രസ്തുത ഭൂമിയില്‍ താമസിച്ചുവരുന്നവരുമായ ആളുകള്‍ക്ക്‌ വീടുപുതുക്കിപ്പണിയുന്നതിനും പുതുതായി വീടുവെക്കുന്നതിനും ബുദ്ധിമുട്ടുണ്ടാക്കുന്നു. ഇത്തരം സാഹചര്യത്തില്‍ പുഴയാട്‌ ചേര്‍ന്ന് സ്ഥിരമായി താമസിക്കുന്നവര്‍ക്കും ഭാഗമായി സ്ഥലം ലഭിക്കുന്നവര്‍ക്കും പുഴയില്‍ നിന്നും 30 മീറ്റര്‍ ദൂരത്തില്‍ വീടുവെക്കുവാന്‍ അനുമതി നല്‍കുക.പുഴയുടെ വശങ്ങളില്‍ പുതുതായി സ്ഥലം വാങ്ങുന്നവര്‍ക്കും റിസോര്‍ട്ടുകാര്‍ക്കും ഈ ഇളവു നല്‍കാതിരിക്കുക.

9.നിര്‍ബന്ധമായും കെട്ടിടം നിര്‍മ്മിക്കുന്നതിനു മുമ്പ്‌ പഞ്ചായത്തില്‍ നിന്നും കെട്ടിടനിര്‍മ്മാണത്തിനു അനുമതി വാങ്ങുന്നു എന്ന് ഉറപ്പുവരുത്തുക.നിയമം വന്നതിനു ശേഷവും "വാസ്തു ശാസ്ത്രഞ്ജന്മാരുടെ" ഉപദേശപ്രകാരം സ്ഥനനിര്‍ണ്ണയം നടത്തി റൂള്‍പ്രകരം പ്ലോട്ടിന്റെ അതിര്‍ത്തിയില്‍ നിന്നും പാലിക്കേണ്ട ദൂരമ്പോലും ഇല്ലാതെ നിര്‍മ്മിക്കപ്പെടുന്ന ഫൗണ്ടേഷനുകള്‍ വര്‍ദ്ധിച്ചുവരുന്നു.

10.ഭര്‍ത്താവു മരിക്കുകയും ഭാര്യക്കും മക്കള്‍ക്കും സ്വത്തില്‍ അവകാശം വരികയും ചെയ്യുന്ന കേസുകള്‍ നിരവധിയാണ്‌.പലപ്പോഴും പ്രായമായ അമ്മമാര്‍ എല്ലാ മക്കളുമായും നല്ല ബന്ധത്തില്‍ ആയിരിക്കണം എന്നില്ല. ഇത്തരക്കാര്‍ക്ക്‌ വീടുനിര്‍മ്മിക്കുവാന്‍ ഇന്നത്തെ നിയമപ്രകാരം പല ബുദ്ധിമുട്ടുകളും ഉണ്ട്‌. ഇതു ലഘൂകരിച്ച്‌ ഭര്‍ത്താവിന്റെ മരണസര്‍ട്ടിഫിക്കേറ്റുണ്ടെങ്കില്‍ ഭാര്യക്ക്‌ പ്രസ്തുത സ്ഥലത്ത്‌ കെട്ടിടം നിര്‍മ്മിക്കുവാന്‍ അനുമതി നല്‍കുവാനുള്ള സംവിധാനം ഏര്‍പ്പെടുത്തുക.പിന്നീട്‌ അമ്മയുടെ മരണശേഷം അനന്തരാവകാശികളായ എല്ലാവര്‍ക്കും നിയമപ്രകാരം ഉള്ള അവകാശം നല്‍കുക.(പ്രായമായ ഒത്തിരി അമ്മമാര്‍ നിയമത്തിന്റെ നൂലമാലകളില്‍ ബുദ്ധിമുട്ടുന്നു.)

പാരമൊഴി:നാടിനു ഗുണമുണ്ടാകുന്നതും കാലഘട്ടത്തിനു അനുയോജ്യവും അനിവാര്യവുമായ കൊള്ളാവുന്ന സംഭവങ്ങളെ എന്നും എതിര്‍ത്ത്‌ മാത്രം ശീലമുള്ള ചിലര്‍ക്കൊക്കെ ഈ നിയമം നടപ്പില്‍ വന്നതില്‍ കാര്യമായ എതിര്‍പ്പുണ്ട്‌.ഇനി നടപ്പില്‍ വരാന്‍ പോകുന്ന പഞ്ചായത്ത്‌ ആക്ടില്‍ നാട്ടുകാര്‍ക്ക്‌ പരമാവധി ബുദ്ധിനുട്ടുണ്ടാക്കുന്ന വകുപ്പുകള്‍ കൂട്ടിചേര്‍ത്തും പഞ്ചായത്തുകളിലെ ഉദ്യോഗസ്ഥന്മാര്‍ നിയമത്തിന്റെ നൂലാമാലപറഞ്ഞ്‌ ജനത്തെ പത്തുപ്രാവശ്യം നടത്തുകയും ചെയ്താല്‍ ഈ നിയമത്തെ അട്ടിമറിക്കുവാന്‍ വളരെ എളുപ്പമാണ്‌.

പ്ലാന്‍-18

2007-11-13T14:00:00.000+03:00

വളരെ ചെറിയ ഒരു പ്ലോട്ടിലേക്ക്‌ ഡിസൈന്‍ ചെയ്തിരിക്കുന്ന ഒരു പ്ലാനാണിത്‌.ഏകദേശം ഏഴുമീറ്റര്‍ വീതി മാത്രം വരുന്ന ഇത്‌ കെട്ടിടനിര്‍മ്മാണചട്ടപ്രകാരം മുന്‍ വശത്ത്‌ മൂന്നുമീറ്ററും അടുക്കളഭാഗത്ത്‌ രണ്ടുമീറ്ററും(ഇവിടെ റിയര്‍സൈഡ്‌ പ്ലാനിലെ അടുക്കളവശമാണ്‌) മറുഭാഗത്ത്‌ ഒരുമീറ്ററും "പുറകില്‍" 1.2 മീറ്ററും വിട്ടാല്‍ ചതുരാകൃതിയില്‍ ഉള്ള ( ചുരുങ്ങിയത്‌ നീളം 1610X1010 സെന്റീമീറ്റര്‍) നാലുസെന്റ്‌ പ്ലോട്ടില്‍ പണിയാവുന്ന വീടാണിത്‌.

ലിവിങ്ങ്‌ ഏരിയായുടെ മുകളില്‍ ഒരു ഓപ്പണിങ്ങ്‌ കൊടുത്തിരിക്കുന്നു. ഇത്‌ താഴെനിലയേയും മുകള്‍നിലയേയും പൂര്‍ ണ്ണമായും കോണ്‍ക്രീറ്റ്‌ സ്ലാബിനാല്‍ വേര്‍തിരിക്കുന്നതിനെ ഇല്ലതാക്കുന്നു.വായുസഞ്ചാരത്തെ കൂടുതല്‍ സുഗമാക്കുന്നതോടൊപ്പം താഴത്തെ ചൂടുള്ളവായു പുറത്തുപോകുന്നതിനും ഇത്‌ ഉപകാരപ്രദമാണ്‌.കിച്ചണ്‍ ചെറുതാണ്‌ ഇന്നത്തെ കാലത്ത്‌ കൂടുതല്‍ അഭികാമ്യം. വൃത്തിയാക്കുവാനുള്ള സൗകര്യവും ഇന്റീറിയറിനു ചിലവാക്കുന്ന തുകയിലെ ലാഭവും മാത്രമല്ല ചെറിയകുടുമ്പം ആകുമ്പൊള്‍ ഒരാള്‍തന്നെ എല്ലാജോലികളും ചെയ്യേണ്ടിവരുന്നസാഹചര്യത്തില്‍ കിച്ചണിനകത്തെ നടത്തം പരമാവധികുറക്കുവാനും ഇത്‌ സഹായിക്കും.

സ്റ്റെയര്‍കേസിനടിയിലെ ടോയ്‌ലറ്റ്‌ ഒഴിവാക്കാവുന്നതാണ്‌.പകരം അവിടെ വസ്ത്രങ്ങള്‍ കഴുകുന്നതിനും അയേണ്‍ചെയ്യുന്നതിനും ഉള്ള സൗകര്യം ഒരുക്കാം.

പ്ലാന്‍ 17

2007-10-16T09:58:00.000+03:00

പതിവില്‍ നിന്നും വ്യത്യസ്ഥമായി സ്റ്റെയര്‍ കേസ്‌ അല്‍പം വ്യസ്ത്യസ്ഥമായി കൊടുത്തിരിക്കുന്നു.സ്റ്റെയര്‍കേസ്‌ മോഡല്‍ എന്റെ ഒരു സുഹൃത്തിന്റെ ആശയം കടം കൊണ്ടതാണ്‌.കാര്‍പോര്‍ച്ചു കൂടാതെ എകദേശം രണ്ടായിരം ചതുരശ്രയടി വിസ്തീര്‍ണ്ണം ഉണ്ട്‌ ഈ പ്ലാനിന്‌. ഡൈനിങ്ങ്‌ റൂമില്‍ ഒന്നുരണ്ടു വിന്റോസ്‌ മാര്‍ക്ക്‌ ചെയ്യുവാന്‍ വിട്ടുപോയിട്ടുണ്ട്‌.അടുക്കള തെക്കു കിഴക്ക്‌ ഭാഗത്തായി വരുന്ന ഈ വീടിന്റെ മുഖം പടിഞ്ഞാറോട്ടാണ്‌. പടിഞ്ഞാറും വടക്കും ദിശയിലൂടെ റോഡ്‌ കടന്നുപോകുന്ന ഒരു സ്ഥലത്താണ്‌ ഈ വീട്‌ ഡിസൈന്‍ ചെയ്തിരിക്കുന്നത്‌.

മണല്‍കിട്ടാക്കനിയാകുമ്പോള്

2007-09-28T15:57:00.000+03:00

‍കേരളത്തിലെ നിര്‍മ്മാണ മേഘല അഭിമുഖീകരിച്ചുകൊണ്ടിരിക്കുന്ന ഒരു പ്രധാന പ്രതിസന്ധി മണലിന്റെ ലഭ്യതയിലുള്ള കുറവാണ്‌. ദിനം തോറും നിരവധി വമ്പന്‍ പ്രൊജക്ടുകള്‍ പ്രഖ്യാപിക്കുന്ന സംസ്ഥാനത്ത്‌ അതിനാവശ്യമായ മണല്‍ കണ്ടെത്തുക വളരെ വിഷമകരമാണ്‌. ഇതിനുപകരം വെക്കാവുന്ന ഒരു മെറ്റീരിയല്‍ ഇനിയും പ്രായോഗികതലത്തില്‍ കണ്ടെത്തിയിട്ടില്ല അല്ലെങ്കില്‍ വേണ്ടത്ര പ്രചാരത്തില്‍ വന്നിട്ടില്ല.ഇതിനിടയില്‍ കരമണലും തമിഴ്‌നാട്ടില്‍ നിന്നും ഇറക്കുമതി ചെയ്ത "കാവേരി"മണലും വ്യാപകമായി ഉപയോഗിക്കുവാന്‍ തുടങ്ങി. ഇതോടെ പലകെട്ടിടങ്ങളുടേയും കൂടപ്പിറപ്പായിമാറി വര്‍ഷക്കാലത്തെ ചോര്‍ച്ച.ആദ്യം തന്നെ ഇതു ശ്രദ്ധിച്ചില്ലെങ്കില്‍ നാലോ അഞ്ചോ വര്‍ഷത്തിനുള്ളില്‍ കോണ്‍ക്രീറ്റിനുള്ളിലെ സ്റ്റീല്‍ "കമ്പി" മുഴുവന്‍ തുരുമ്പുപിടിക്കുവാനും തുടങ്ങും. ലക്ഷങ്ങള്‍ ചിലവാക്കി നിര്‍മ്മിക്കുന്ന കോണ്‍ക്രീറ്റ്‌ കെട്ടിടങ്ങള്‍ കേവലം നാലോ അഞ്ചോ വര്‍ഷത്തിനുള്ളില്‍ ഉപയോഗശൂന്യമാകും.

ഈ അടുത്ത ദിവസം പത്രത്തില്‍ വാര്‍ത്തയുണ്ടായിരുന്നു പഞ്ചായത്തില്‍ നിന്നും ലഭിക്കുന്ന കെട്ടിടനിര്‍മ്മാണാനുമതിയും തിരിച്ചറിയല്‍ കാര്‍ഡും മറ്റും വില്ലേജില്‍ ഹാജരാക്കിയാല്‍ കെട്ടിടത്തിന്റെ വലിപ്പത്തിനനുസരിച്ച്‌ അളവുനിശ്ചയിച്ച്‌ ഭാരതപ്പുഴയില്‍ നിന്നും മണല്‍ ലഭിക്കുന്നതിനുള്ള പാസ്സിനുള്ള അനുമതി ലഭിക്കും. എതുമായി തലപ്പിള്ളിതാലൂക്ക്‌ ഓഫീസില്‍ പോയാല്‍ അവിടെ നിന്നും മണലിനുള്ള പാസ്സ്‌ ലഭിക്കും(ഇതാണ്‌ ഈ സംഗതിയെപറ്റി എനിക്കുള്ള അറിവ്‌) ഇവിടെ ജനങ്ങള്‍ക്ക്‌ പ്രത്യേകിച്ചും ഭര്‍ത്താക്കാന്മാര്‍ നാട്ടില്‍ ഇല്ലാതെ സ്ത്രീകള്‍ മാത്രം ഉള്ള വീട്ടില്‍ (പ്രവാസികളാണിതില്‍ കൂടുതല്‍ ബുദ്ധിമുട്ട്‌ അനുഭവിക്കുക) ഇതെത്രമാത്രം പ്രായോഗികമാകും എന്ന് സംശയമാണ്‌. വില്ലേജില്‍ നിന്നും എടുക്കുന്ന പാസ്സില്‍ തലപ്പിള്ളിയിലോ മറ്റ്‌ ഏതെങ്കിലും താലൂക്കുകളിലോ പോയി മണല്‍ കളക്ടുചെയ്യുവാന്‍ ഒരു നോമിനിയെ ഏര്‍പ്പെടുത്തുവാന്‍ ഉള്ള സൗകര്യം കൂടെ അധികൃതര്‍ ചെയ്തുകൊടുത്തില്ലെങ്കില്‍ പലര്‍ക്കും ഇതുകൊണ്ടുള്ള പ്രയോജനം ലഭിക്കാതെ പോകും.

വാല്‍മൊഴി: ഇനിയിപ്പോ മണലെടുക്കുവാനുള്ള പെര്‍മിറ്റ്‌ വീട്ടുകാര്‍ക്ക്‌ ലഭിച്ചാല്‍ ഇടനിലക്കാരും മറ്റും തട്ടിയെടുത്ത്‌ ദുരുപയോഗം ചെയ്യുവാനുള്ള സാധ്യത വളരെ കൂടുതല്‍ ആണ്‌.

പ്ലാന്‍-16

2007-09-13T09:30:00.000+03:00

പ്ലാനിനു കടപ്പാട്‌ മിസിസ്സ്‌ എസ്‌.കുമാര്‍.

കാര്‍പോര്‍ച്ചും അടക്കം 2250 ചതുരശ്രയടി വിസ്തീര്‍ണ്ണമുള്ള ഒരു വീടിന്റെ പ്ലാനാണ്‌ ഇത്‌.സ്റ്റെയര്‍കേസ്‌ സ്പൈറല്‍ (സെമീ സ്പൈറല്‍ എന്നു പറയാം) ആയിട്ടാണ്‌ കൊടുത്തിരിക്കുന്നത്‌.ഹാന്റ്‌ റെയില്‍ സ്റ്റീല്‍കൊണ്ട്‌ കൊടുത്ത്‌ ആകര്‍ഷകമാക്കാം.(മരം ആണ്‌ കൂടുതല്‍ നന്നാകുക എന്ന് അഭിപ്രായം ഉണ്ടാകാം പക്ഷെ മരം ചിലവ്‌ വര്‍ദ്ധിപ്പിക്കും.അദിഥികളുള്ളപ്പോള്‍ അവര്‍ക്ക്‌ ശല്യമുണ്ടാകാതെ കുടുമ്പാംഗങ്ങള്‍ക്ക്‌ പ്രോഗ്രാമ്മുകള്‍ ആസ്വദിക്കുവാന്‍ ഡൈനിങ്ങ്‌ ഏരിയായില്‍ ഇരുന്ന് കാണാവുന്ന വിധത്തില്‍ സ്റ്റെയര്‍ കേസിന്റെ അടിയിലേക്ക്‌ ടിവിയുടെ സ്ഥാനം മാറ്റി ക്രമീകരിക്കാവുന്നതാണ്‌.മാത്രമല്ല ഇത്‌ ലിവിങ്ങ്‌ റൂം വൃത്തികേടാകാതെ സൂക്ഷിക്കുന്നതിനും നല്ലതാണ്‌.ലിവിങ്ങ്‌ റൂമില്‍ ഒരു ദിവാന്‍ കോട്ട്‌ ഇട്ട്‌ അല്‍പം "രാജകലയൊക്കെ" വരുത്താം.ഡൈനിങ്ങ്‌ ഹാളില്‍ ഇരിക്കുന്നവര്‍ക്ക്‌ ബുദ്ധിമുട്ടുണ്ടാക്കാത്തരീതിയില്‍ വാഷ്ബേസിനും കോമണ്‍ ടോയ്‌ലറ്റും ക്രമീകരിച്ചിരിക്കുന്നു.

കിച്ചണില്‍ ഗ്യാസടുപ്പും ഓവനും എല്ലാം വെക്കുവാന്‍ സൗകര്യം ഒരുക്കിയിട്ടുണ്ട്‌. കിച്ചണ്‍ വിന്റോകള്‍ 90 സെന്റീമീറ്റര്‍ മാത്രമേ ഉയരം ഉണ്ടാകൂ. ( 210-ല്‍ നിന്നും താഴേക്ക്‌ 90 സെന്റീമീറ്റര്‍) കിച്ചണ്‍ -2 -ല്‍ വിറകടുപ്പും ചിമ്മിനിയും നല്‍കിയിരിക്കുന്നു.അവിടെ നിന്നും പ്രവേശിക്കാവുന്ന രീതിയിലാണ്‌സ്റ്റോര്‍ ഒരുക്കിയിരിക്കുന്നത്‌. യുടിലിറ്റി ഏരിയായില്‍ അമ്മിയും.വാഷിങ്ങ്‌ മെഷീനും വെക്കാം.ഈ ഏരിയാ ഗ്രില്‍ ഇട്ട്‌ സുരക്ഷിതമാക്കുന്നത്‌ നല്ലതാണ്‌.

കുടുമ്പാംഗങ്ങള്‍ക്ക്‌ ഒത്തുചേരുന്നതിനു മുകള്‍നിലയിലൊരു ഫാമിലി ലിവിങ്ങ്‌ റൂം കൊടുത്തിരിക്കുന്നു.

മുകള്‍ നിലയില്‍ ഒരു ഊഞ്ഞാല്‍ നല്‍കിയിരിക്കുന്നു.റൂഫ്‌ കോണ്‍ക്രീറ്റ്‌ ചെയ്യുമ്പോള്‍ തന്നെ ഇതിനായി നാലു ഹുക്കുകള്‍ നല്‍കുന്നത്‌ നന്നായിരിക്കും.857 ചതുരശ്രയടി വിസ്തീര്‍ണ്ണമുള്ള മുകള്‍ നിലയില്‍ രണ്ടു ബെഡ്രൂമുകള്‍ കൊടുത്തിരിക്കുന്നു.മുകള്‍നിലയില്‍ രണ്ടു ബെഡ്രൂമിനും കൂടെ ഒരു കോമണ്‍ ബാത്രൂം മതി എന്നുള്ളവര്‍ക്ക്‌ താഴത്തെ ടോയ്‌ലറ്റിനു മുകളില്‍ അതേ പോലെ തന്നെ ഒരു കോമണ്‍ ടോയ്‌ലറ്റ്‌ ഒരുക്കാവുന്നതാണ്‌.

മുസ്ലിം വിഭാഗത്തില്‍ പെട്ടവര്‍ക്ക്‌ നിസ്കാരത്തിനായി ഒരിടം ഒരുക്കണം എന്നുണ്ടെങ്കില്‍ സ്റ്റെയര്‍കേസിനു താഴെകൂടെ ഒരു വാതില്‍ കൊടുത്ത്‌ ബാത്രൂം No:1 നെ ഒഴിവാക്കി പ്രാര്‍ത്ഥനാ മുറിയാക്കാവുന്നതാണ്‌.മുകള്‍ നിലയിലെ ബാത്രൂം No:3 യെ ബെഡ്രൂം No:3 യുടെ ഡ്രസ്സിങ്ങാക്കി അതിനപ്പുറത്തുവരുന്ന ബാത്രൂം No:2 വിനെ ഇതിന്റെ ബാത്രൂമാക്കി എടുക്കാം. എന്നിട്ട്‌ താഴെയുള്ള കോമണ്‍ ടോയ്‌ലറ്റിനു മുകളില്‍ ബെഡ്രൂം No:2 നു ബാത്രൂം ഒരുക്കാം. വായിച്ചിട്ട്‌ ഐഡിയാ കിട്ടാത്തവര്‍ മെയില്‍ അയക്കുക paarppidam@yahoo.com. നിസ്ക്കരിക്കുന്ന മുറിക്ക്‌ പ്രത്യേകം സ്ഥാനം ഉണ്ടോ എന്ന് എനിക്കറിയില്ല. ഉണ്ടെങ്കില്‍ അറിയുന്ന ആരെങ്കിലും പറഞ്ഞു തന്നാല്‍ നന്ന്.

Nb: ഇതിലെ അളവുകള്‍ വാസ്തു അനുസരിച്ചല്ല.

കോപ്പിചെയ്യുന്നവര്‍ക്കായി ഒരു അറിയിപ്പ്‌

2007-09-13T09:26:00.000+03:00

www.paarppidam.blogspot.com എന്ന ബ്ലോഗ്ഗില്‍ വരുന്ന പോസ്റ്റുകളോ ഡിസൈനുകളോ സാമ്പത്തികലാഭത്തിനോ അല്ലാതെയോ അനുമതിയില്ലാതെ പുനപ്രസിദ്ധീകരിക്കുകയോ ഉപയോഗപ്പെടുത്തുകയോ ചെയ്യരുത്‌. തികച്ചും സൗജന്യമായി ബ്ലോഗ്ഗില്‍ കൊടുക്കുന്ന ഈ ഡിസൈനുകള്‍ വീടുപണിയുന്നവര്‍ക്ക്‌ സഹായകമാകണം എന്ന ഉദ്ദേശ്യത്തോടെ പ്രസിദ്ധീകരിക്കുന്നതാണ്‌.(എന്നാല്‍ ബ്ലോഗ്ഗിലെ പ്രചാരണത്തേക്കാള്‍ നന്നായി ഞങ്ങളുടെ പ്രസിദ്ധീകരണത്തിലൂടെ ജനങ്ങളുടെ കൈകളില്‍ എത്തും എന്ന് ആരും ഇതിനു വ്യാഖ്യാനം നല്‍കേണ്ടതില്ല) വീടുവെക്കുന്നതിനായി ഈ പ്ലാനുകള്‍ ഉപയോഗിക്കുന്നതിനു യാതൊരു വിരോധവും ഇല്ല. എന്നാല്‍ പ്ലാനുകളും ഡിസൈനുകളും ഉള്‍ക്കൊള്ളുന്ന നിരവധി പുസ്തകങ്ങള്‍ ഇന്ന് വിപണിയിലുണ്ട്‌. അത്തരം പുസ്തകങ്ങള്‍ പ്രസിദ്ധീകരിക്കുന്നവരും വിതരണം ചെയ്യുന്നവരും ഇതില്‍ നിന്നും ഡിസൈനുകള്‍ പുന പ്രസിദ്ധീകരിക്കുവാന്‍ പാടുള്ളതല്ല.

NB: ടി.വി, പത്രമാധ്യമങ്ങള്‍, ഡിസൈനര്‍ പ്ലസ്‌ ബില്‍ഡര്‍,മലയാള മനോരമ പാര്‍പ്പിടം,വനിത വീട്‌ തുടങ്ങിയ പ്രസിദ്ധീകരണങ്ങള്‍ എന്നിവയില്‍ ഇതിലെ വിവരങ്ങള്‍ പൊതുജന താല്‍പര്യാര്‍ഥം നല്‍കുന്നതില്‍ വിരോധമില്ല.

സ്നേഹപൂര്‍വ്വം s.kumar